މިއަދުން ފެށިގެން ތައިލެންޑަށް ދަތުރުކުރާ ދިވެހިންނަށް 60 ދުވަހުގެ އޮންއެރައިވަލް ވިސާ ލިބޭގޮތް ހަދައިފި އެވެ.

ދިވެހިންނަށް ތައިލެންޑުން އޮންއެރައިވަލް ވިސާ ދޭން ފެށީ މާޗް 23، 2019 ގަ އެވެ. އޭރުން ފެށިގެން ތައިލެންޑުން ދެމުން ގެންދިޔައީ 30 ދުވަހުގެ އޮންއެރައިވަލް ވިސާ އެވެ.

ފޮރިން މިނިސްޓްރީން މިއަދު ބުނީ 60 ދުވަހަށް ތައިލެންޑުން ވިސާ ދޭން ނިންމާފައިވަނީ ބޭސްފަރުވާ ނުވަތަ ވިޔަފާރީގެ ބޭނުންތަކަށް ތައިލަންޑަށް ދަތުރުކުރާ ދިވެހިންނަށް ކަމަށެވެ.

އަދި، އެ މުއްދަތު އިތުރުކުރަން ބޭނުންވާ ހާލަތެއްގައި ވިސާގެ މުއްދަތު ހަމަވުމުގެ ކުރިން ތައިލެންޑް އިމިގްރޭޝަން ޑިޕާޓްމަންޓަށް އެކަން ހުށަހެޅުމުން އިތުރު 30 ދުވަހަށް ވިސާގެ މުއްދަތު އިތުރުކޮށްދޭގޮތަށް ހަމަޖެހިފައިވާކަމަށްވެސް މިނިސްޓްރީން ނެރުނު ބަޔާނުގައި ބުނެފައިވެ އެވެ.

ތައިލެންޑަކީ ވިޔަފާރިއާއި ޗުއްޓީ ހޭދަކޮށްލުމަށް ގިނަ އަދަދެއްގެ ދިވެހިން އަބަދުވެސް ދަތުރުކުރާ ގައުމެކެވެ.

އެ ގައުމުގެ ހޮސްޕިޓަލުތަކުން އާސަންދަ މެދުވެރިކޮށް ސިއްހީ ހިދުމަތް ހޯދޭނެ ގޮތް މި ސަރުކާރުން ހަމަޖައްސައިދެއްވާނެ ކަމަށް ރައީސް ޑރ. މުހައްމަދު މުއިއްޒު ޖެނުއަރީގައި ވިދާޅުވި އެވެ. ނަމަވެސް މިހާތަނަށް އެ އިންތިޒާމު ހަމަޖެހިފައެއް ނުވެ އެވެ.