އަފްގާނިސްތާނުގެ ރެފިއުޖީންނަށް ޕާކިސްތާނުގައި އިތުރު އެއް އަހަރު ތިބުމަށް ހުއްދަ ދީފި އެވެ.

ޕާކިސްތާނުން ހުއްދަ ދީފައި ރަޖިސްޓަކޮށްފައި ތިބި 1.5 މިލިއަން ރެފިއުޖީންނަށެވެ. އެ ރެފިއުޖީން ޕާކިސްތާނުގައި ތިބުމުގެ މުއްދަތު މިދިޔަ ޖޫން 30، ގައި ވަނީ ހަމަވެފަ އެވެ. އެ މުއްދަތު އިތުރުކޮށް ދިނީ އަންނަ އަހަރުގެ ޖޫން 30، ގެ ނިޔަލަށެވެ.

ޕާކިސްތާނުން އެ ނިންމުން ނިންމާފައި ވަނީ އދ ގެ ރެފިއުޖީ އެޖެންސީގެ ޗީފް ފިލިޕޯ ގްރާންޑީ އެ ގައުމަށް މި ހަފުތާގައި ކުރެއްވި ދަތުރުގައި ބޮޑުވަޒީރު ޝެހެބާޒް ޝަރީފްއާއެކު ކުރެއްވި މަޝްވަރާތަކަށް ފަހު އެވެ.

ޕާކިސްތާނުގައި 1979 އިން ފެށިގެން އަފްގާނިސްތާނުގެ ރެފިއުޖީން އަންނަނީ އުޅެމުންނެވެ. އަދި 2021 ގައި ތާލިބާނުން އަފްގާނިސްތާނުގެ ވެރިކަމަށް އައުމާ ގުޅިގެން އެ ގައުމުން 800،000 އެއްހާ މީހުން ވަނީ ޕާކިސްތާނަށް ހިޖުރަކޮށްފަ އެވެ.

ޕާކިސްތާނަށް އެކި ދުވަސްވަރު ބަދަލުވި އަފްގާންނިސްތާނު ރެފިއުޖީންގެ ތެރެއިން ބައެއް މީހުން އެނބުރި އަމިއްލަ ވަޒަނަށް ބަދަލުވެފައިވާއިރު، ބައެއް މީހުން ޑީޕޯޓުވެސް ކޮށްލަފައިވެ އެވެ.