ތިމާވެށި ހިމާޔަތް ކުރުމުގެ އެކި މަސައްކަތްތައް ކުރުމަށް ޔޫރަޕިއަން ޔޫނިއަން (އީޔޫ) ރާއްޖެއަށް 6.5 މިލިއަން ޔޫރޯ (އެއް ބިލިއަން ރުފިޔާ) ދިނުމަށް މަޝްވަރާތައް ފަށައިފި އެވެ.

މި މަޝްވަރާތަކުގައި ބައިވެރިވެފައިވަނީ ރާއްޖޭގެ އެންވަޔަރަމަންޓު މިނިސްޓްރީގެ އޮފިޝަލުންނާއި އީޔޫ އަދި އިންޓަނޭޝަނަލް ޔޫނިއަން ފޯ ކޮންސަވޭޝަން އޮފް ނޭޗާ (އައިޔޫސީއެން) ގެ އޮފިޝަލުންނެވެ.

އެންވަޔަރަމަންޓު މިނިސްޓްރީގެ ރަސްމީ އެކްސް އެކައުންޓުން ކުރި ޕޯސްޓެއްގައި ބުނީ ބައްދަލުވުމުގައި މަޝްވަރާކުރެވުނީ އެ ގްރާންޓު ޕްރޮޖެކްޓު ފެށުމާއި ކުރިއަށް ގެންދިއުމާ ގުޅޭގޮތުން ކަމަށެވެ.

"މި މަޝްވަރާތަކުގައި މައިގަނޑު ގޮތެއްގައި ދެކެވުނީ ބަޔޯޑައިވާސިޓީ އަދި ކުނި މެނޭޖުކުރުމާއި ހިމާޔަތް ކުރެވިފައިވާ ސަރަހައްދުތައް ބެލެހެއްޓުމަށް ކުރެވޭނެ ކަންކަމާ ގުޅޭގޮތުން،" އެ ޕޯސްޓުގައި ބުންޏެވެ.

ބެލެވޭ ގޮތުގައި އީޔޫ އިން ކުރިއަށް އޮތް ފަސް އަހަރަށް ބަހާލައިގެން ދޭ އެ ހިލޭ އެހީ މައިގަނޑު ގޮތެއްގައި ބޭނުންކުރެވޭނީ އެ މަސައްކަތްތަކަށެވެ. އެ ތިން މައްސަލަ އަދި ވަކިން ހާއްސަކޮށް ކުނި މެނޭޖުކުރުމަކީ ރާއްޖެއަށް މިވަގުތު ވަރަށް ބޮޑަށް ހައްލެއް ބޭނުންވެފައިވާ މައްސަލައެކެވެ.

މިދިޔަ މަހުގެ ދެވަނަ ދުވަހު އީޔޫގެ އިސް އޮފިޝަލުންނާއި ދިވެހި ސަރުކާރާއި ދެމެދު ބާއްވާ ސިލްސިލާ މަޝްވަރާ ބައްދަލުވުންތަކުގެ ފަސްވަނަ ބައްދަލުވުން މާލޭގައި ބޭއްވި އެވެ. އެ ބައްދަލުވުމުގެ އެޖެންޑާގައި ހިމެނޭ ކަންކަމުގެ ތެރޭގައި ޝަރުއީ ދާއިރާގެ އިސްލާހުތަކާއި، ސަލާމަތާ ގުޅުން ހުރި ކަންކަމުގެ އިތުރުން ޑިމޮކްރެޓިކް އިސްލާހުތަކާއި މޫސުމީ ބަދަލުތައް ހިމެނުނެވެ.