މިއުނިކް (ޖޫން 20) - ޔޫރޯ ފުޓްބޯޅަ މުބާރާތުގައި ރޭ އަލްބޭނިއާ އާއި ކްރޮއޭޝިއާ ބައްދަލުކުރި މެޗުގައި ސާބިއާއާ ދެކޮޅަށް އެ ދެ ޓީމުގެ ސަޕޯޓަރުން ފާޅުކުރި ޝުއުރޫތަކާ ގުޅިގެން ހިތްހަމަނުޖެހި، އެ ދެ ޓީމުގެ ސަޕޯޓަރުންނަށް ފިޔަވަޅު ނާޅައިފިނަމަ ޔޫރޯ އިން ވަކިވާނެކަމުގެ އިންޒާރު ސާބިއާ އިން ދީފި އެވެ.

ކްރޮއޭޝިއާ އާއި އަލްބޭނިއާ ރޭ 2-2 އިން އެއްވަރުވި މެޗުގައި މި ދެ ޓީމުގެ ސަޕޯޓަރުން ސާބިއާ މީހުން މެރުމަށް ގޮވައި، އަޑުގަދަކުރިއެވެ.

މިކަމާ ގުޅިގެން ސާބިއާގެ ފުޓްބޯލް ފެޑަރޭޝަންގެ ޖެނެރަލް ސެކްރެޓަރީ ޖޯވާން ސުރްބަޓޮވިޗް ވަނީ ކްރޮއޭޝިއާ އާއި އަލްބޭނިއާއާ ދެކޮޅަށް ހަރުކަށި ފިޔަވަޅު އެޅުމަށް ގޮވާލައިފަ އެވެ. އަދި ސާބިއާ މުބާރާތުން ވަކިވާންޖެހުނަސް، އެކަން ވެސް ކުރާނެ ކަމަށެވެ.

"އަހަރަމެން މި ގޮވާލަނީ ޔުއޭފާއަށް އެންމެ ހަރުކަށި ފިޔަވަޅު އަޅަން. ޔުއޭފާ އިން ފިޔަވަޅު އަޅާނެހެން ހީވަނީ. ފިޔަވަޅު ނާޅައިފިނަމަ، ދެން ކަންތައް ކުރަންޖެހޭ ގޮތް އަހަރަމެންނަށް އެނގޭ" ސުރްބަޓޮވިޗް ބުންޏެވެ.

ޔޫރޯގެ ގުރޫޕް ސީގައި ސާބިއާ ކުޅުނު ފުރަތަމަ މެޗުގައި އިންގްލެންޑް އަތުން ބަލިވީ 1-0 އިންނެވެ. އެ މެޗުގައި ސާބިއާގެ ސަޕޯޓަރުން ދަނޑަށް އެއްޗެހި އުކާފައިވާތީ، ޔުއޭފާ އިން ވަނީ އެ ޓީމު 12،250 ޕައުންޑުން ޖޫރިމަނާކޮށްްފަ އެވެ.