ހުޅުމާލޭގައި ސީލައިފް ގްލޯބަލްއިން އިމާރާތްކުރަން ހަވާލުވި ފްލެޓުތަކަށް ފައިސާ ނެގުމަށް ފަހު މަޝްރޫއު ކުރިއަށްނުގެންދިޔުމުގެ ސަބަބުން ގެއްލުނު ލިބުނު މީހުންގެ ތެރެއިން ގިނަ ބަޔަކަށް ބަދަލުގެ ގޮތުގައި ހައުސިންޑް ޑިވެލޮޕްމަންޓު ކޯޕަރޭޝަން (އެޗްޑީސީ) އިން އަޅާފައިވާ ހިޔާ ފްލެޓުތަކާއި ވިނަރެސް ފްލެޓުތަކުގެ ޔުނިޓުތައް ދީފި އެވެ.

ހައުސިން ޔުނިޓްތަކަށް ފައިސާ ދެއްކި މީހުންނަށް 2019 ގައި ބަދަލު ނަގައިދިނުމަށް އެދި ސީލައިފާ ދެކޮޅަށް ސިވިލް ކޯޓަށް މައްސަލަ ހުށަހެޅި އެވެ. އެ މައްސަލައާ ގުޅިގެން ސަރުކާރާއި އެޗްޑީސީ އާއެކު ކުރިޔަށް ގެންދިޔަ މަޝްވަރާތަކުގެ ތެރެއިން ޖުލައި 15، 2019, ގައި ސެޓްލްމަންޓު އެއްބަސްވުންތަކެެއް އެކުލަވާލި އެވެ.

"އެޗްޑީސީގެ ރެކޯޑުތައް ކުށް ކަމަށް ނުވަނީ ނަމަ ގާތްގަނޑަކަށް 375 ވަރަކަށް މީހުންނަށް ބަދަލުގެ ގޮތުގައި އެޗްޑީސީން ފައިސާތަކެއް ދޫކުރެވިފައި އެބަހުރި, އެއީ ފްލެޓްތައް ހައްގުވާ ފަރާތްތަކަށް ރީފަންޑު [އަނބުރާ ދެއްކި ފައިސާ ދިނުމުގެ] ގޮތުން," ފަޒުލް ވިދާޅުވި އެވެ.

ސެޓްލްމަންޓު އެއްބަސްވުމުގެ ދަށުން ބަދަލުގެ ގޮތުގައި ސަރުކާރުން ހިންގާ ހައުސިން މަޝްރޫއުއަކުން އެ ފަރާތްތަކަށް ފްލެޓް ކަނޑައެޅުމަށް އޮތީ އެއްބަސްވެފަ އެވެ. ނަމަވެސް, އެ އެއްބަސްވުމުގެ ދަށުން ބަދަލުގެ ގޮތުގައި ފްލެޓު ދިންކަން މީގެކުރިން ހާމަކޮށްފައި ނުވެ އެވެ.

އެ އަދަދަށްވާ ފައިސާ ހަވާލުކުރި ނަމަވެސް, ހިޔާ ފްލެޓާއި ވިނަރެސްގައި ޖާގަތައް ހުރި އިރު ވެސް ސީލައިފް ފްލެޓް ގަތް ފަރާތްތަކަށް ގޮތްތަކެއް ހޯދައިދީފައި ނުވާ ކަމަށް ފަޒުލް ވިދާޅުވި އެވެ. އެ މައްސަލަ ހައްލުކުރަން އެޗްޑީސީގެ ބޯޑުން މަސައްކަތްތަކެއް ކޮށްފައިވާނެ ކަމަށާއި އެކަމާ ގުޅިގެން ކޯޓަކުން ނިންމާފައި އޮތް 203 މީހަކާ ގުޅޭ ތަންފީޒީ އަމުރެއް ވެސް އޮތް ކަމަށް އޭނާ ވިދާޅުވި އެވެ.

"ބޯޑުން ނިންމާފައި ވަނީ އެ 203 މީހުންނަށް ހައްލު ހޯދައި ދިނުމަށް. ހިޔާ ފްލެޓުގައި ބާކީވީ ޔުނިޓުތަކެއް, 60 އެއްހާ ޔުނިޓުތަކެއް ހުރި. މިދިޔަ ދުވަސްތަކުގެ ތެރޭގައި މީގެއިން އެންމެ ފްލެޓެއް ވެސް މި ފަރާތްތަކަށް ނުދީ ހިފެހެއްޓުމަކީ ބޭނުމަކީ ކޮބައިތޯ ސުވާލުކޮށްލަން ބޭނުން. ރައީސްގެ އިރުޝާދާ އެކު ހިޔާ ފްލެޓުން އެ ފަރާތްތަކަށް ފްލެޓް ދީފީމު," ފަޒުލް ވިދާޅުވި އެވެ.

އޭގެ އިތުރުން, ވިނަރެސް ފްލެޓްތަކުގައި ހުރި 123 ޔުނިޓެއް ވެސް އެ ފަރާތްތަކަށް ދިނުމަށް ނިންމާފައިވާ ކަމަށް އޭނާ ވިދާޅުވި އެވެ. އޭގެ ތެރެއިން ބައެއް މީހުންނަށް ލިޔުންތައް ފޮނުވަމުންދާ ކަމަށް ވިދާޅުވި ނަމަވެސް އެ 203 މީހުންގެ ތެރެއިން ފްލެޓް ލިބޭ ޖުމުލަ އަދަދެއް އޭނާ ހާމަނުކުރައްވަ އެވެ.

ސީލައިފް ގްލޯބަލް އިން ހުޅުމާލޭގައި 3،000 ހައުސިން ޔުނިޓް އެޅުމަށް އެޗްޑީސީއިން 2014 ވަނަ ހަވާލުކުރި މަޝްރޫއުގެ ދަށުން ފްލެޓު ގަތުމަށް ގިނަ ބަޔަކު 50،000ރ. ދައްކާފައިވެ އެވެ. އެކަމަކު، އެ މަޝްރޫއު ކުރިޔަށް ނުގެންދެވި މަޑުޖެހުމާއެކު އެއްބަސްވުން ވަނީ ބާތިލުކޮށްފަ އެވެ.

ގިނަ ބަޔަކަށް އޮޅުވާލައި ހިޔާނާތްތެރިވި މައްސަލައިގައި ސީލައިފްގެ އެމްޑީޕީ އަހުމަދު މޫސާ މުހައްމަދު ހޯދަން މީގެ ކުރިން އިންޓަޕޯލް ރެޑް ނޯޓިސް ވެސް ނެރުނެވެ. އޭނާ ލަންކާގައި ފިލައިގެން އުޅެނިކޮށް ހައްޔަރުކޮށްގެން ގެނެސް މިހާރު ވަނީ 42 ދައުވާއެއް އޭނާގެ މައްޗަށް އުފުލައިފަ އެވެ. އެ މައްސަލައިގެ ޝަރީއަތް ކްރިމިނަލް ކޯޓުގައި ކުރިއަށްދެ އެވެ.