ރަސްމީ ދަތުރުފުޅެއްގައި ފޮރިން މިނިސްޓަރު މޫސާ ޒަމީރު ކުރިއަށް އޮތް ޖޫން މަހުގެ ތިނެއްގައި އަވަށްޓެރި ލަންކާއަށް ވަޑައިގަންވަން ހަމަޖެހިފައިވާ ކަމަށް ފޮރިން މިނިސްޓްރީން ބުނެފި އެވެ.

ހާރިޖީ ވުޒާރާއިން މިއަދު ބުނި ގޮތުގައި ޒަމީރު، ލަންކާގެ ވެރިރަށް ކޮލަމްބޯއަށް ކުރައްވާ މި ދަތުރު ނިންމަވާލައްވާނީ ޖޫން ހައެއްގަ އެވެ. މިއީ ލަންކާގެ ފޮރިން މިނިސްޓަރު އަލީ ސަބްރީގެ ދައުވަތަކަށް ކުރައްވާ ދަތުރެއް ކަމަށްވެސް މިނިސްޓްރީން ބުންޏެވެ.

މި ދަތުރުގައި މިނިސްޓަރު ޒަމީރު ލަންކާ ސަރުކާރުގެ އިސް ބޭފުޅުންނާ ބައްދަލުކުރައްވާ ދެ ގައުމުގެ ދެމެދުގައި މަޝްވަރާތައް ކުރިއަށް ގެންދިއުމަށް ވަނީ ހަމަޖެހިފަ އެވެ.

އެގޮތުން ލަންކާގެ ރައީސް ރަނިލް ވިކްރަމަސިންގްހެ އާއި ބޮޑުވަޒީރު ޑިނޭޝް ގުނަވަރދެނާ ގެ އިތުރުން ފޮރިން މިނިސްޓަރު ސަބްރީއާވެސް ޒަމީރު ބައްދަލުކުރައްވާނެ އެވެ.

"ރަސްމީ ވާހަކަތަކުގެ ތެރޭގައި ދިވެހިރާއްޖެއާއި ސްރީލަންކާއާއި ދެމެދު އޮތް ޒަމާންވީ ގުޅުން ހަރުދަނާ ކުރުމުގެ މަޝްވަރާތައް ކުރިއަށްދާނެ އަދި މީގެ އިތުރުން ސްރީލަންކާގައި ދިރިއުޅޭ ދިވެހި ރައްޔިތުންނަށް ލުއިފަސޭހަ ގޮތްތައް ހޯދާ ދިނުމާ ގުޅޭގޮތުން މަޝްވަރާކުރުމަށްވަނީ ހަމަޖެހިފައި," ފޮރިން މިނިސްޓްރީން ދިން މައުލޫމާތުގެ މެސެޖުގައި ބުނެފައިވެ އެވެ.

މިއީ ފޮރިން މިނިސްޓަރު ލަންކާއަށް ކުރައްވާ ފުރަތަމަ ދަތުރެވެ. މީގެ ކުރިން ޓްރާންސްޕޯޓް މިނިސްޓަރު މުހައްމަދު އަމީން ލަންކާއަށް ވަޑައިގެންނެވި އެވެ. ވެރިކަމާ ހަވާލުވެވަޑައިގެންނެވި ފަހުން ރައީސް މުއިއްޒު ލަންކާއަށް ވަޑައެއް ނުގަންނަވަ އެވެ.