ފެނަކަ ކޯޕަރޭޝަނުގެ ބޭނުމަށް ގދ. ތިނަދޫން ހަތް ގެއެއް ކުއްޔަށް ނެގުމަށް ޖުމުލަ 2.8 މިލިއަން ރުފިޔާ ދައްކާފައިވާ ކަމަށް އެ ކުންފުނިން ބުނެފި އެވެ.

ފެނަކަ ކޯޕަރޭޝަންގެ މެނޭޖިން ޑިރެކްޓަރު މުއާޒު މުހައްމަދު ރަޝީދު "އަދަދު" ނޫހަށް ވިދާޅުވީ އެ ގެތަކުގެ ތެރެއިން ހަ ގެއެއް ކުއްޔަށް ހިފުމުގެ އެއްބަސްވުން ހެދީ ނޮވެމްބަރު 2021 އިން ފެށިގެން ހަ މަސް ދުވަހަށް ކަމަށެވެ. އިތުރު ގެއެއް، ޖެނުއަރީ 2022 އިން ފެށިގެން ކުއްޔަށް ނެގިއިރު، އެ ހުރިހާ ގެއަކަށް 17 މަސްވުރެ ގިނަ ދުވަހު ކުލި ދައްކާފައިވާ ކަމަށް އޭނާ ވިދާޅުވި އެވެ.

"ކޮންމެ ގެއަކަށް ތިން ލައްކަ އާއި ފަސް ލައްކަ ރުފިޔާއާ ދެމެދުގެ އަދަދަކުން ފައިސާ ދައްކާފައިވޭ. ޖުމުލަ 2.8 މިިލިއަން ރުފިޔާ ވަނީ ދައްކާފައި،" މުއާޒު ވިދާޅުވި އެވެ.

އޭގެ ތެރެއިން އެއް ގެ ކުއްޔަށް ހިފާފައި ބަހައްޓާފައި ހުރީ އޭރުގެ މެނޭޖިން ޑިރެކްޓަރު ތިނަދޫއަށް ވަޑައިގެން ހުންނެވުމަށް ކަމަށާއި އެހެން ގެތަކަކީ، އެ ރަށުގައި ހިންގި ފެނަކައިގެ މަޝްރޫއުތަކުގައި ދިޔަ މުވައްޒަފުން ތިބުމަށް ކުއްޔަށް ހިފި ތަންތަން ކަމަށް މުއާޒު ވިދާޅުވި އެވެ.

"މިއީ އިސްރާފެއް،" އޭނާ ވިދާޅުވި އެވެ.

ފެނަކަ ކޯޕަރޭޝަންގެ އެންމެ ބޮޑު އެއް މަޝްރޫއު ހިންގަމުން ދިޔައީ ތިނަދޫގަ އެވެ. އެ ރަށު އިންޖީނުގެ އިމާރާތް ކުރުމުގެ މަސައްކަތް ސައީދުގެ ދައުރުގައި ފަށާއި މަޝްރޫއު ވަނީ ގާތްގަނޑަކަށް ނިންމައިފަ އެވެ.

ސައީދު ވިދާޅުވީ ކޮރަޕްޝަންގެ އެއްވެސް އަމަލެއް ހިންގާފައި ނޯންނާނެ ކަމަށެވެ. މަސައްކަތް ކޮށްފައިވާނީ ރައްޔިތުންގެ ބޮޑު ތަކުލީފަކަށް ވެފައިވާ އަސާސީ ހިދުމަތްތައް ރައްޔިތުން ހިތްހަމަ ޖެހޭ މިންވަރަށް ހަރުދަނާކަންމަތީ ގާއިމުކޮށް ދިނުމާއި ސަރުކާރުގެ ސިޔާސަތަށް ރައްޔިތުން ބޭނުންވާ ގޮތަށް ކަމަށެވެ

ނަމަވެސް، ފެނަކަ ކޯޕަރޭޝަންގެ މަޝްރޫއުތައް ހިންގާފައިވަނީ މާކެޓު ރޭޓަށް ވުރެ އެތައް ގުނައެއް ބޮޑުކޮށް، ކުންފުންޏަށް ގެއްލުންވާ ގޮތަށް ކަމަށް ތުހުމަތުކުރެ އެވެ.