ރާއްޖޭގެ ވޮލީބޯލް ޓީމުތަކުން މިހާރު އަމާޒު ހިފާފައިވަނީ 2027 ވަނަ އަހަރު ބާއްވާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގެ ފައިނަލުގައި ކުޅުމަށް ކަމަށް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސް މުހައްމަދު ލަތީފް (ލަތީބެ) ބުނެފި އެވެ.

ރާއްޖޭގައި މިއަދު ފެށި ކާވާ 20 އަހަރުން ދަށުގެ އަންހެން ވޮލީބޯލް ޗެމްޕިއަންޝިޕް މުބާރާތް ހުޅުވުމަށް މިރޭ ބޭއްވި ރަސްމިއްޔާތުގައި ވާހަކަ ދައްކަވަމުން ލަތީފް ވިދާޅުވީ، ވީއޭއެމްގެ ރައީސްގެ ހައިސިއްޔާތުން ދޭން ބޭނުންވާ އުންމީދަކީ 20 އަހަރުން ދަށުގެ ގައުމީ ޓީމުން މިއަދު ފެށި މި ދަތުރަކީ 2027 ވަނަ އަހަރުގެ އައިއޯއައިޖީގެ ފައިނަލް ކުޅުމުގެ އަޒުމު ކަމަށެވެ.

"ވޮލީބޯލް އެސޯސިއޭޝަންގެ ރައީސްގެ ހައިސިއްޔަތުން މިއަދު އަޅުގަނޑު އަޅުގަނޑުމެންގެ ވޮލީބޯލް އާއިލާ އަށް ޔަގީންކަމެއް ދޭން ބޭނުންވޭ. މިއަދު އަޅުގަނޑުމެންގެ 20 އަހަރުން ދަށުގެ ޓީމުން މި ފަށަނީ ވަރުގަދަ އަޒުމެއްގައި ފަށާ ދަތުރެއް. އިރާދަ ކުރެއްވިއްޔާ އަޅުގަނޑުމެންގެ ދަތުރުގެ އުންމީދަކީ 2027 ވަނަ އަހަރުގެ އިންޑިއަން އޯޝަން އައިލެންޑް ގޭމްސްގެ ފައިނަލް ކުޅުން. ފިރިހެން ޓީމާ އަންހެން ޓީމު ވެސް." ލަތީފް ވިދާޅުވި އެވެ.

ލަތީފް ވިދާޅުވީ, އައިއޯއައިޖީ އަށް ރާއްޖެ އިން ދާނީ ރިހި މެޑަލް އެންމެ މަދުވެގެން ހޯދުމުގެ އަޒުމުގައި ކަމަށެވެ. އަދި މި ވަގުތު ވީއޭއެމްގެ މަސައްކަތް ހުރީ އެ ކާމިޔާބީ އަށް ވާސިލްވެވޭނެ މަގުތައް ހޯދުމަށް ކަމަށް ލަތީފް ވިދާޅުވި އެވެ.

މި ރަސްމިއްޔާތުގައި ވާހަކަ ދައްކަވަމުން ކުޅިވަރާ ބެހޭ ވަޒީރު އަބްދުالله ރާފިއު (ރާއްޕެ) ވިދާޅުވީ، މި ސަރުކާރުން ކުޅިވަރު ތަރައްގީކޮށް ކުރިއެރުވުމަށް ގިނަ މަސައްކަތްތަކެއް ކުރަމުން އަންނަ ކަމަށެެވެ. މިއީ ޒުވާން ކުޅުންތެރިން ބައިނަލްއަގްވާމީ މުބާރާތްތަކުގައި ވާދަކުރުމަށް މަގު ކޮށައިދޭނެ މުބާރާތެއް ކަމަށް ވެސް މިނިސްޓަރު ރާފިއު ވިދާޅުވި އެވެ.

ވިހި އަހަރުން ދަށުގެ ގައުމީ އަންހެން ވޮލީބޯޅަ ޓީމު ފުރަތަމަ މެޗުން މިއަދު ވަނީ ކިރްގިސްތާން އަތުން ބަލިވެފަ އެވެ.

ލަތީފް، ވީއޭއެމްގެ ރައީސްގެ މަގާމަށް ދެ ވަނަ ފަަހަރަށް އިންތިހާބުވީ، މީގެ ހަތަރު މަސް ކުރިން ބޭއްވި އިންތިހާބު ކާމިޔާބުކުރައްވައިގެންނެވެ. ލަތީފް، އިންތިހާބުވީ، ވީއޭއެމްގެ ރައީސްކަމުން އިސްތިއުފާދިން، މުހައްމަދު ރަނޭޝް (ރަނޭ)ގެ ދައުރުގައި ބާކީ އޮތް އެއް އަހަރު ދުވަހަށް ރައީސްގެ މަގާމު ފުރުއްވުމަށެވެ. ދެން، އޮންނަ އައިއޯއައިޖީއަކާ ހަަމައަށް ލަތީފް، ވީއޭއެމްގެ ލީޑަޝިޕްގައި ހުންނަވާނަަމަ، އިތުރު ދައުރަކަށް ވީއޭއެމްގެ ރައީސްގެ މަގާމު ފުރުއްވަން ޖެހިވަޑައިގަންނަވާނެ އެވެ.

ލަތީފް ވަނީ، 2016-2019 އަށް ވީއޭއެމްގެ ރައީސްގެ މަގާމު ފުރުއްވައިފަ އެެވެ. ލަތީފް އަތުން ވޮލީ އެސޯސިއޭޝަންގެ ރައީސްގެ މަގާމު ގެއްލުނީ، މިދިޔަ ސަރުކާރުގެ ކޮމިޝަނާ އޮފް ސްޕޯޓްސް، ހީނާ އަހުމަދު ސަލީމް (ބޮޑުހީނާ)، ވޮލީ އެސޯސިއޭޝަންގެ މައްސަލައެއް ބަަލައި، އޭރު އޮތް ލަތީފްގެ ހިންގާ ކޮމިޓީ އުވާލައި، އެސޯސިއޭޝަން އިންޓަރިމް ހާލަތަކަށް ގެންނަން ނިންމުމުންނެވެ.