ހެމްބާގް (ޖޫން 19) - މި ފަހަރުގެ ޔޫރޯ ފުޓްބޯޅަ މުބާރާތުގައި އަލްބޭނިއާ ހިމެނިފައި އޮތީ ވަރަށް އުނދަގޫ ގްރޫޕެއްގައި ކަމަށާއި އެކަމަކު ފުރަތަމަ މެޗުގައި އިޓަލީއާ ދެކޮޅަށް ކުޅުނު މެޗުން ލިބުނު ހިތްވަރަށް ބަލާއިރު، މި މުބާރާތުގައި އަލްބޭނިއާ އަށް ހައިރާންކުރަނިވި ނަތީޖާއެއް ނެރެވިދާނެ ކަމަށް އެ ޓީމުގެ ކޯޗު ސިލްވީނިއޯ ބުނެފި އެވެ.

ޔޫރޯގެ ތާރީހުގައި ޖެހި އެންމެ އަވަސް ގޯލު ޖެހި ނަމަވެސް، އަލްބޭނިއާ ވަނީ އިޓަލީ އަތުން 2-1 އިން ބަލިވެފަ އެވެ.

ގްރޫޕް ސްޓޭޖުގެ ދެ ވަނަ މެޗުގައި، މިރޭ ކްރޮއޭޝިއާއާ ކުޅުމުގެ ކުރިން ބޭއްވި ނޫސްވެރިންގެ ބައްދަލުވުމުގައި ސިލްވީނިއޯ ބުނީ، ފުރަތަމަ މެޗުގައި އިޓަލީއާ ދެކޮޅަށް ދެއްކި ކުޅުމުން ގިނަ ކަންތައްތަކެއް ފެނިފައިވާ ކަމަށެެވެ.

"އަހަރެމެން ވަރަށް ރަނގަޅު މެޗެއް ކުޅުނީ، (އިޓަލީއާ ދެކޮޅަށް). އެންމެ ފަހު ވަގުތާ ޖެހެންދެން ވެސް ފުރުސަތު އޮތް އަހަރެމެންނަށް ނަތީޖާ ބަދަލުކޮށްލެެވެން، ވަރަށް ގިނަ ކަންކަން ދަސްވެގެންދިޔަ، އަހަރެމެންނަށް މި ގްރޫޕްގައި ކުރިއަށް މި އޮތީ ރަނގަޅު ފުރުސަތުތަކެއް ކަމަށް ދެކެނީ، މިއީ ވަރަށް އުނދަގޫ ގްރޫޕެއް، ވަރަށް ވަރުގަދަ މެޗުތަކެއް މި ޖެހެނީ، މީގެއިން ކޮންމެ ޓީމަކާ ކުޅެގެން އަހަރެމެން ކުރިއަރާނެ،" ސިލްވީނިއޯ ބުންޏެވެ.

"ފުޓްބޯޅައިގައި އޮންނަނީ މަސައްކަތްކުރުން، އޭގެއިން ހީނުކުރާ ފަދަ ނަތީޖާވެސް ނެރެވިދާނެ،"

ސިލްވީނިއޯ ބުނީ ފުރަތަމަ މެޗުގައި ސްޕެއިން އަތުން ކްރޮއޭޝިއާ ބަލިވި މެޗު ރަނގަޅަށް ދިރާސާކޮށްފައިވާނެ ކަމަށެވެ. އަދި ކްރޮއޭޝިއާ އަކީ ތަރިން ގިނަ ޓީމެއް ކަމަށާއި ރަނގަޅު ލެވަލްގެ ގިނަ ތަޖުރިބާހުރި ކުޅުންތެރިން އެބަތިބި ކަމަށެވެ.

"އިޓަލީ އަށް ވެސް އިހުތިރާމް ދީގެން އަހަރެމެން ކުޅުނީ، ކްރޮއޭޝިއާ އަށް ވެސް ދޭނަން. އެކަމަކު، އަހަރެން ދެކޭގޮތުގައި މި މެޗުގައި އަހަރެމެންނަށް އެޓޭކް ކުރަން ގިނަ ފުރުސަތު ލިބޭނެ،" ސިލްވީނިއޯ ބުންޏެވެ.

މިއީ އަލްބޭނިއާ އިން ޔޫރޯގައި ކުޅޭ ދެ ވަނަ ފަހަރެވެ. ފުރަތަމަ ފަހަރު 2016 ވަނަ އަހަރުގެ ޔޫރޯގައި ގްރޫޕް ސްޓޭޖުން ކެޓިއިރު، ފަހު މެޗުން ވަނީ 1-0 އިން ރުމޭނިއާ ބަލިކޮށްފަ އެވެ. ސިލްވީނިއޯ ހުރީ އެ ކާމިޔާބަށް ވުރެ ތާރީހީ ކަމެއް ހާސިލްކުރުމުގެ އުންމީދުގަ އެވެ.

އަލްބޭނިއާ އާއި ކްރޮއޭޝިއާ ކުޅޭ މެޗު ފަށާނީ މިރޭ 6 ޖަހާއިރު އެވެ.