ފަލަސްތީނަށް ދުނިޔޭގެ ސިއްހަތާބެހޭ މައި ޖަމިއްޔާ (ޑަބްލިއުއެޗްއޯ) ގެ މެންބަރުކަން ވޯޓު ނުދެވޭ ގޮތަށް ދޭން ފާސްކޮށްފި އެވެ.

އދ. އާންމު މަޖިލީހުގއި ޑަބްލިއުއެޗްއޯގެ ފުރިހަމަ މެންބަރުކަން ފަލަސްތީނަށް ދިނުމަށް މެންބަރު 101 ގައުމަކުން ވޯޓު ލީ އިރު، ފަސް ގައުމަކުން ވަނީ ދެކޮޅަށް ވޯޓު ދިނެވެ.

މީގެއިތުރުން ޑަބްލިއުއެޗްއޯގެ 21 މެންބަރު ގައުމަކުން މި ވޯޓުގައި ބައިވެރިވެފައެއް ނުވެ އެވެ

މި ނިންމުމާއެކު ފަލަސްތީނަށް އެހެން ގައުމުތަކާ އެއްގޮތަށް ހުރިހާ ހައްގެއް ލިބޭއިރު، ހަމައެކަނި ނުލިބޭ ހައްގަކީ ވޯޓު ދިނުމުގެ ހައްގެވެ. ވޯޓު ދެވޭނީ ފުރިހަމަ މެންބަރު ގައުމުތަކަށް އެކަނި އެވެ.

ފަލަސްތީނަކީ ފުރިހަމަ މިނިވަންކަން ލިބިގެންވާ ގައުމެއް ކަމަށް ބާބަޑޯސް، ބަހާމާސް، އަޔަލޭންޑް، ޖަމައިކާ، ނޯވޭ، ސްޕެއިން އަދި ޓްރިނިޑާޑް އެންޑް ޓޮބާގޯއިން ވަނީ ދާދި ފަހުން ނިންމާފަ އެވެ.

މީގެއިތުރުން ދުނިޔޭގެ އެކި ގައުމުތަކުން އަންނަނީ ފަލަސްތީނަކީ މިނިވަން ދައުލަތެއް ގޮތުގައި ބަލައިގަތުމަށް ކުރަން ޖެހޭ މަސައްކަތް ކުރަމުންނެވެ. މިގޮތުން ގާނޫނު ހަދާ މަޖިލީހަށް ހުށަހަޅައިގެން ވެސް ގައުމުތަކުން އަންނަނީ އެކަމަށް ގޮތެއް ނިންމަން މަސައްކަތް ކުރަމުންނެވެ.

ފަލަސްތީނަށް އދ. ގެ ފުރިހަމަ މެމްބަރުކަން ދޭން މެއި 10، ގައި 143 މެންބަރު ގައުމެއްގެ ވޯޓާއެކު ނިންމާފައިވާއިރު، ނުވަ ގައުމަކުން ދެކޮޅަށް ވޯޓު ވަނީ ދީފަ އެވެ. އަދި 25 ގައުމަކުން އެއްވެސް ކޮޅަކަށް ވޯޓު ނުދެ އެވެ.

އިޒްރޭލުން ފަލަސްތީނުގައި ހިންގަމުންދާ ގަތުލުއާންމުގައި މިހާތަނަށް 36،000 އަށްވުރެ ގިނަ މީހުން ވަނީ މަރުވެފަ އެވެ. އަދި ގަތުލްއާންމު ހުއްޓާލަން އިޒްރޭލަށް ވަނީ އެއްބަސްވުމެއް ވެސް މިހާރު ހުށަހަލާފަ އެވެ.