ފްރޭންކްފާޓް (ޖޫން 26) - ޔޫރޯ ފުޓްބޯޅަ މުބާރާތުގައި މިރޭ ސްލޮވާކިއާއާ ދެކޮޅަށް ނުކުންނައިރު، ރުމޭނިއާގެ އަމާޒަކީ މި މެޗުން މޮޅުވެ، މި ގްރޫޕްގެ އެއް ވަނަ ޓީމުގެ ގޮތުގައި ނޮކައުޓް ބުރަށް ދިއުން ކަމަށް ރުމޭނިއާގެ ކޯޗު، އެޑްވާޑް އިއޮޑަނެސްކޫ ބުނެފި އެވެ.

ޔޫރޯ ގްރޫޕް އީ އަކީ މި ވަގުުތު އެންމެ ފޯރިގަދަކޮށް އޮތް ގްރޫޕެވެ. ކޮންމެ ޓީމެއް ވެސް ދެ މެޗު ކުޅެފައިވާއިރު، ހުރިހާ ޓީމަކަށް ވެސް ޕޮއިންޓް ލިބިފައިވަނީ އެއްވަރަށެވެ. އެ ގޮތުން އެއް ވަނައިގައި އޮތް ރުމޭނިއާ އާއި ދެ ވަނައިގައި އޮތް ބެލްޖިއަމް އާއި ތިން ވަނައިގައި އޮތް ސްލޮވާކިއާ އަދި ހަތަރެއްގައި އޮތް ޔޫކްރެއިނަށް ވަނީ ތިން ޕޮއިންޓް ލިބިފަ އެވެ.

ރުމޭނިއާ އިން ފުރަތަމަ މެޗުގައި 3-0 އިން ޔޫކްރެއިން ބަލިކުރި ނަމަވެސް ދެ ވަނަ މެޗުގައި ވަނީ ބެލްޖިއަމް އަތުން 2-0 އިން ބަލިވެފަ އެވެ.

އިއޮޑަނެސްކޫ ބުނީ ދެ ވަނަ މެޗުގައި ބެލްޖިއަމާ އެކު ކަންތައްތައް ދިމާވި ގޮތް ދެނެގަނެ، ރަނގަޅު ކުރަން ޖެހޭ ކަންކަމަށް ސަމާލުކަން ދީގެން ފަހު މެޗަށް ތައްޔާރުވެފައިވާ ކަމަށެެވެ.

"އަހަރެމެން ބޭނުން މި ގްރޫޕް ކާމިޔާބުުކުރަން. އަހަރެމެން މި ގްރޫޕް ކާމިޔާބުކޮށްފިނަމަ ތިއޮރެޓިކަލީ އެބައޮތް ކޮންމެ ވެސް ވަރެއްގެ އެޑްވާންޓޭޖެއް. މިސާލަކަށް އަރާމްކުރާ ލިބޭ ދުވަސް އިތުރުވުމާއި އިދިކޮޅަށް ޖެހޭ ޓީމުތަކުގެ ގޮތުން،" އިއޮޑަނެސްކޫ ބުންޏެވެ.

އެކަމަކު، އެންމެ ބޮޑަށް ޓާގެޓް ކަނޑައަޅާފައިވަނީ، ނޮކައުޓް ބުރުން ފުރުސަތު ހޯދުމަށް ކަމަށާއި ދެން އިތުރަށް ޓާގެޓަކަށް ވާސިލްވުމަކީ ބޯނަހެއްގެ ގޮތުގައި އިއޮޑަނެސްކޫ ދެކެ އެވެ.

ރުމޭނިއާ އިން ފަސް ފަހަރު ޔޫރޯގައި ކުޅެފައިވާއިރު، ގްރޫޕް ސްޓޭޖު ފަހަނައަޅައި ދެވުނީ 2000 ވަނަ އަހަރުގެ މުބާރާތުގަ އެވެ.

ސްލޮވާކިއާއާ ދެކޮޅަށް ކުޅުނު 11 މެޗުގެ ތެރެއިން ރުމޭނިއާ ބަލިވެފައިވަނީ އެންމެ މެޗަކުންނެވެ. ފަސް މެޗުން އެއްވަރުވިއިރު، ފަސް މެޗުން ވަނީ މޮޅުވެފަ އެވެ. މިރޭ މި ދެ ޓީމު ބައްދަލުކުރާ މެޗު ފަށާނީ 9 ޖަހާއިރު އެވެ.