ކައުންސިލްތަކަށްވުރެ ސަރުކާރުގެ ސައިޒު ބޮޑުވުމުން ކުރީގެ ނައިބު ރައީސް ޑރ. މުހައްމަދު ޖަމީލް ކަންބޮޑުވުން ފާޅުކުރައްވައިފި އެވެ.

ކައުންސިލްތަކުގެ ސައިޒު ކުޑަކޮށް، ރިޔާސީ އިންތިހާބާއި ރައްޔިތުންގެ މަޖިލީސްގެ އިންތިހާބު އެއްކޮށް ބާއްވަން ބޭނުންވެވަޑައިގަންނަވާ ކަމަށާއި ކައުންސިލުތަކުގެ ސައިޒު ކުޑަ ކުރުމުން އޭގެ ފައިދާ ރައްޔިތުންނަށް ފެންނާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވި އެވެ.

ރައީސް މުއިއްޒު މިހެން ވިދާޅުވުމާއެކު އެކަމަށް ކައުންސިލުތަކާއި، އިދިކޮޅު ޕާޓީތަކުގެ އިތުރުން އާންމު ރައްޔިތުން ވެސް އަންނަނީ ވަރަށް ބޮޑަށް ހިތްހަމަ ނުޖެހުން ފާޅުކުރަމުންނެވެ. ރައީސްގެ ވާހަކަފުޅަށް ފާޑުކިޔާ ފަރާތްތަކުން ބުނަނީ ކައުންސިލުތަކުގެ ބާރު ކުޑަވާގޮތަށް ސައިޒު ކުޑަކުރުން ބަލައި ނުގަންނާނެ ކަމަށެވެ.

އެކަމާ ގުޅިގެން ޖަމީލް "އަދަދު" އާ ވާހަކަ ދައްކަވަމުން ވިދާޅުވީ ރައީސް ޑރ. މުހައްމަދު މުއިއްޒަށް ސަރުކާރު ހިންގަވަން ނޭނގޭ ކަމަށާއި ކައުންސިލްތަކުގެ އަދަދު ބޮޑުވެގެން އެކަމާ ކަންބޮޑުވުމަށްވުރެ، ސަރުކާރުގެ އިސް ވަޒީފާތަކުގައި ތިބި މީހުންގެ އަދަދު ގިނަވެގެން އެކަމާ ކަންބޮޑުވާން ރަނގަޅު ކަމަށެވެ.

"ކުޑަކުޑަ ގައުމެއްގައި ސަރުކާރު ބޮޑުވެގެން މިއުޅެނީ ކީއްވެގެންތޯ. ކީއްވެތޯ ސަރުކާރު ކުޑަ ނުކުރެވިގެން މިއުޅެނީ. ސަރުކާރުގައި ބައިވަރު ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުން އެބަތިބި. އިށީންނާނެ ގޮނޑި ނެތް ބޭފުޅުން ވެސް އެބަތިބި. އެމީހުން ކުރަން ޖެހޭ މަސައްކަތް ނޭގޭ މީހުން ވެސް އެބަ ތިބި،" އޭނާ ވިދާޅުވި އެވެ.

މަޖިލީހުގެ މެޖޯރިޓީ ލިބުމަކީ ރާއްޖޭގެ މުޅި އިންސްޓިޓިއުޝަންއަށް ބަދަލު ގެނައުން ނޫން ކަމަށާއި، ރިޔާސީ އިންތިހާބުގައި މިފަދަ އެއްވެސް ވާހަކައެއް ނުދައްކާ ކުއްލިއަކަށް މިފަދަ ވާހަކަތައް ދެއްކުމުން ސުވާލު އުފެދޭ ކަމަށް ވެސް އޭނާ ވިދާޅުވި އެވެ.

ޖަމީލު ވިދާޅުވީ ރައްޔިތުންގެ މަސްލަހަތާ ގުޅޭ ބޮޑެތި މައްސަލަތަކުގައި ރައްޔިތުންގެ ފެންނަ ނުފެންނަ ވޯޓެއް ނަގަން ޖެހޭ ކަމަށާއި އެއީ މުޅި ދުނިޔޭގައި ވެސް އެކަން ކުރަމުން އަންނަ ގޮތް ކަމަށެވެ.

"ޔޫކޭ އާއި ތަންތަނުގައި ވެސް ބޮޑެތި އިޝޫތަކުގައި އެއަށް ސްޕެސިފިކަލީ ވޯޓަށް ވަޑައިގެން މެންޑޭޓް ހޯއްދަވަން ޖެހެނީ. ރައްޔިތުން މެންޑޭޓް ދީފައި މިއޮތީ އެކަން ކުރުމަކަށް ނޫން. އެހެންވީމަ އެ މެންޑޭޓް ހޯއްދަވަން ހަމަ އެ އިޝޫގައި ރައްޔިތުން އަރިހަށް ވަޑައިގެން ވޯޓު ހޯއްދަވަނީ. ނަމަވެސް މިވަގުތު އެ މެންޑޭޓެއް ނެތް އެކަން ކުރުމަށް،" ޖަމީލް ވިދާޅުވި އެވެ.

ރާއްޖޭގައި ކައުންސިލުތަކުގެ ގާނޫނު ވުޖޫދުވި ފަހުން، އެ ގާނޫނަށް މިހާތަނަށް ވެސް އިސްލާހުތައް ގެނެސްފައި ވަނީ އެ ގަނޫނު ހަރުދަނާ ކުރުމަށްކަން ފާހަގަކުރައްވާ އޭނާ ވިދާޅުވީ އަދަދުތަކަށް ބަދަލު ގެނެވޭނީ ރައްޔިތުންގެ ބަހެއް ހޯދައިގެން ކަމަށެވެ.