ސްރީ ލަންކާގެ ޓުއަރިސްޓު ވިސާ ސްކީމަށް ބަދަލުތަކެއް އައި ނަމަވެސް ރާއްޖެއާއެކު ހަދާފައިވާ އެއްވެސް އެއްބަސްވުމަކަށް ބަދަލެއް ނާންނާނެ ކަމަށް ކަމާބެެހޭ ފަރާތްތަކުން ބުނެފި އެވެ.

ލަންކާގެ ޓުއަރިސްޓް ވިސާ ސްކީމަށް މިއަދު ބަދަލުތަކެއް ގެނެސް، އޮންލައިންކޮށް ވިސާއަށް ހުށަހަޅަންޖެހޭ ގޮތަށް ވަނީ ނިންމައިފަ އެވެ. ނަމަވެސް ރާއްޖެ، ސިންގަޕޫރު އަދި ސިޝެލްސްގެ ރައްޔިތުންނަށް އަދިވެސް އޮން-އެރައިވަލް ވިސާ ލިބޭނެ އެވެ.

ރާއްޖޭގެ ރައްޔިތުންނަށް އޮން-އެރައިވަލް 30 ދުވަހުގެ ވިސާ ލިބޭއިރު އެ ވިސާ އިތުރު ހަ މަހަށް ވެސް އިތުރު ކުރެވޭނެ އެވެ. ނަމަވެސް އެކަމަށް އެދި ހުށަހަޅަންޖެހޭނީ ޕޯޓަލެއް މެދުވެރިކޮށެވެ. އަދި އެގޮތަށް އެޕްލައި ކުރާއިރު އިދާރީ ފީއެއް ވެސް ދައްކަންޖެހިދާނެ އެވެ.

ވިސާގެ ނިޒާމަށް ގެނައި ބަދަލުތަކާއެކު ރާއްޖޭގެ ރައްޔިތުންނަށް އެހީތެރިވާން މަސައްކަތް ކުރަމުންދާ ކަމަށް ފޮރިން މިނިސްޓްރީން ނެރުނު ބަޔާނެއްގައި ބުންޏެވެ. އަދި ވިސާ އިތުރު ކުރަން ބޭނުންވާ، މިވަގުތު ވެސް ލަންކާގައި ތިބި މީހުން ދިވެހި އެމްބަސީގެ އެހީތެރިކަން ހޯދަން ވެސް މިނިސްޓްރީން އެދެ އެވެ.