ފާރުގައި ރީނދޫ ކުލަ އެވެ. ދޮރުގައި ގަދަ ނޫ ކުލައިގެ ދަވާދެކެވެ. ފާރުގައި ކަޅު ކުލައިން ކަނޑު ދިރުންތައް ކުރަހާފައި ހުއްޓެވެ. އަދި ތަފާތު ފޮންޓުތަކުން އެ ފިހާރައިގައި ހުންނާނެ ތަކެތި ލިޔެފައިވެ އެވެ. ދޮރުމަތީގައި "ރޭޝަމް ގެސްޓް ހައުސް" ލިޔެފައިވާ ބޯޑެއް ހަރުކޮށްފައި ހުއްޓެވެ.

މި ފިހާރަ ފެނުމުން އެއީ ޒަމާންތަކެއް ވަންދެން، އެ ގޮތަށް ހިންގަމުންދާ ފިހާރައެއް ކަން އެނގުނެވެ. ފިހާރަ ވަންނަ އިރު ކައުންޓަރު މަތީގައި އޮއިލް ޕެއިންޓުން ފިލާތަކުގައި ރާއްޖޭގެ މަންޒަރުތައް ކުލަ ޖައްސަން ފެރިދޫ އަލީ (50އ.) އެ ތަނުގައި އިނެވެ.

ސްޓެލްކޯގައި ވަޒީފާ އަދާކުރާތާ 12 އަހަރަށް ވުރެ ގިނަ ދުވަސްވީ އަލީގެ ހުސް ވަގުތުތަކުގައި ކުރާ ކަމަކީ މިއީ އެވެ. ބޭރުން އެތެރެކޮށްފައިވާ ސޮވެނިއާގެ އިތުރުން އޭނާގެ އަމިއްލަ މަސައްކަތާއި ފަންނުން އުފައްދާ ތަކެތި އެ ތަނުގައި ބަހައްޓައިގެން ރަށަށް އަރާ ގެސްޓުންނަށް ވިއްކުމެވެ.

މިއީ އޭނާގެ އާއިލީ ވިޔަފާރިއެކެވެ. އެ ފިހާރަ އެ ގޮތުގައި ހުންނަތާ 30 އަހަރެއްހާ ދުވަހެވެ.

އއ. ފެރިދޫގައި ހުންނަ ސޮވެނިއާ ޝޮޕެއް، ތިރީސް އަހަރަށްވުރެ ގިނަ ދުވަސްވެއްޖެ --

އަލީ ކިޔައިދިން ގޮތުގައި، އެއީ 1995، ގައި އޭނާގެ ތިން ބޭބެއަކާއި ބައްޕަ ވެގެން ހުޅުވި ފިހާރަ އެކެވެ. އޭރު އަލީގެ އުމުރުން 20، އަހަރެވެ. އެއީ އަރި އަތޮޅަށް ޓުއަރިޒަމް ތައާރަފުވެގެން ދިޔަ ޒަމާނެވެ. ރިސޯޓުތައް ހުޅުވި، ރިސޯޓުތަކަށް އަންނަ ފަތުރުވެރިންގެ މަންޒިކަލަށް އެ ރަށް ވެސް ވެއްޖެ އެވެ.

"ހަފުތާއަކު ދެ ދުވަހަކު، މަދުވެގެން، ޝޮޕިން ކޮށްލަން ގެސްޓުން އަންނާނެ، ކޭޝް އިން އޭރު ދައްކާނީ، ޑޮލަރު ހިފައިގެން، ހުންނަ އެއްޗެއް ދެ ޑޮލަރު، ތިން ޑޮލަރު، އޭރު ދެން އެއީ ވެސް ވަރަށް ބޮޑު އެއްޗެއް،" އަލީ އެ ވާހަކަ ކިޔައިދޭން ފެށި އެވެ.

އަލީގެ މުޅި އާއިލާއަކީ ވެސް ވަރަށް ފަންނުވެރި އާއިލާ އެކެވެ.

އާޓިސްޓް އަލީ ތައްޔާރުކޮށްފައިވާ ބައެއް ތަކެތި ---

އޭނާގެ މަންމައާއި ބައްޕަ ވެގެން ފެށި ވިޔަފާރީގައި ދަރިން ބައިވެރިވެގެން ކުރި ކަމަކީ އެއީ އެވެ. ބޮއްޔާއި ކޭބަލް ނަރު ބުރިކޮށްގެން އެ ޒާތަށް ފަށް ހަދާފައި ވިއްކަން ބެހެއްޓި އެވެ. އެކި ޑިޒައިނަށް ޓީޝާޓާއި މުންޑު ހަދާފައި، ވިއްކަން ބެހެއްޓި އެވެ.

"ޑިޒައިން ޑިޒައިނަށް މި ހުންނަ މުންޑު އޭރު ނުވެސް ހުރޭ، ޕްލެއިން މުންޑު ހުންނާނީ މާލޭން ލިބެން، ދެން ޕްލެއިން ފޮތީގެ މުންޑު ގެނެސްގެން އަޅުގަނޑުމެން އެއަށް ޑިޒައިންތައް ޕްރިންޓްކޮށްފަ، ގެސްޓުން އެޓްރެކްޓް ވާ ކަހަލަ ގޮތަކަށް،" އަލީ ތަފްސީލް ކޮށްދިނެވެ.

