މެޑްރިޑް (ފެބްރުއަރީ 3) - ރެއާލް މެޑްރިޑްގެ މިޑްފީލްޑަރު، ޖޫޑް ބެލިންހަމް އެންމެ ފަހުން ކުޅުނު މެޗުގައި ގެޓަފޭގެ ފޯވާޑް، މޭސަން ގްރީންވުޑްއާ ދިމާކޮށްލި މައްސަލަ ސްޕެނިޝް ލީގުން ބަލަން ފަށައިފި އެވެ.

ލީގުގައި ގެޓަފޭ އަތުން ރެއާލް 2-0 އިން މޮޅުވި މެޗުގައި ގްރީންވުޑް ރުޅި އަރުވާލުމުގެ ގޮތުން އޭނާއާ ދިމާލަށް ބެލިންހަމް ވަނީ ވާހަކަ ތަކެއް ދައްކައިފަ އެވެ. އެ ވަގުތު ގްރީންވުޑާ ދިމާލަށް ބެލިންހަމް، "ރޭޕިސްޓް" އޭ ބުނާ އަޑު ވީޑިއޯ އަށް އަރާ ކަމަށް ބުނެ، ގެޓަފޭ އިން ވަނީ އެ މައްސަލަ ބަލައިދޭން ލަލީގާ އަށް ހުށަހަޅައިފަ އެވެ.

އެ މައްސަލަ ބަލަމުން އަންނަ ކަމަށް ލަލީގާ އިން ވަނީ ހާމަކޮށްފަ އެވެ.

ރޭޕުގެ ތުހުމަތު އަމާޒުވެ، ގްރީންވުޑް އަށް ދިގު މުއްދަތަކަށް ކުޅުމާ ދުރުގައި ހުންނަން ޖެހުުނުއިރު، އެ މައްސަލައިގެ ދައުވާ ކުރި ފަރާތުން އަނބުރާ މައްސަލަ ގެންދިއުމުން ގްރީންވުޑް ވަނީ ސަލާމަތްވެފަ އެވެ. އެ މައްސަލައިގައި ޔުނައިޓެޑުން ވަކި ތަހުގީގެއް ހިންގައި، ނިންމީ އެ ކްލަބުން ގްރީންވުޑް އަށް ފުރުސަތެއް ނުދީ ލޯނަކަށް އޭނާ ދޫކޮށްލާށެވެ.

ގްރީންވުޑް، ލޯން އެއްބަސްވުމެއްގައި ގެޓަފޭއާ ގުޅުނީ ސެޕްޓެމްބަރު މަހު އެއް ވަނަ ދުވަހު އެވެ. ގްރީންވުޑް ވަނީ މިހާތަނަށް ގެޓަފޭ އަށް ކުޅުނު 21 މެޗުން ހަ ލަނޑު ޖަހައިފަ އެވެ. ހަ މަހުގެ ލޯނެއްގައި ގެޓަފޭ އަށް ކުޅޭ ގްރީންވުޑް، ޔުނައިޓެޑާ އެކު ހުރި ކޮންޓްރެކްޓް ހަމަވާނީ އަންނަ އަހަރު ޖޫންގެ ނިޔަލަށެވެ.

ބޮރޫޝިއާ ޑޯޓްމަންޑް ދޫކޮށް، 130 މިލިއަން ޑޮލަރުގެ ޑީލެއްގައި ރެއާލަށް މި ސީޒަނުގައި ބަދަލުވި ބެލިންހަމް އަންނަނީ އެ ޓީމަށް މޮޅު ކުޅުމެއް ދައްކަމުންނެވެ. ރެއާލަށް ކުޅެދިން 27 މެޗުން ވަނީ 18 ގޯލު ޖަހައިފަ އެވެ.