ކުޅިވަރު އެސޯސިއޭޝަންތައް އޮޑިޓް ނުކުރާ މައްސަލަ ބޮޑު ކަމަށާއި, އެކަން ހައްލުކުރުމަށް ކުރެވެންހުރި ކަންކަމަކީ ކޮބާތޯ ބަލައި އެކަމަށް ސަރުކާރުން އެހީވާން ނިންމާފައިވާ ކަމަށް ކޮމިޝަނާ އޮފް ސްޕޯޓްސް މުހައްމަދު ތޮލާލް ވިދާޅުވެއްޖެ އެވެ.

އިއްޔެ ބޭއްވި ނޫސްވެރިންގެ ބައްދަލުވުމުގައި ތޮލާލް ވިދާޅުވީ ކޮންމެ އެސޯސިއޭޝަނަކަށް ވެސް އަހަރުން އަހަރަށް އެ އެސޯސިއޭޝަނެއް އޮޑިޓް ކުރަން ލާޒިމްކުރާ ކަމަށެވެ. އެކަމަކު, މީގެ ކުރިން އެސޯސިއޭޝަންތައް އޮޑިޓްކޮށްފައިނުވާ ކަމަށާއި, އެ ކަން ނުކޮށް، ހުރުމުން އެ މައްސަލަ ބަލާފައިވެސް ނުވާ ކަމަށެވެ.

"މިދިޔަ ދުވަސްތަކުގައި އަޅުގަނޑުމެންނަށް ފާހަގަވި އެއްކަމެއް އެއީ ގާނޫނު ލާޒިމުކުރާ އެއްކަމެއް (އޮޑިޓްކުރުން) އެސޯސިއޭޝަންތަކުން, ގިނަ އެސޯސިއޭޝަންތަކުން ނުކުރާކަން. އަދި އެކަން ނުކޮށްގެން އަޅަން ޖެހޭ ފިޔަވަޅެއް, ނުވަތަ އެކަން ނުކުރާކަން ވެސް އެސޯސިއޭޝަނަށް ނާންގާކަން،" ތޮލާލް ވިދާޅުވި އެވެ.

އޭނާ ވިދާޅުވީ އޮޑިޓް ކުރުމަކީ ބޮޑު ހަރަދެއްދާނެ ކަމަށްވުމުން, އެކަން ހައްލު ކުރުމަށް ދެ ގޮތެއް ސަރުކާރުން ބަލަމުން އަންނަ ކަމަށެވެ. އެއީ، ސަރުކާރުން އޮޑިޓް ފާމެއް ނަގައިގެން, އެސޯސިއޭޝަންތައް އޮޑިޓް ކުރުން ނުވަތަ, މޯލްޑިވްސް އޮލިމްޕިކް ކޮމެޓީ (އެމްއޯސީ) އާއި ހަވާލުކޮށްގެން އެކަން ކުރުން ކަމަށެވެ.

އެސޯސިއޭޝަންތައް ހިންގުން ހަރުދަނާ ކުރުމަށް ކުރަން ޖެހޭ ކަންކަން މިނިސްޓްރީން ހާއްސަ ސަމާލުކަމެއް ދީގެން ކުރަމުން އަންނަ ކަމަށާއި މިހާރު ވެސް ގިނަ އެސޯސިއޭޝަންތަކުގެ ހިންގުން ހަރުދަނާ ކަމަށް ތޮލާލް ވިދާޅުވި އެވެ.

"އަޅުގަނޑުމެންނަށް ފާހަގަވީ ގިނަ އެސޯސިއޭޝަންތަކުގެ ހިންގުން ހަރުދަނާކަން. އެކަމަކު ދިވެހިންގެ ސަމާލުކަން ނޫނީ ޝައުގުވެރިކަން ބޮޑު އެސޯސިއޭޝަންތަކުގައި މައްސަލަ އުޅޭކަން ފާހަގަ މިވަނީ" އޮލިމްޕިކް ކޮމިޓީގެ ނައިބު ރައީސްގެ މަގާމު ވެސް ފުރުއްވާފައިވާ ތޮލާލް ވިދާޅުވި އެވެ.

ގައުމީ ދެ ކުޅިވަރު އެސޯސިއޭޝަނަކާ ގުޅޭ ކޮރަޕްޝަންގެ މައްސަލަތަކެއް އަންނަނީ ފުލުހުން ތަހުގީގު ކުރަމުންނެވެ. އެއީ، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) އެވެ.