މެޑްރިޑް (މެއި 21) - ބާސެލޯނާގެ ބޯޑު މެމްބަރުންގެ ހިތްހަމަނުޖެހުންތަކެއް ސަބަބުން، އެ ޓީމުގެ ކޯޗުގެ މަގާމުން ޒަވީ ހެނާންޑޭޒް ވަކިކުރަން ވާހަކަ ދައްކަން ފަށާފައިވާއިރު، އެ ކަމާ ގުޅޭގޮތުން، ޒަވީ އާއި ބާސެލޯނާގެ ރައީސް ޖޮއާން ލަޕޯޓާ ބައްދަލުކުރަން ނިންމާފައިވާ ކަމަށް ރިޕޯޓްތައް ބުނެފި އެވެ.

މި ބައްދަލުވުން ކުރިއަށްގެންދާނީ، މި މަހު 26 ވަނަ ދުވަހު ސްޕެނިޝް ލީގު ނިމުމުންނެވެ.

މިދިޔަ ޖެނުއަރީ މަހު ޒަވީ، ވަނީ މި ސީޒަން ނިމުމުން ބާސެލޯނާގެ ކޯޗުކަން ދޫކޮށްލާނެކަން އިއުލާނުކޮށްފަ އެވެ. އެކަމަކު، ތަކުރާރުކޮށް ބާސެލޯނާ އިން ކުރިއަށްގެންދިޔަ މަޝްވަރާތަކަށް ފަހު، ޒަވީ އެ ނިންމުން ބަދަލުކުރި އެވެ. މީގެ މަހެއްހާ ދުވަސްކުރިން ޒަވީ، އިއުލާނުކުރީ އިތުރު އެއް އަހަރު ބާސެލޯނާގައި މަޑުކުރަން އެއްބަސްވެވިފައިވާ ކަމަށެވެ. އެހެން ނަމަވެސް، އެންމެ ފަހުން ބާސެލޯނާ އިން ކުޅުނު މެޗަށް ފަހު، ޒަވީ، ނޫސްވެރިންގެ ބައްދަލުވުމުގައި ދެއްކި ވާހަކަތަކެއްގެ ސަބަބުން އޭނާ ވަކިކުރަން ބާސެލޯނާގެ ބޯޑު މެމްބަރުން ވަނީ ހުށަހަޅައިފަ އެވެ.

ސްޕެއިނުގެ މީޑިއާގައި މި ވާހަކަ ތަކުރާރުކޮށް ދެކެވެމުން އަންނައިރު، މިކަމާ ގުޅޭގޮތުން ބާސެލޯނާގެ އެއްވެސް ސީނިއާ އޮފިޝަލަކު އަދި ރަސްމީ ޖަވާބެއް ނުދެ އެވެ. އެހެން ނަމަވެސް، އެންމެ ފަހުން ބޭއްވި ނޫސްވެރިންގެ ބައްދަލުވުމުގައި، ޒަވީ ވަނީ އަންނަ ސީޒަނަށް މިހާރު ވެސް ޕްލޭންތަކެއް ހަދަމުން އަންނަ ކަމަށް ބުނެފަ އެވެ.

ރިޕޯޓްތައް ބުނާގޮތުން، ބާސެލޯނާގެ ރައީސް ލަޕޯޓާ އާއި ސްޕޯޓިން ޑިރެކްޓަރު ޑެކޯ އަންނަނީ އެ ކްލަބްގެ ބޯޑު މެމްބަރުންނާ ބައްދަލުކޮށް، ޒަވީ މަޑުކުރުވަން އެ ފަރާތްތަކުގެ ރުހުން ހޯދަމުންނެވެ. އަދި ލަޕޯޓާ އާއި ޑެކޯގެ ވިސްނުމަކީ ޒަވީއާ އެކު ކުރިއަށް ދިއުމެވެ.