ވިހިވަނަ ރައްޔިތުންގެ މަޖިލީހުގެ މައިނޯރިޓީ ޕާޓީ އަދި އިދިކޮޅު ޕާޓީ އެމްޑީޕީގެ ޕާލިމެންޓްރީ ގްރޫޕްގެ ލީޑަރަކަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް އިންތިހާބުކޮށްފި އެވެ.

މާދަމާ ހުވާކުރާ މަޖިލީހުގައި 93 މެންބަރުން ތިއްބަވާއިރު އެމްޑީޕީ ތަމްސީލްކުރައްވާނީ އެންމެ 12 މެންބަރުންނެވެ. ޕާލިމެންޓްރީ ގްރޫޕުގެ ލީޑާޝިޕަށް އެއިން އަށް މެންބަރަކު މިއަދު އިންތިހާބުކޮށްފައިވެ އެވެ.

ޕާލިމެންޓްރީ ގްރޫޕްގެ ލީޑަރަކަށް ނާޒިލް އިންތިހާބު ކުރިއިރު ޑެޕިއުޓީ ލީޑަރުންނަށް އިންތިހާބު ކުރީ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓެ) އަދި މަރަދޫ ދާއިރާގެ އިންތިހާބީ މެންބަރު އަހުމަދު ދީދީ އެވެ.

ޕާލިމެންޓްރީ ގްރޫޕްގެ ސެކްރެޓަރީ ޖެނެރަލްގެ މަގާމަށް އިންތިހާބުކުރީ ގަލޮޅު އުތުރު ދާއިރާގެ އިންތިހާބީ މެންބަރު މުހައްމަދު އިބްރާހިމް (ކުޑޫ) އެވެ. ޑެޕިއުޓީ ސެކްރެޓަރީ ޖެނެރަލަށް އިންތިހާބު ކުރީ މާވަށު ދާއިރާގެ އިންތިހާބީ މެންބަރު އަހުމަދު ޝާކިރެވެ.

ޗީފް ވިޕްގެ މަގާމަށް އިންތިހާބުކުރީ ތޮއްޑޫ ދާއިރާގެ އިންތިހާބީ މެންބަރު ހުސައިން ސަމީރެވެ. ވިޕުންގެ ގޮތުގައި އިންތިހާބުކުރީ ކަނޑިތީމު ދާއިރާގެ އިންތިހާބީ މެންބަރު އަމީން ފައިސަލް އަދި ކެޔޮދޫ ދާއިރާގެ އިންތިހާބީ މެންބަރު މުހައްމަދު ނިއުޝާދު (ނިއުބެ) އެވެ.

އަންނަ މަޖިލީހުގައި އޮންނާނީ ސަރުކާރު ހިންގީ ޕީއެންސީގެ ސުޕަ މެޖޯރިޓީއެކެވެ.

ޕީއެންސީގެ ޓިކެޓުގައި ވާދަކުރި 66 މެންބަރުންގެ އިތުރުން އަމިއްލަ ގޮތުން ވާދަކުރި ނުވަ މެންބަރަކު ފަހުން ވަނީ ޕީއެންސީއާ ގުޅިފަ އެވެ. އޭގެ ތެރޭގައި ސަރުކާރުން ކުރިން ވެސް ތާއީދު ދިން މެންބަރުން ހިމެނޭނެ އެވެ. އެއާ އެކީ ޕީއެންސީގެ ޕާލިމެންޓްރީ ގްރޫޕުގައި 75 މެންބަރުން ތިއްބަވާނެ އެވެ.

އޭގެ އިތުރުން އަންނަ މަޖިލީހަށް އިންތިހާބުވި އެމްއެންޕީގެ ރައީސް މުހައްމަދު ނާޒިމާއި، ޖުމްހޫރީ ޕާޓީގެ ލީޑަރު ގާސިމް އިބްރާހިމާއި، އެމްޑީއޭގެ ރައީސް އަހުމަދު ސިޔާމް މުހައްމަދުގެ އިތުރުން އެމްޑީއޭގެ މުހައްމަދު އައްބާސް ވެސް މަސައްކަތް ކުރައްވާނީ ސަރުކާރާ އެކުގަ އެވެ.

އަންނަ މަޖިލީހުގައި ސަރުކާރުން ބޭނުންވާ ގޮތަށް ވޯޓު ދެއްވާނެ 79 މެންބަރުން ތިއްބަވާނެ އެވެ.