‍ޔޫރަޕިއަން ޔޫނިއަން (އީޔޫ)ގެ އިސް އޮފިޝަލުންނާއި ދިވެހި ސަރުކާރާއި ދެމެދު ބާއްވާ ސިލްސިލާ މަޝްވަރާ ބައްދަލުވުންތަކުގެ ފަސްވަނަ ބައްދަލުވުން މާދަމާ ބާއްވާނެ ކަމަށް ފޮރިން މިނިސްޓްރީން ބުނެފި އެވެ.

ފޮރިން މިނިސްޓްރީން މިއަދު ނެރުނު ބަޔާނެއްގައިވާ ގޮތުން އެ ބައްދަލުވުމުގެ މައިގަނޑު މަގުސަދަކީ ރާއްޖެއާ އީޔޫ އާ ދެމެދު އޮންނަ ގުޅުން ބަދެހިކޮށް، އެކުގައި މަސައްކަތް ކުރުމުގެ ފުރުސަތުތައް ދެނެގަތުމެވެ.

އެ ބައްދަލުވުމުގައި ރާއްޖެ ތަމްސީލްކުރާ ވަފުދުގެ އިސް ބޭފުޅަކީ ފޮރިން ސެކްރެޓަރީ ފާތިމަތު އިނާޔާ އެވެ. އަދި ޔޫރަޕިއަން ޔޫނިއަންގެ ވަފުދުގެ އިސް ވެރިއަކަށް ހުންނަވާނީ ޔޫރަޕިއަން އެކްސްޓާނަލް އެކްޝަން ސާވިސްގެ އޭޝިއާ އެންޑް ޕެސިފިކް ޑިޕާޓްމަންޓުގެ ޑެޕިއުޓީ މެނޭޖިން ޑިރެކްޓަރު ޕައޮލާ ޕަމްޕަލޯނީ އެވެ.

އެ ބައްދަލުވުމުގެ އެޖެންޑާގައި ހިމެނޭ ކަންކަމުގެ ތެރޭގައި ޝަރުއީ ދާއިރާގެ އިސްލާހުތަކާއި، ސަލާމަތާ ގުޅުން ހުރި ކަންކަމުގެ އިތުރުން ޑިމޮކްރެޓިކް އިސްލާހުތަކާއި މޫސުމީ ބަދަލުތައް ހިމެނެ އެވެ.

ފޮރިން މިނިސްޓްރީގެ އިތުރުން، ރައީސް އޮފީހާ ފިނޭންސް މިނިސްޓްރީ، އިކޮނޮމިކް މިނިސްޓްރީ، ފިޝަރީޒް މިނިސްޓްރީ، އެޓާނީ ޖެނެރަލް އޮފީސް، އެންވަޔަރަމަންޓް މިނިސްޓްރީ، ނެޝަނަލް ކައުންޓަ ޓެރަރިޒަމް ސެންޓާ، އެމްއެންޑީއެފް، އަދި ފުލުހުންގެ މަންދޫބުން މި ބައްދަލުވުމުގައި ބައިވެރިވުމަށް ވަނީ ހަމަޖެހިފަ އެވެ.