ޖިނާއީ ކުށްތަކާ ދެކޮޅަށް ގާނޫނީ ގޮތުން ކުރާ މަސައްކަތްތަކުގައި އެއް ގައުމުން އަނެއް ގައުމަށް އެހީތެރިކަން ފޯރުކޮށްދިނުމަށް އަވައްޓެރި ސްރީލަންކާއާ ދެމެދު އެއްބަސްވުމެއްގައި ސޮއި ކުރުމަށް ރުހުން ހޯދަން ރައްޔިތުންގެ މަޖިލީހަށް ހުށަހެޅުމަށް ރައީސް ޑރ. މުހައްމަދު މުއިއްޒު ނިންމަވައިފި އެވެ.

ރައީސް އޮފީހުން ބުނީ އެ ނިންމެވުން ރައީސް ނިންމެވީ މިއަދު ބޭއްވި ވަޒީރުންގެ މަޖިލީހަށް ހާރިޖީ ވުޒާރާއިން ހުށަހެޅި ކަރުދާހަކާ ގުޅޭގޮތުން މަޝްވަރާ ކުރެއްވުމަށްފަހުގައި ކަމަށެވެ.

"ޓްރީޓީ ބިޓްވީން ދަ ގަވަމެންޓު އޮފް ދަ ރިޕަބްލިކް އޮފް މޯލްޑިވްސް އެންޑް ދަ ގަވަމެންޓް އޮފް ދަ ޑިމޮކްރެޓިކް ސޯޝަލިސްޓް ރިޕަބްލިކް އޮފް ސްރީލަންކާ އޮން މިއުޗުއަލް ލީގަލް އެސިސްޓެންސް އިން ކްރިމިނަލް މެޓާސް" ގެ ދަށުން އެގައުމެއްގެ ގާނޫނުތަކާއި ގަވާއިދުތަކާ އެއްގޮތް ވާގޮތުގެ މަތިން، އެއްބަސްވުމާއި ހިލާފު ނުވާނޭހެން ދެވެން އޮތް އެންމެ ފުޅާ ދާއިރާއެއްގައި ޖީނާއީ މައްސަލަތަކުގައި ދެގައުމުން ވެސް އެއް ގައުމުން އަނެއް ގައުމަށް އެހީތެރިކަން ދޭން ޖެހޭނެ އެވެ.

އެ އެއްބަސްވުމުގެ ސަބަބުން ދެ ގައުމުގެ ދެމެދުގައި އޮތް ޒަމާންވީ ގުޅުން އިތުރަށް ވަރުގަދަވެގެންދާނެ ކަމަށް ރައީސް އޮފީހުން ބުނެ އެވެ.

ސްރީލަންކާއާއި ރާއްޖެއާ ދެމެދު ލީގަލް އެސިސްޓެންސް އެއްބަސްވުމެއްގައި ސޮއި ކުރުމުގެ އަމަލީ މަސައްކަތް ފެށީ ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ.