ޑަސެލްޑޯފް (ޖޫން 21) - ޔޫރޯ ފުޓްބޯޅަ މުބާރާތުގެ ގްރޫޕް ސްޓޭޖުގެ ދެ ވަނަ މެޗުގައި ފަހަތުން އަރައި 2-1 ގެ ނަތީޖާއަކުން ސްލޮވާކިއާ ބަލިކޮށް ޔޫކްރެއިން އިން ދެ ވަނަ ބުރުގެ ޖާގަ ކަށަވަރުކުރަން ހިތްވަރު ހޯދައިފި އެވެ.

މި މުބާރާތުގައި ޔޫކްރެއިން އިން ކުޅުނު ފުރަތަމަ މެޗުން ރޫމޭނިއާ އަތުން 3-0 ގެ ނަތީޖާ އަކުން ވަނީ ބަލިވެފަ އެވެ.

އެހެންވެ, މި މެޗަށް ޔޫކްރެއިނުން ނުކުތީ މޮޅުވުން ނޫން ގޮތެއް ނެތް ކަމަށް ދެކިގެންނެވެ.

މި މެޗުގެ 17 ވަނަ މިނެޓުގައި ސްލޮވާކިއާ އިން ވަނީ ގޯލެއް ޖަހައި ލީޑު ނަގައިފަ އެވެ. މި ގޯލު އެ ޓީމަށް ޖަހާދިނީ އިވާން ޝްރަންޒް އެވެ. މިއީ، ލޫކަސް ހަރާސްލިންގެ އެހީތެރިކަމާ އެކު ޝްރަންޒް ކާމިޔާބުކުރި ގޯލެކެވެ.

މުޅި މެޗުގައި ވެސް ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު, ދެ ވަނަ ހާފުގައި ޔޫކްރެއިން އިން ވަނީ އެ ޓީމުގެ އެޓޭކުތައް ވަރުގަދަ ކޮށް ސްލޮވާކިއާގެ ހާފަށް ބާރުބޮޑު ކޮށްފަ އެވެ.

އެ ގޮތުން، މެޗުގެ 54 ވަނަ މިނެޓުގައި ޔޫކްރެއިން އިން ވަނީ ނަތީޖާ ހަމަހަމަ ކޮށްފަ އެވެ. ޒިންޗެންކޯ ދިން ޕާހަކުން މި ގޯލު ޔޫކްރެއިން އަށް ކާމިޔާބު ކޮށްދިނީ މައިކޯލާ ޝަޕަރިންކޯ އެވެ.

ޔޫކްރެއިން އިން ލީޑު ނެގީ މެޗުގެ 80 ވަނަ މިނެޓުގައި ރޯމަން ޔުރަމްޗަކް ޖަހާދިން ގޯލުންނެވެ. މިއީ މެޗުގައި މޮޅު ކުޅުމެއް ދެއްކި ޝަޕަރިންކޯ ދިން ޕާހެއް ގޯލުގެ ތެރެއަށް ފޮނުވާލައިގެން ޔުރަމްޗަކް ޖަހާދިން ގޯލެކެވެ.

މި މޮޅާ އެކު ޔޫކްރެއިން ގްރޫޕްގެ ފަހު މެޗުގައި ނުކުންނާނީ ވަރުގަދަ ބެލްޖިއަމް އާ ދެކޮޅަށެވެ. މި މުބާރާތުގައި ބެލްޖިއަމް ކުޅުނު ފުރަތަމަ މެޗުގައި ސްލޮވާކިއާ އަތުން ވަނީ 1-0 ގެ ނަތީޖާ އަކުން ބަލިވެފަ އެވެ.