ބޭރުން އެތެރެކޮށްފައިވާ ބައެއް ސޮވެނިއާތައް ހުރި ނަމަވެސް މިއަދު އެ ފިހާރަ ފުރާލާފައިވަނީ އަލީގެ ކުރެހުންތަކާއި އަތްތެރި މަސައްކަތުގެ އުފެއްދުންތަކުންނެވެ.

"ތޮއްޑޫ މޫސަ ހަސަން، ތޮއްޑޫގައި މޫސަ އާޓްގެ ފިހާރައެއް ހުންނާނެ، އެއީ އަޅުގަނޑުމެން ސްކޫލްގަ އުޅުނުއިރު ކިޔަވައިދޭން އައި ޓީޗަރެއް، އަޅުގަނޑު އަދި ބޮޑަށް ކުރެހުމުގެ ތެރެއަށް ވަދެވުނީ އޭނަގެ ސަބަބުން،" ކުރެހުމުގެ ތެރެއަށް އޭނާ ވަދެގެން އައި ގޮތް ކިޔައިދިނެވެ.

އާޓިސްޓް އަލީ ކުލަ ޖައްސާފައިވާ ބައެއް ތަކެތި --

ފިހާރައިގައި ބައެއް ފަށާއި ބޭންޑް އެއްޗެހީގައި އަޅުވާފައި ވަނީ ބައެއް މަސްތަކުގެ ކަށްޓާއި ދަތް ބޭނުންކޮށްގެންނެވެ. އެ އެއްޗެއްސަކީ އޭނާ ފީނައިގެން ނަގާ ތަކެއްޗެވެ. ފީނަން ހުންނަ ފޯރީގައި ދެން އުފެދުނީ އެކި ބާވަތުގެ ތަކެތި ހޯދައި އެއްކުރުމުގެ ޝައުގެކެވެ.

ފިހާރައިގެ ތެރޭގައި އަލީގެ އެ "ކަލެކްޝަން" ދައްކާލާފައި ހުރެ އެވެ.

އިސްކުރު ޖަހައި ބިއްލޫރިއަކުން ލައްޕާފައި އަލަމާރިއެއްގައި އެކި ޒާތުގެ މަސްމަހުގެ ކަށިތަކާއި، ދަތާއި، އެކި ޒާތުގެ ބޮލިތައް ހުއްޓެވެ. އެ ކޭސްގައި "ނޮޓް ފޮ ސޭލް" ނުވަތަ މިީ ވިއްކަން ހުރި އެއްޗެހި ނޫން ކަމަށް ކަރުދާހަކުން ލިޔެފައި ތަތްކޮށްފައިވެ އެވެ.

"ބައެއް ގެސްޓުން ވެސް ކުރާ ކަމެއް އެއީ ކަލެކްޝަން، މިހާރު ވެސް މި ފިހާރައިގަ ވެސް ވިއްކަން އެ ހުރީ ކުދިކުދި ފުޅިތަކަށް އަޅައިފަ ފެރިދޫގެ ވެލި، ބައެއް ގެސްޓުން އެއްކުރާނެ އެ ކަހަލަ ފުޅި، ހަނދާނަކަށް، އެދާ ރަށަކުން އެ ރަށެއްގެ ދޮންވެލި ހުންނަ ފުޅިއެއް ހިފައިގެން އެ ލޭބަލްއާއެކު،" އަލީ ބުންޏެވެ.

އަލީ ގެންގުޅޭ ބޮލި އަދި މަސް ކަށިތަކުގެ ކަލެކްޝަން --

ގެސްޓުންނާއި އޭނާގެ ދަރިންނަށް ވެސް ބޮލި ފަދަ ތަކެތި އޮފު ކޮށްފައި ބަހައްޓާފައި ހުންނާތީ އެ މީހުނަށްނަށް ރީތި ވުމުން އަލީގެ އެފަދަ ޝައުގެއް އުފެދުނީ އެވެ. އޭނާގެ އަމާޒަކަށް އޮތީ، ކަލެކްޝަންގައި ވީ އެންމެ ގިނަ ބާވަތެއްގެ ބޮއްޔާއި އެކި ތަކެތި ބެހެއްޓުމެވެ.

"މިހާރު އޭގަ ނެތް ބޮއްޔެއް، ފީނައިގެން މި ވެނި ތަނަކުން ލިބޭ ކަން އެނގެންޏާ، ފީނައިގެން ނަގަން ދަން ހަމަ، ރައްޓެއްސަކު ގެންގުޅޭ ކަން އެނގުނަސް، ބަލަން އެ ލިބޭތޯ، ގަނެގެން ވެސް އެހެން ހުންނާނެ، އެ ކަލެކްޝަނަށް ބޮލި އެއްކޮށްފަ،" އޭނާ ބުންޏެވެ.

ތިރީސް އަހަރެއްހާ ދުވަސްވީ، އަލީގެ އާއިލީ ފިހާރަ ފުރާލާފައި އެ ވަނީ އޭނާގެ ޝައުގު އޮތް ފަންނުވެރި މަސައްކަތްތަކުންނާއި ކަނޑު ދިރުމުގެ ހަޒާނާއަކުންނެވެ.