މިއަދު ހުވާކުރި ރައްޔިތުންގެ މަޖިލީހާ އެކު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން އިދިކޮޅު މައިޕާޓީގެ ގޮތުގައި ކުރިއަށް އޮތް ފަސް އަހަރު ކުރަން ޖެހެނީ އުނދަގޫ ދަތުރެކެވެ. މުޅި ދައުލަތް މއޮތީ ވާދަވެރި ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފުރިހަމަ ބާރުގެ ދަށުގަ އެވެ.

ޖުމުލަ 93 މެމްބަރުން ތިއްބަވާ މަޖިލީހުގައި ރާއްޖޭގެ އެންމެ މެމްބަރުން ގިނަ ސިޔާސީ ޕާޓީއެއްގެ ގޮތުގައި އޮތް އެމްޑީޕީ ތަމްސީލުކުރައްވާނީ އެންމެ 12 މެމްބަރުންނެވެ. އެކަމަކު އެމްޑީޕީއަކީ މަދު މެމްބަރުންނާ އެކު ރައްޔިތުންނަށް ފައިދާކުރަނިވި ނަތީޖާތަކެއް ރައްޔިތުންގެ މަޖިލީހާއި ރައްޔިތުންގެ ހާއްސަ މަޖިލީހުގައި ވެސް ނެރުނު ޓްރެކް ރެކޯޑް ރަނގަޅު ޕާޓީއެކެވެ.

"އެމްޑީޕީއަކީ އަބަދުވެސް ދިވެހި ރައްޔިތުންގެ ހައްގުގައި މަސައްކަތް ކުރާ ޕާޓީއެއް. އަޅުގަނޑުމެން އެއަށް އުނިކަމެއް ނާންނަ ގޮތަށް ޔަގީނުން ވެސް އެ މަސައްކަތް މަޖިލީހުގެ ތެރޭގައި ކުރާނެ," ދެވަނަ ދައުރަކަށް ހިތަދޫ ދެކުނު ދާއިރާގެ ހުވާ ކުރެއްވުމަށް ފަހު "އަދަދު" ނޫހަށް ދެއްވި އިންޓަވިއުގައި އެމްޑީޕީގެ ޕާލިމެންޓަރީ ގްރޫޕްގެ ލީޑަރު އިބްރާހިމް ނާޒިލް ވިދާޅުވި އެވެ.

ނަވާރަވަނަ މަޖިލީހުގައި ވެސް އެމްޑީޕީން ގިނަ މަސައްކަތްތަކެއް ކުރި އެވެ. ޖުމުލަ 210 ބިލެއް ހުށަހަޅައި، ފާސްކުރި 178 ބިލްގެ ތެރޭގައި އެކި ދާއިރާތަކަށް އިންގިލާބީ ބަދަލުތަކެއް ގެނުވި ބިލްތައް އެ މަޖިލީހުން ފާސްކުރި އެވެ.

ނަމަވެސް, ޖުމުލަ 87 މެމްބަރުންގެ މައްޗަށް އެކުލެވި، އެ މަޖިލީހުގެ މެޖޯރިޓީ ފެށުނީއްސުރެ އެމްޑީޕީއަށް އޮތް 19 ވަނަ މަޖިލީހުގައި ޖުމުލަ 513 ޖަލްސާއަށް ފަހު ނެގި ވޯޓުން އެނގި ހާމަވީ ކަމަކީ މެމްބަރުންނަށް އޮތް އިތުބާރު ކުޑަ ކަމެވެ. އެމްޑީޕީގެ ޓިކެޓުގައި ނަވާރަވަނަ މަޖިލީހަށް ހޮވުނު 65 މެމްބަރުންގެ ތެރެއިން މިފަހަރުގެ މަޖިލީހަށް އިންތިހާބުވީ އެންމެ ފަސް މެމްބަރުންނެވެ.

"ނަންބަރު ކިތަންމެ މަދުވިޔަސް ޕާޓީގެ އަސާސްތައް ދެމެހެއްޓުމުގައި ދެމިތިބޭނެ. ކުރިއެކޭ އެއްގޮތަށް އެމްޑީޕީގެ ރޫހުގައި ފެނިގެންދާނެ," އޭގެ ތެރެއިން އެއް މެމްބަރު ކަމަށްވާ ވައިކަރަދޫ ދާއިރާގެ މެމްބަރު ހުސައިން ޒިޔާދު (ފިއްޓޭ) ވިދާޅުވި އެވެ.

