ކެލެފޯނިއާ (25 ޖޫން) - ކޮޕަ އެމެރިކާ ފުޓުބޯޅަ ,މުބާރާތުގެ ގްރޫޕް ސްޓޭޖުގައި ބްރެޒިލުން ކުޅުނު ފުރަތަމަ މެޗުން އެ ޓީމު މޮޅުވިޔަ ނުދީ ކޮސްޓަ ރިކާ އިން ބްރެޒިލް ހިފަހައްޓައިފި އެވެ. ބްރެޒިލުން ގިނަ ހަމަލާތަކެއް އުފެއްދި މި މެޗު އެއްވަރުވީ 0-0 ގެ ނަތީޖާ އަކުންނެވެ.

މެޗު ފަށައިގެން ބްރެޒިލް އިން މެޗުގެ ކޮންޓްރޯލް ނަގާ ކޮސްޓަ ރިކާ ކޮޅަށް ގިނަ ހަމަލާތަކެއް އުފެއްދި އެވެ.

އެ ގޮތުން, މެޗުގެ 12 ވަނަ މިނެޓުގައި ބްރެޒިލްގެ ރޮޑްރީގޯ އަށް ވަނީ ލަނޑު ޖަހަން ރަނގަޅު ފުރުސަތެއް ލިބި ބޭކާރުވެފަ އެވެ. ކޮސްޓަ ރިކާގެ ތިން ކުޅުންތެރިން ކައިރިން ނައްޓާލުމަށް ފަހު, ރޮޑްރީގޯ ފޮނުވާލި ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.

އޭގެ ފަހުން، މެޗުގެ 22 ވަނަ މިނެޓުގައި ކައުންޓަ އެޓޭކުގައި, އޭރިއާ ބޭރުން ލޫކަސް ޕަކޭޓާ ފޮނުވާލި ހަމަލާ ވެސް ދިޔައީ ދަނޑި ކައިިރިން ބޭރަށެވެ. އޭގެ ދެ މިނެޓު ފަހުން ވިނީޝިއުސް އޭރިއާ ތެރެއަށް ހުސްކޮށްލި ބޯޅަ އެއް, މުޅިން ހުސްކޮށްހުރެ ރަފީނިއާ ފޮނުވާލި ނަމަވެސް ކޮސްޓަ ރިކާގެ ކީޕަރު ޕެޓްރިކް ސަކުއެރާ ވަނީ ހުށިޔާރުކަމާ އެކު ދިފާއުކޮށްފަ އެވެ.

ބްރެޒިލްގެ މާކުއީނިއޯސް މެޗުގެ 30 ވަނަ މިނެޓުގައި ގޯލު ޖެހި ނަމަވެސް ވީޑިއޯ އެސިސްޓެންޓް ރެފްރީ (ވީއޭއާރް) ބެލުމަށްފަހު, އޭގެ ކުރިން ރަފީނިއާ އޮފްސައިޑްގައި ހުރުމުން ރެފުރީ ވަނީ އެއީ ގޯލެއް ނޫން ކަމަށް ނިންމައިފަ އެވެ.

މެޗުގެ ފުރަތަމަ ހާފު ނިމުމުގެ ކުރިން ބްރެޒިލްގެ ރޮޑްރީގޯ, ކޮސްޓަ ރިކާ ކުޅުންތެރިއެއް ކައިރިން ނައްޓާލުމަށް ފަހު, އޭރިއާ ބޭރުން ފޮނުވާލި ބާރު ހަމަލާ ވެސް ދިޔައީ ގޯލުގެ ހުރަސް ދަނޑި ކައިރިން ބޭރަށެވެ.

ދެ ވަނަ ހާފު ފަށައިގެން ވެސް ބްރެޒިލުން ފެނުނީ މެޗުގެ ކޮންޓްރޯލް ނަގައި ކޮސްޓަ ރިކާ ހާފަށް ބާރުބޮޑު ކުރި މަންޒަރެވެ. މެޗުގެ 63 ވަނަ މިނެޓުގައި ޕަކޭޓާ އޭރިއާ ބޭރުން ފޮނުވާލި ބާރު ހަމަލާގެ ހުރަހަކަށްވީ ގޯލުގެ އަރިމަތި ދަނޑި އެވެ.

މެޗުގެ 78 ވަނަ މިނެޓުގައި ވެސް ބްރެޒިލުން ވަނީ އޭރިއާ ބޭރުން ގޯލެއް ޖެހޭތޯ މަސައްކަތް ކޮށްފަ އެވެ. އެ ގޮތުން ޖާއޯ ގޮމޭޒް ފޮނުވާލި ބާރު ހަމަލާ ކޮސްޓަ ރިކާގެ ކީޕަރު ސަކުއެރާ ވަނީ ދިފާއު ކޮށްފަ އެވެ.

މެޗުގެ އިތުރު ވަގުތުގައި ބްރެޒިލްގެ ބްރޫނޯ ގިމާރޭސް އޭރިއާ ތެރެއިން މުޅިން ހުހަށްހުރެ ފޮނުވާލި ބާރު ހަމަލާ ވެސް ގޯލާ އަމާޒުނުވެ ދިޔައީ ބޭރަށެވެ.