ރާއްޖޭގައި ފުޅާދާއިރާއެއްގައި މުވާސަލާތީ ހިދުމަތް ދެމުން އަންނަ އުރީދޫ މޯލްޑިވްސް އަދި ލަގްޒަރީ އެއާލައިން ބިއޮންޑްއާއެކު އެއްބަސްވުމެއްގައި ސޮއިކޮށްފި އެވެ.

އެ އެއްބަސްވުމުގެ ދަށުން އަންނަ އޯގަސްޓް މަހުން ފެށިގެން ބިއޮންޑުން ރާއްޖެއަށް ދަތުރުކުރާ ފަތުރުވެރިންނަށް އެކްސްކްލޫސިވްކޮށް އުރީދޫއިން ޓްރެވެލް ސިމް ފޯރުކޮށްދިނުމަށް ވަނީ ހަމަޖެހިފަ އެެވެ.

އެއްބަސްވުމާ ގުޅޭގޮތުން ބިއޮންޑްގެ ސީއީއޯ އަދި ޗެއާމަން ޓެރޯ ޓަސްކިލާ ވިދާޅުވީ އެ އެއާލައިންގެ ކަސްޓަމަރުންނަށް އޭގެ ސަބަބުން ފަސޭހަތަކެއް ވެގެންދާނެ ކަމަށެވެ.

އުރީދޫގެ ސީއީއޯ ހާލިދް އަލް ހަމާދީ ވިދާޅުވީ ބިއޮންޑްއާއެކު އެއްބަސްވުން ހެދުމަކީ ލިބޭ އުފަލެއް ކަމަށާއި ފަސިންޖަރުންނަށް ދޭ ސިމްތަކުން މުޅި ދުނިޔެއާ ކަނެކްޓުވާން ފުރުސަތު ލިބޭނެ ކަމަށެވެ.

އެ ސިމްތައް ރާއްޖެއަށް ކުރާ ދަތުރުމަތީގައި ކެބިން ކްރޫއިން ފަސިންޖަރުންނަށް ދޭނެ އެވެ. އެ ސިމް ރާއްޖެއަށް ފްލައިޓް ލޭންޑް ކުރުމާއެކު އެކްޓިވޭޓް ކުރެވޭނެ އެވެ.

އުރީދޫއިން އަންނަނީ ރާއްޖޭގައި މުވާސަލާތީ ގޮތުން އާ ހިދުމަތްތައް ތައާރަފްކުރަމުންނެވެ. އެގޮތުން އެ ކުންފުނިން ދެމުން އަންނަ ގިނަ ހިދުމަތްތަކަކީ ޑިޖިޓަލް ހިދުމަތްތަކެވެ.