އެމްޑީޕީގެ މެމްބަރުން މަޖިލީހުގެ ތެރޭގައި ކުރިއަށް އޮތް ފަސް އަހަރު ކުރާ މަސައްކަތަކީ ދެ އިންތިހާބުން ބަލިވެ އެ ޕާޓީއަށް ގެއްލުނު އިތުބާރު އަލުން ހޯދުމުގެ މަސައްކަތެވެ. ސަރުކާރުން ބޭނުންވާހާ ކަމަކަށް "ރަބަރު ސްޓޭމްޕް" ޖަހާނެ ކަމަށް ބެލެވޭ މި މަޖިލީހަށް ފާރަވެރިވެ ސަރުކާރު ޖަވާބުދާރީ ކުރުވައިގެން މެނުވީ އެ އިތުބާރު ހޯދަން އުނދަގޫވާނެ އެވެ.

"ސަރުކާރު ޖަވާބުދާރީ ކުރުވައި ދައުލަތުގެ އެހެން މުއައްސަސާތަކަށް ވެސް ފާރަވެރިވުމުގެ ރަނގަޅު މަސައްކަތްތަކެއް މި މަޖިލީހުގައި ވެސް ކުރެވޭނެ," އެމްޑީޕީގެ އަމާޒުތަކާ ގުޅޭގޮތުން ގަލޮޅު ދެކުނު ދާއިރާގެ ގޮނޑި ދެވަނަ ދައުރަކަށް ފުރުއްވާ މީކާއިލް އަހްމަދު ނަސީމް ވިދާޅުވި އެވެ.

ނަވާރަވަނަ މަޖިލީހުގައި ވެސް މައިނޯރިޓީގައި ތިބީ މަދު މެމްބަރުންތަކެކެވެ. އެމްޑީޕީއިން ސުޕަ މެޖޯރިޓީއެއް ކޮންޓްރޯލް ކުރި އެ މަޖިލީހުގައި ވެސް މައިނޯރިޓީއަށް ޖާގަ ދެވުނު ކަމަށް މީކާއިލް ގަބޫލުކުރައްވަ އެވެ. މި މަޖިލީހުގައި އެ ޖާގަ ލިބޭނެ ކަމާ މެދު ސުވާލުތަކެއް އެމްޑީޕީގެ މެމްބަރުންގެ މެދުގައި މިހާރު ވެސް އެބައޮތެވެ.

"ބައެއް ކޮމިޓީތަކުގެ މުގައްރިރުކަން ވެސް ސުޕަމެޖޯރިޓީ އޮއްވައި އެހެން ޕާޓީތަކުގެ މެމްބަރުންނަށް ވެސް ލިބިގެންދިޔަ. އުންމީދަކީ މި މަޖިލީހަކީ ހަމަ އެފަދައިން މައިނޯރިޓީގެ އަޑު ކެނޑުނަ ނުދީ އެ ސޭފްގާޑްތައް ގާއިމުކޮށްދޭނެ މަޖިލީހަކަށް ވާނެ ކަމަށް," އޭނާ ވިދާޅުވި އެވެ.

މި މަޖިލީހުގައި އެމްޑީޕީއަށް އޮތީ މައިނޯރިޓީގެ ބޮޑު ޒިންމާއެކެވެ. ރައްޔިތުންގެ ހައްގުތައް ކަށަވަރު ކުރުމާއި ސަރުކާރަށް ޖަވާބުދާރީ ކުރުވުމުގައި އެ ޕާޓީން އަދާކުރަން ޖެހެނީ ބޮޑު ރޯލެކެވެ. ރާއްޖޭގެ ސިޔާސީ ކުޅިބައި މި ދެ އިންތިހާބަށް ފަހު އެތުރިގެންދިޔަ ގޮތުން މައިނޯރިޓީގެ މުހިންމުކަން މިވަނީ އިހުނަށްވުރެ މާބޮޑުވެފަ އެވެ.

"އުނދަގޫތަކެއް ހުންނާނެ ކަމެއް, މަޖިލީހުގެ ތެރެއިން ކަންތައްތައް ނިންމަން ވީމައި. އެހެން ނަމަވެސް މަސައްކަތް ކުރުމަކަށް އެއްވެސް ހުރަހެއް ނެތް. އެންމެ ބޮޑު އެއްބާރުލުމެއް މީޑިއާއެއް ލިބޭނެ ކަމަށް މި ބަލަނީ," މެމްބަރު ފިއްޓޭ ވިދާޅުވި އެވެ.

