ބާސެލޯނާ (މެއި 18) - ބާސެލޯނާގެ ބޯޑު މެމްބަރުންގެ ހިތްހަމަނުޖެހުންތަކެއް ސަބަބުން، އެ ޓީމުގެ ކޯޗުގެ މަގާމުން ޒަވީ ހެނާންޑޭޒް ވަކިކުރަން ވާހަކަ ދައްކަން ފަށާފައިވާ ކަަމަށް މީޑިއާ ރިޕޯޓްތައް ބުނެފި އެވެ.

މިދިޔަ ޖެނުއަރީ މަހު ޒަވީ، ވަނީ މި ސީޒަން ނިމުމުން ބާސެލޯނާގެ ކޯޗުކަން ދޫކޮށްލާނެކަން އިއުލާނުކޮށްފަ އެވެ. އެކަމަކު، ތަކުރާރުކޮށް ބާސެލޯނާ އިން ކުރިއަށްގެންދިޔަ މަޝްވަރާތަކަށް ފަހު، ޒަވީ އެ ނިންމުން ބަދަލުކުރި އެވެ. މީގެ 23 ދުވަސް ކުރިން ޒަވީ، އިއުލާނުކުރީ އިތުރު އެއް އަހަރު ބާސެލޯނާގައި މަޑުކުރަން އެއްބަސްވެވިފައިވާ ކަމަށެވެ.

އެހެން ނަމަވެސް، އެންމެ ފަހުން ކުޅުނު މެޗަށް ފަހު، ޒަވީ، ނޫސްވެރިންގެ ބައްދަލުވުމުގައި ދެއްކި ވާހަކަތަކެއްގެ ސަބަބުން އޭނާ ވަކިކުރަން ބާސެލޯނާގެ ބޯޑު މެމްބަރުން ވަނީ ހުށަހަޅައިފަ އެވެ. އަދި ބާސެލޯނާ ބީ ޓީމުގައި ހުރި ކޯޗު، ރަފާ މާކުއޭޒްއާ ޓީމު ހަވާލުކުރަން ވަނީ އެދިފަ އެވެ.

ނޫސްވެރިންގެ ސުވާލުތަކަށް ޖަވާބު ދެމުން ޒަވީ ބުނެފައިވަނީ، ބާސެލޯނާގެ މާލީ ހާލަތު މި ވަގުތު އޮތްގޮތުން، ސްޕެނިޝް ލީގު ތަށްޓަށް ރެއާލް މެޑްރިޑާ ވާދަކުރުމަކީ ފަސޭހަކަމެއް ނޫން ކަމަށާއި ބޮޑެތި މުބާރާތްތަކަށް ނުކުންނައިރު، ޔޫރަޕްގައި ބާސެލޯނާ އަށް ވުރެ މާލީ ހާލަތު ރަނގަޅު ވަރުގަދަ ގިނަ ޓީމުތަކެއް އެބަހުރި ކަމަށެވެ.

ސްޕެނިޝް ލީގުގައި ބާކީ ދެ މެޗު އޮތްއިރު، ބާސެލޯނާ އޮތީ ރެއާލަށް ވުރެ 14 ޕޮއިންޓް ފަހަތުގަ އެވެ.

މީގެ ތިން އަހަރެއްހާ ދުވަސް ކުރިން، 2021 ވަނަ އަހަރުގެ ނޮވެމްބަރު މަހު، ޒަވީ، ބާސެލޯނާއާ ގުޅުނީ ގަތަރުގެ އަލް ސާދު ދޫކޮށްފަ އެވެ. ފުރަތަމަ ފުލް ސީޒަނުގައި ޒަވީ ވަނީ ބާސެލޯނާ އަށް ސްޕެނިޝް ލީގު ކާމިޔާބުކޮށްދީފަ އެވެ، އެކަމަކު، އެ ކްލަބްގެ މާލީ ހާލަތު އޮތްގޮތުން، ޒަވީ އަށް، ދެމެހެއްޓެނިވި ގޮތެއްގައި ގެންގުޅެވޭނެ، ރަނގަޅު ޓީމެއް ބިނާކުރަން ގިނަ ހުރަސްތަކެއް ވަނީ ކުރިމަތިވެފަ އެވެ.