މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހިންގާ ރާއްޖޭގެ މައި ވިޔަފާރި ބަނދަރު ފިލިޕީންސްގެ ކުންފުންޏަކަށް 25 އަހަރަށް ދިނުމަށް މަޝްވަރާ ކުރުމުގެ ގޮތުން އެމްއޯޔޫއެއްގައި ސޮއިކޮށްފައިވާކަން "އަދަދު" ނޫހަށް މައުލޫމާތު ލިބިއްޖެ އެވެ.

އިތުބާރު ހިފޭ މަސްދަރަކުން "އަދަދު" ނޫހަށް މައުލޫމާތު ދިން ގޮތުގައި މި އެމްއޯޔޫގައި ސޮއިކުރީ މީގެ ތިން މަހެއްހާ ދުވަސް ކުރިންނެވެ. އަދި, އެ އެމްއޯޔޫގެ މުއްދަތު މި މަހުގެ 28 ވަނަ ދުވަހަށް ހަމަވާކަން ވެސް ވަނީ އެނގިފަ އެވެ.

މި ނޫހަށް ލިބިފައި ހުރި މައުލޫމާތުތަކުން އެނގޭ ގޮތުގައި އެމްޕީއެލްއަށް ބޮޑު ގެއްލުމެއް ވެދާނެ ފަދަ ގޮތަކަށް ސޮއިކުރި އަގު ބޮޑު އެމްއޯޔޫއެކެވެ. އެގޮތުން, ވިޔަފާރި ބަނދަރު ހަވާލުކުރުމުގެ އެއްބަސްވުމަކަށް ފިލިޕީންސްގެ ކުންފުންޏާ އެކު އެމްޕީއެލްއިން ނުގޮސްފިނަމަ ފަސް މިލިއަން ޑޮލަރު ދައްކަން ޖެހޭކަން ވެސް "އަދަދު" ނޫހަށް ވަނީ މައުލޫމާތު ލިބިފަ އެވެ.

އޭގެ އިތުރުން, ތިލަފުށީގައި ތަރައްގީކުރާ ވިޔަފާރި ބަނދަރު ވެސް 25 އަހަރު ދުވަހަށް ފިލިޕީންސްގެ ކުންފުނިން ހިންގުމަށް އެއްކޮށް ދޫކޮށްލުމަށް މަޝްވަރާ ކުރަމުންދާކަން ވެސް ވަނީ އެނގިފަ އެވެ.

އެގޮތަށް އެއްބަސްވެއްޖެނަމަ އެ މުއްދަތުގެ ތެރޭގައި ވިޔަފާރި ބަނދަރުގެ ފައިދާގެ 98 ޕަސެންޓު އެ ކުންފުންޏަށް ލިބޭއިރު ދިވެހި ސަރުކާރަށް ލިބޭނީ އެންމެ ދެ ޕަސެންޓުކަން ވެސް ވަނީ އެނގިފަ އެވެ. އަދި, ވިޔަފާރި ބަނދަރު ތަރައްގީ ކުރުމަށް ބޭނުންވާ ފައިސާ ސަރުކާރަށް ހަމަޖައްސައިދެނީ އެ ކުންފުނި މެދުވެރިކޮށް ނަގާ ލޯނަކުންކަން ވެސް ވަނީ އެނގިފަ އެވެ.

މިހާ ބޮޑު އާމްދަނީއެއް ދޫކޮށްލާ ގޮތަށް ޕޯޓާ ގުޅޭ މަޝްވަރާތައް ކުރިއަށްދާއިރު، އެމްޕީއެލްއަކީ ލޯނެއް ނަގައިގެން އެފަދަ މަސައްކަތެއް ކުރިއަށްގެންދިޔުމުގެ ގާބިލުކަން ހުރި ކުންފުންޏެކެވެ.

ނަން ނުޖެހުމަށް ޝަރުތުކޮށް ވާހަކަ ދެއްކި އެމްޕީއެލްގެ ބައެއް އޮފިޝަލުން ވިދާޅުވި ގޮތުގައި މިއީ ވަރަށް ބޮޑު ގެއްލުމެއް އެ ކުންފުންޏަށް ލިބިގެންދާނެ ކަމެކެވެ. އެ ކުންފުނީގެ ބައެއް އޮފިޝަލުން މިކަމާ ދެކޮޅު ނަމަވެސް ސަރުކާރުގެ ތެރެއިން އިކޮނޮމިކް ކައުންސިލުން މި އެއްބަސްވުމަށް ދިޔުމަށް މަސައްކަތް ކުރަމުންދާކަން ވަނީ އެނގިފަ އެވެ.

އެމްޕީއެލްއިން އެންމެފަހުން އާންމުކުރީ 2022 ގެ އަހަރީ ރިޕޯޓެވެ. އެ ރިޕޯޓުން އެނގޭ ގޮތުގައި އަހަރަކު 119,000 އަށްވުރެ ގިނަ ކޮންޓެއިނަރު އެ ކުންފުނިން ހޭންޑްލްް ކުރިއިރު ސާފު ފައިދާގެ ގޮތުގައި 112.6 މިލިއަން ރުފިޔާ ލިބިފައިވެ އެވެ.