އޭޑީކޭ ހޮސްޕިޓަލުގެ ނިއުރޯސާޖަން ޑރ. އަލީ ނިޔާފް ނުވަ އަހަރަށްފަހު އެ ހޮސްޕިޓަލުން ވަކިވެ، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ބަދަލުވެއްޖެ އެވެ.

ޑރ. އަލީ ނިޔާފް އޭޑީކޭއިން ވަކިވިކަން އެ ހޮސްޕިޓަލުން ހާމަކޮށް، އޭނާ ފާއިތުވި ނުވަ އަހަރާއި 10 މަހު ކޮށްދީފައިވާ ހިދުމަތަށް އެ ހޮސްޕިޓަލުން ޝުކުރު އަދާކުރި އެވެ.

"އަލީ ނިޔާފްގެ ބުރަ މަސައްކަތުން ހޮސްޕިޓަލުގެ ނިއުރޯސާޖަރީ ޑިޕާޓްމަންޓަށް ގިނަ ކުރިއެރުންތަކެއް ލިބުނު. ހޮސްޕިޓަލުގެ އާއިލާ މެންބަރެއް ގޮތުގައި އަބަދުވެސް އަލީ ނިޔާފް ދެމިހުންނާނެ،" އޭޑީކޭއިން ބުންޏެވެ.

އައިޖީއެމްއެޗްއިން ބުނީ އަލީ ނިޔާފް އެ ހޮސްޕިޓަލަށް ބަދަލުވީ ނިއުރޯ ސާޖަރީގެ ސީނިއާ ކޮންސަލްޓަންޓް ސަބް ސްޕެޝަލިސްޓްގެ މަގާމަށް ކަމަށާއި މިއަދުން ފެށިގެން އޭނާއަށް އެޕޮއިންޓްމަންޓް ހެއްދޭނެ ކަމަށެވެ.

އަލީ ނިޔާފްގެ އިރުޝާދުގެ ދަށުން އޭޑީކޭއިން ވަނީ ނިއުރޯސާޖަރީގެ ދާއިރާއިން އާ ހިދުމަތްތަކެއް ތައާރަފްކޮށް، ކާމިޔާބު ގިނަ ސާޖަރީތަކެއް ކޮށްފަ އެވެ.

އޭގެއިތުރުން، އަލީ ނިޔާފްއާއެކު އޭޑީކޭއިން ޓްރެއިނިންތަކާއި، ގިނަ ޕްރޮގްރާމްތަކެއް ވެސް ކުރިއަށް ގެންގޮސްފައިވެ އެވެ.