މެމްބަރުންގެ އަދަދު މަދުކަމުގައިވީ ނަމަވެސް މަޖިލީހުގެ ތެރެއިން ރައްޔިތުންނަށްޓަކައި މަސައްކަތް ކުރާނެ ކަމަށް އެމްޑީޕީގެ މެމްބަރުން ބުނެ އެވެ. އަންނަ މަޖިލީހުގައި ސަރުކާރުން ބޭނުންވާ ގޮތަށް ވޯޓު ދެއްވާނެ 79 މެންބަރުން ތިއްބަވާނެ އެވެ. ދެން ތިއްބެވީ އެމްޑީޕީގެ 12 އާއި މިނިވަން ދެ މެމްބަރުންނެވެ.

"މެމްބަރުންގެ އަދަދު މަދުކަމުގައި ވިޔަސް ވީހާވެސް ބޮޑަށް މަޖިލީހުގެ ތެރެއިންނާއި ބޭރުން ވެސް ތި ބޭފުޅުންގެ [މީޑިއާ] އެހީތެރިކަމާ އެކު ރައްޔިތުންނާ ހިސާބަށް [މައްސަލަތައް[ ގެނެސްދޭނަން. މަޖިލީހުގެ ތެރޭގައި ވަމުންދާ ގޯސްކަންތަކެއް އެކަންޏެއް ނޫން. ރަނގަޅު ކަންތަކާއި އަދި ރައްޔިތުންނާއި ފައިދާ ހުރި ކަންކަމާއި އެ ކަންތައްތަކުގެ ތެރެއިން އުނިކަމެއް ނޫނީ ގެއްލުމެއް ލިބިދާނެ ފަދަ ކަންކަމަށް [ފާރަވެރިވާނެ]," ނާޒިލް "އަދަދު" ނޫހަށް ވިދާޅުވި އެވެ.

ނާޒިލް އާއި ފިއްޓޭގެ އިތުރުން ޕީޖީ ލީޑާޝިޕްގައި މަރަދޫ ދާއިރާގެ އިންތިހާބީ މެންބަރު އަހުމަދު ދީދީ ޑެޕިިއުޓީ ލީޑަރެއްގެ ގޮތުގައި ހުންނަވާނެ އެވެ. ޕީޖީގެ ސެކްރެޓަރީ ޖެނެރަލްގެ މަގާމަށް އިންތިހާބުކުރީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އެވެ. ޑެޕިއުޓީ ސެކްރެޓަރީ ޖެނެރަލަށް އިންތިހާބު ކުރީ މާވަށު ދާއިރާގެ މެންބަރު އަހުމަދު ޝާކިރެވެ.

ޗީފް ވިޕްގެ މަގާމަށް އިންތިހާބުކުރީ ތޮއްޑޫ ދާއިރާގެ އިންތިހާބީ މެންބަރު ހުސައިން ސަމީރެވެ. ވިޕުންގެ ގޮތުގައި އިންތިހާބުކުރީ ކަނޑިތީމު ދާއިރާގެ އިންތިހާބީ މެންބަރު އަމީން ފައިސަލް އަދި ކެޔޮދޫ ދާއިރާގެ އިންތިހާބީ މެންބަރު މުހައްމަދު ނިއުޝާދު (ނިއުބެ) އެވެ.

މިދިޔަ އަހަރު ބޭއްވި ރިޔާސީ އިންތިހާބުގެ ދެބުރާއި މަޖިލިސް އިންތިހާބުގައި ނާކާމިޔާބީއާ ގުޅިގެން އެ ޕާޓީގެ ކުރިމަގު ކަނޑައެޅުމަށް ދިރާސާއެއް ހަދައި މަގުޗާޓެއް އެކުލަވާލުމުގެ މަސައްކަތް މިހާރު ވަނީ ފަށާފަ އެވެ. ޕާޓީގެ ކުރިމަގު ކަނޑައަޅާނީ އެ ދިރާސާއަށް ފަހު ޕާޓީގެ ގައުމީ މަޖިލީހުންނެވެ. އެމްޑީޕީގެ ކުރިމަގުގައި މި 12 މެމްބަރުންގެ ހިއްސާ މަޖިލީހުގެ ތެރެއިން ވަރަށް ބޮޑެވެ.