ރޯމް (ޖުލައި 20) - އެކާވީސް އަހަރަށް ފަހު، އިޓަލީގެ ފުރަތަމަ ޑިވިޝަނަށް ޕްރޮމޯޓްވި ކްލަބް، ކޯމޯގެ ކޯޗުކަން މިދިޔަ ސީޒަނުގައި އެ ޓީމަށް ކުޅެ، ވަގުތީގޮތުން އެ ޓީމާ ހަވާލުވި، ސެސްކް ފަބްރެގަސް އަށް ދީފި އެވެ.

ފަބްރެގަސް، 37، މިދިޔަ ސީޒަނުގައި ކޯމޯއާ ހަވާލުވީ ހަތަރު އަހަރުގެ ޑީލެއްގަ އެވެ. އަދި އެ ޓީމަށް އޭނާ ރަނގަޅު ކުޅުމެއް ދެއްކުމަށް ފަހު، ސީޒަނުގެ ފަހު ބައިގައި ކޯޗެއްގެ ގޮތުގައި މަސައްކަތްކުރަން ޖެހުނެވެ.

އެ ގޮތުން، ފަބްރެގަސް ވަނީ ނޮވެމްބަރާއި ޑިސެމްބަރު މަހު، ވަގުތީ ގޮތުން ޓީމާ ހަވާލުވެހުރެ، ފަސް މެޗު އެ ޓީމަށް ކޯޗުކޮށްދީފަ އެވެ. ފަހުން، ވޭލްސްގެ ކޯޗު، އޮސިއޯން ރޮބާޓްސް، ކޯމޯއާ ހަވާލުވުމުން، ފަބްރެެގަސް ހުރީ އެސިސްޓަންޓް ކޯޗަކަށެވެ.

ކުރިން އާސެނަލާއި ބާސެލޯނާ އަށް ކުޅުނު ފަބްރެގަސް ބުނީ، ކޯމޯގެ މެނޭޖްމަންޓުން އޭނާއާ ކޯޗުގެ ޒިންމާ ހަވާލުކުރުމަކީ ލިބުނު ބޮޑު ހިތްހަމަޖެހުމެއް ކަމަށެވެ.

"މި މަގާމު އަހަންނަށް ދޭން ޓީމުގެ މެނޭޖްމަންޓުން ނިންމީތީ ވަރަށް ބޮޑަށް ޝުކުރު އަދާކުރަން. ކްލަބްގެ މެނޭޖްމަންޓުން ބޭނުންވާ މިސްރާބަށް ގެންދެވޭނެ ކަމުގެ ޔަގީންކަން އަހަންނަށް އެބައޮތް. އަހަރެމެންނަށް ދެވިދާނެ މިސްރާބު މިހާރު ވެސް ފެންނަން ފަށައިފި،" ފަބްރެގަސް ބުންޏެވެ.

އިޓަލީގެ މީޑިއާ ރިޕޯޓްތައް ބުނާގޮތުން، ކޯމޯގެ ކޯޗުކަން ފަބްރެގަސް އަށް ދިން އެންމެ ބޮޑު ސަބަބަކީ، މަޝްހޫރު ކުޅުންތެރިންނާ އެކު، އެ ޓީމުގެ ހައިބަތު ބޮޑުކުރުމަށެވެ. އެ ގޮތުން، ފަބްރެގަސްގެ މަޝްވަރާގެ މަތިން ކޯމޯ އިން ވަނީ ކުރިން ލިވަޕޫލާއި ބާސެލޯނާ އަދި ވިޔަރެއާލަށް ކުޅުނު ސްޕެއިންގެ ކީޕަރު، ޕެޕޭ ރެއިނާގެ ސޮއި ހޯދައިފަ އެވެ. މީގެ އިތުރުން، ވިޔަރެއާލާއި ލިވަޕޫލަށް ކުޅުނު ވާތުބެކް އަލްބާޓޯ މޮރޭނޯ އާއި އިޓަލީގެ ކްލަބްތަކަށް ކުޅުނު ފޯވާޑް، ލޫޝިއާނޯ ބެލޮއްޓީ ވެސް މޮންޒާއާ ވަނީ ގުޅިފަ އެވެ.

ކޮންޓްރެކްޓް ހަމަވުމުން މެންޗެސްޓާ ޔުނައިޓެޑް ދޫކޮށްލަން ނިންމާފައިވާ ފްރާންސްގެ ޑިފެންޑަރު، ރަފައެލް ވަރާން ވެސް، ކޯމޯއާ ގުޅުމުގެ ފުރުސަތު ބޮޑެވެ.