ބައިނަލްއަގުވާމީ ފެންވަރުގެ ބީޗް ގޭމްސް އެއް ބޭއްވުން އެއީ ސަރުކާރުގެ އަމާޒެއް ކަމަށާއި, ރާއްޖެ މިއީ ބީޗް ގޭމްސް ބާއްވަން އެންމެ ރަނގަޅު އެއް މަންޒިލް ކަމަށް ކުޅިވަރާ ބެހޭ ވަޒީރު އަބްދުالله ރާފިއު (ރާއްޕެ) ވިދާޅުވެއްޖެ އެވެ.

މިއަދު ދިވެހިރާއްޖޭގެ އަޑު ސެނެކޯ މާލަމުގައި ކުރިއަށްދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކުޅިވަރާ ބެހޭ ވަޒީރު ރާފިއު ވިދާޅުވީ, އަމިއްލަ ފަރާތްތަކުން، ބާއްވާ ބީޗް ގޭމްސްތަކަށް ވެސް ބޮޑު ތަރުހީބެއް ލިބޭ ކަމަށާއި, ރާއްޖެ މިއީ އެފަދަ ގޭމްސްތައް ބާއްވަން އެންމެ އެކަށޭނެ އެއްގައުމު ކަމަށެވެ.

"ވިޒިޓާ އިކޮނޮމީ ކޮންސެޕްޓް, ރައީސް އޮފީހުގައި އެބައޮވޭ, ސްޕޯޓްސް ޓުއަރިޒަމް އެކަމުގެ ތެރެއަށް ލައިގެން ކުރިއަށް ގެންދިޔުމަކީ ވަރަށް މުހިންމު ކަމެއް. އަޅުގަނޑު ދެކެން ބީޗް ގޭމްސް ރާއްޖޭގައި ބޭއްވިގެންދިޔުން" ރާފިއު ވިދާޅުވި އެވެ.

ހދ. ކުޅުދުއްފުށީ ސިޓީގައި ޑަބްލިއު ސްޕޯޓްސް އެކެޑަމީ އިން ބާއްވަމުން އަންނަ ބީޗްގޭމްސްގެ ހުޅުވުމުގެ ރަސްމިއްޔާތު މި ފަަހަރު ޝަރަފްވެރިކޮށްދެއްވީ މިނިސްޓަރު ރާފިއު އެވެ.

މިނިސްޓަރު ވިދާޅުވީ, ރާއްޖެ ކައިރީ މިއޮތް އަވައްޓެރި ގައުމުތަކުގައި ބޮޑު މުބާރާތެއް ބާއްވާނަމަ އެ މުބާރާތްތުގެ ބީޗް ނޫނީ މޫދު ކުޅިވަރުތައް ވެސް ރާއްޖެ އަށް ގެނެވޭތޯ މަސައްކަތް ކުރާނެ ކަމަށެވެ.

ރާއްޖޭގެ ރާޅުތަކަކީ ދުނިޔޭގެ ފެންވަރުގައި ވެސް ފާހަގަކުރެވޭ ރާޅުތަކެއްކަމަށް ވިދާޅުވަމުން މިނިސްޓަރު ވިދާޅުވީ, ރާއްޖެ އަށް ބީޗް ގޭމްސްތަކުން ނަފާ ވެސް ހޯދޭނެ ކަމަށެވެ. އަދި އެ ކޮންސެޕްޓްގެ މުބާރާތްތައް ކުރިއަށް އޮތް ތަނުގައި ފެނިގެންދާނެ ކަމަށް މިނިސްޓަރު ވަނީ ވިދާޅުވެފަ އެވެ.

ސްޕޯޓްސް ޓޫރިޒަމް ރާއްޖޭގައި ކުރިއެރުވުމަށް ކުރީ ސަރުކާރުތަކުންވެސް ވަނީ މަސައްކަތް ކޮށްފަ އެވެ. އަދި އެ މަސައްކަތުގެ ދަށުން ރާއްޖޭގައި ބައެއް މުބާރާތްތައްވެސް ބޭއްވިގެންދިޔަ އެވެ. އެކަން މި ސަރުކާރުވެސް އެގޮތުގައި ކުރިއަށް ގެންދާނެ ކަމަށް ރާފިއު ވިދާޅުވި އެވެ.