ޑަސެލްޑޯފް (ޖޫން 17) - ފްރާންސަކީ މި ފަހަރުގެ ޔޫރޯ ފުޓްބޯޅަ މުބާރާތުގެ ފޭވަރިޓުންގެ ގޮތުގައި ވެސް ފާހަގަކޮށްލެވޭ ޓީމެއް. އެހެންވެ އެ ޓީމަށް ދޭން ޖެހޭ އިހުތިރާމް ދޭނެ ކަމަށް އޮސްޓްރިއާ ކޯޗު ރަންގްނިކް ބުނެފި އެވެ.

އެހެން ނަމަވެސް، އޭނާ އޮސްޓްރިއާ ކޯޗުކަމާ މީގެ ދެ އަހަރު ކުރިން ހަވާލުވިއިރު ވެސް ޓާގްޓްތަކެއް ކަނޑައެޅި ކަމަށާއި އޭގެ ތެެރެއިން އެންމެ ބޮޑު ކަމަކީ މި ފަހަރުގެ ޔޫރޯގައި ނަތީޖާ ރަނގަޅުކުރުން ކަމަށްވާއިރު، އެ އަމާޒަށް ވާސިލްވާން ކުރާ މަސައްކަތުގައި އެއްވެސް ޓީމެއްގެ ދެކެ ޖެހިލުންނުވާނެ ކަމަށް ވަނީ ބުނެފަ އެވެ.

ބަޔާން މިއުނިކްގެ ކޯޗުކަން ރަންގްނިކް އަށް މިދިޔަ މަހު ހުށަހެޅި އެެވެ. އެހެން ނަމަވެސް، އޭނާ ނިންމީ އޮސްޓްރިއާ ކޯޗުގެ މަގާމުގައި ދެމިހުންނާށެވެ. އެއީ އެ ޓީމާ އެކު ފެށި ޕްރޮޖެކްޓާ މެދު އުންމީދު އޮތުމުންނެވެ.

"ވަރަށް ދިގު ކޮލިފައިން ބުރެއް ނިންމާލިއިރު، އަހަރެމެންނަށް ތިބެވުނީ ވަރަށް ހިތްހަމަޖެހޭ ހިސާބަކަށް އާދެވިފައި. ދެން އޮތީ، ޝައުގުވެރިކަމާ އެކު، ބުރަ މަސައްކަތެއް ކޮށްގެން އަހަރެމެން ދާން ބޭނުންވާ މިސްރާބަށް ދިއުން،" ރަންގްނިކް ބުންޏެވެ.

"އަމާޒަކީ ނޮކައުޓް ބުރަށް ދިއުން،"

ރަންގްނިކް ބުނީ، ފުރަތަމަ މެޗުގައި ފްރާންސާ ދެކޮޅަށް ކުޅެން ޖެހުމަކީ އެއްގޮތަކުން އެ ޓީމަށް ފައިދާއެއް ކަމަށެވެ. އެއީ މުބާރާތުގެ އެންމެ ބޮޑު އެއް ފޭވަރިޓާ ކުޅެެގެން، މުބާރާތް ފަށާއިރު ޓީމު ވަޒަންކޮށްލަން ލިބޭނެތީ އެވެ.

"ފްރާންސަށް އިހުތިރާމްކުރަން، އެ ޓީމަކީ އެންމެ ފަހުގެ ވޯލްޑް ކަޕްގެ ރަނަރަޕް، އެންމެ ވަރުގަދަ ފޯވާޑް ލައިނެއް އޮތް އެއް ޓީމު. މިއީ ހައްތަހާވެސް ފްރާންސަށް އޮތް އެޑްވާންޓޭޖް، އެކަަމަކު، އަހަރެމެން ޖެހިލުންވާން ޖެހޭ ސަބަބެއް ނޫން މިއީ. އަހަރެމެންނަށް ވެސް ޕްލޭނަކާ އެކު މަސައްކަތް ކުރެވިދާނެ،" ޖަރުމަނު ފުޓްބޯޅައިގައި ވެސް މަސައްކަތްކޮށްފައިވާ ރަންގްނިކް ބުންޏެވެ.

ރަންގްނިކް ވަނީ ފްރާންސް އިން ކްރިސްޓަލް ޕެލަސްގެ ވިންގް، މައިކަލް އޮލީސޭ ނުނެގުމުން އެކަމާ ސުވާލު އުފައްދައިފަ އެވެ. އޮސްޓްރިއާ އަށް އޮތް އެންމެ ބޮޑު ހީނަރުކަމަކީ، އެ ޓީމުގެ ތަރި ޑޭވިޑް އަލަބާ އަށް އަނިޔާގެ ސަބަބުން މި ފަހަރުގެ މުބާރާތް ގެއްލުމެވެ.

އޮސްޓްރިއާ އާއި ފްރާންސް ވަނީ 25 ފަހަރު ބައްދަލުކޮށްފަ އެވެ. ފްރާންުސުން 13 މެޗު ކާމިޔާބުކުރިއިރު، އޮސްޓްރިއާ އިން ނުވަ މެޗުން މޮޅުވި އެވެ. އަނެއް ތިން މެޗު ނިމުނީ އެއްވަރުވެގެންނެވެ.

މިރޭ މި ދެ ޓީމު ކުޅޭ މެޗު ފަށާނީ 12 ޖަހާއިރު އެވެ.