ހޮޓެލް އޭޝިއާ އެގްޒިބިޝަން އަދި އިންޓަނޭޝަނަލް ކަލިނަރީ ޗެލެންޖުގައި، ކަލިނަރީ ޗެލެންޖުން ވަނަވަނައަށް ދިޔަ ފަރާތްތަކަށް އެވޯޑު ދީފި އެވެ.

ކަލިނަރީ ޗެލެންޖުގައި ޖުމްލަ 25 މުބާރާތެއް ހިމެނުނުއިރު، އެއްވަނައާއި ދެވަނަ އަދި ތިންވަނަ ވެސް ވަނީ ހޮވާފަ އެވެ.

މުބާރާތުގައި އެންމެ ގިނައިން ވަނަވަނައަށް ގޮސްފައި ވަނީ ސްރީލަންކާ އަދި އިންޑިއާ ޝެފުންނެވެ. އަދި ބައެއް ވަނަތަކަށް ރާއްޖެއާއި ނޭޕާލް އަދި ބަންގްލަދޭޝްގެ ޝެފުން ވެސް ގޮސްފައިވެ އެވެ.

މުޅި މުބާރާތުގެ އެންމެ މޮޅު ތިންވަނަ ޒުވާން ޝެފުކަން އެމްއެންޔޫގެ ފާތިމަތު ޒުމްޔާއަށް ލިބުނުއިރު، އޭނާއަށް ވަނީ އެންމެ އުންމީދީ ރާއްޖޭގެ ޝެފުކަން ވެސް ލިބިފަ އެވެ.

މުޅި މުބާރާތުގެ އެންމެ މޮޅު ޝެފަކަށް ހޮވުނީ ލަކްސްގެ ބަރުން ކުމާރު އެވެ. އަދި އެންމެ މޮޅު ޕޭސްޓްރީ ޝެފަކަށް ހޮވުނީ ހުވަފެންފުށީގެ ކަސުން މަދުޝަންކާ އެވެ.

ކަލިނަރީ ޗެލެންޖުގެ ވަނަވަނައަށް ދިޔަ ފަރާތްތަށް ހޮވުން -- ފޮޓޯ: ހޮޓެލް އޭޝިއާ

މުބާރާތުގެ އެންމެ މޮޅު ކަލިނަރީ އެސްޓަބްލިޝްމަންޓް "އަލަން ޕާމާ ޗެލެންޖް ޓްރޮފީ" ލިބުނީ ވެލައްސަރު މޯލްޑިވްސްއަށެވެ. އަދި ބެސްޓް އާޓިސްޓް އެވޯޑު ލިބުނީ ރީތި ބީޗުގެ ސިސިރާ ކުމާރާއަށެވެ.

މުބާރާތުގައި ކެޓަގަރީތަކުގެ ތެރެއިން ރާއްޖެއަށް އެއްވަނަ ލިބުނީ ލޯވް ވޭސްޓް ކެޓަގަރީއިން އިސްމާއިލް ތަހުސީންއަށެވެ. އޭނާއަށް ވަނީ މުބާރާތުގައި ރާއްޖޭގެ އެންމެ މޮޅު ޝެފްގެ އެވޯޑު ވެސް ލިބިފަ އެވެ.

މުބާރާތުގައި ރާއްޖޭގެ ހޮޓް ކުކިން - ޕޯލްޓްރީ މުބާރާތުން ވަލްޑޯފް އެސްޓޯރިއާގައި މަސައްކަތްކުރާ ރާއްޖޭގެ މުހައްމަދު މުއާޒް ވަނީ ދެވަނަ ހޯދާފަ އެވެ. އަދި ޑެޒާޓްސް މުބާރާތުގެ ތިންވަނަ ފޯ ސީޒަން ކުޑަހުރާގެ އަލީ ސަމާއު ސައީދު ވަނީ ހޯދާފަ އެވެ.

މީގެއިތުރުން ޓީމް ޗެލެންޖުގައި ވޯލްޑަފް އެސްޓޯރިއާ ޓީމުގައި ހިމެނުނު މުއާޒުގެ ޓީމުން ވަނީ އެ އިވެންޓުން ދެވަނަ ހޯދާފަ އެވެ. އަދި މޯލްޑިވިއަން ޑިޝް މުބާރާތުގައި ރާއްޖޭގެ އިސްމާއިލް ތަހުސީން ވަނީ ތިންވަނަ ހޯދާފަ އެވެ.

އެބައިން އެއްވަނަ ހޯދީ ލަންކާގެ ޝެފެއް ކަމަށްވާއިރު، ދެވަނަ ހޯދީ ބަންގްލަދޭޝް ޝެފެކެވެ.