އިކޮނޮމިކް މިނިސްޓްރީގެ ޑެޕިއުޓީ މިނިސްޓަރު އިބްރާހިމް މުނައްވަރު، އެ މިނިސްޓްރީގައި ރަޖިސްޓްރީކޮށްފައިވާ އަމިއްލަ ކުންފުންޏަކާ ދެކޮޅަށް ދައުލަތުން ދައުވާ ކުރާ މައްސަލައެއްގައި އެ ކުންފުނި ތަމްސީލްކުރާ ގާނޫނީ ވަކީލެއްގެ ގޮތުގައި ބައިވެރިވި މައްސަލަ ބަލަމުން އަންނަ ކަމަށް ރައީސް އޮފީހުން ބުނެފި އެވެ.

ރައީސް އޮފީހުގެ ތަރުޖަމާނު ހީނާ ވަލީދު "އަދަދު" އަށް ވިދާޅުވީ ސިޔާސީ މުވައްޒަފުން ވެސް ހިމެނޭ ގޮތަށް ދައުލަތުގެ އެއްވެސް މުވައްޒަފަކު ދައުލަތާ ދެކޮޅަށް ޝަރީއަތެއްގައި ވަކާލާތު ކުރުމަކީ ހުއްދަ ކަމެއް ނޫން ކަމަށެވެ.

"މިފަދަ މައްސަލަތައް ދިމާވަމުން ދާތީ [އިކޮނޮމިކް މިނިސްޓްރީގެ ޑެޕިއުޓީ މިނިސްޓަރު މުނައްވަރު މައްސަލަ ވެސް ހިމެނޭ ގޮތަށް]، ސަރުކާރުން ގެންދަނީ އެ ކަންކަން ބަލަމުން،" ހީނާ ވިދާޅުވި އެވެ.

އެއީ ޓެކްސް ދެއްކުމާ ގުޅޭ ގޮތުން މީރާއިން ކުންފުންޏަކާ ދެކޮޅަށް ހުށަހަޅާފައިވާ މައްސަލައެކެވެ. ޑެޕިއުޓީ މިނިސްޓަރަކު ދައުލަތާ ދެކޮޅަށް ވަކާލާތުކުރަން އެ ކުންފުނި ތަމްސީލްކުރާތީ މީރާއިން ވަނީ އެންމެ ފަހުން ބޭއްވި އަޑުއެހުމުގައި އިއުތިރާޒެއް ވެސް ހުށަހަޅައިފަ އެވެ.

އެކަމާ ގުޅޭ ގޮތުން ފަނޑިޔާރުންގެ ބެންޗުން ގޮތެއް ނުނިންމަވަ އެވެ. ދެން އޮންނަ އަޑުއެހުމަކަށް ގޮތެއް ނިންމަވާނެ ކަމަށް ވިދާޅުވެ އެ ދުވަހުގެ އަޑުއެހުން ނިންމަވާލެއްވީ އެވެ. ހައި ކޯޓުގައި މި މައްސަލަ ބެއްލެވީ ތިން ފަނޑިޔާރުންގެ ބެންޗަކުންނެވެ. އެއީ ފަނޑިޔާރު ހަސަން ޝަފީއު, ފަނޑިޔާރު ހުސައިން މަޒީދު, ފަނޑިޔާރު ހުޒައިފާ މުހައްމަދެވެ.