ދެ ވަނަ ޑިވިޝަން ފުޓްބޯޅަ މުބާރާތުގައި ކުޅުނު ފުރަތަމަ މެޗުން މަސްއޮޑި ސްޕޯޓްސް ކްލަބްގެ ކެޕްޓަން، އިބްރާހިމް ވަހީދު ހަސަން (އިއްބެ)، 492 ދުވަހަށް ފަހު ރަސްމީކޮށް ކްލަބް ފުޓްބޯޅަ މެޗަކަށް ނުކުމެ، މުހިންމު ގޯލެއް ޖަހައި، އެ ޓީމު، 4-0 އިން މަހިބަދޫ ސްޕޯޓްސް ކްލަބް އަތުން މޮޅުކޮށްދިނުމުގައި އިސް ރޯލެއް އަދާކޮށްފި އެވެ.

މިއީ، މިދިޔަ އަހަރުގެ އޮގަސްޓް މަހުގެ، 22 ވަނަ ދުވަހު، މިދިޔަ ސީޒަނުގެ އެފްއޭ ކަޕް ފައިނަލުގައި މާޒިޔާ ސްޕޯޓްސް އެންޑް ރެކްރިއޭޝަނާއި ކްލަބް ވެލެންސިއާ ބައްދަލުކުރި މެޗަށް ފަހު، އިއްބެ ރަސްމީ ޑިވިޝަނެއްގެ ކްލަބް މެޗެއްގައި ފެނުނު ފުރަތަމަ ފަހަރެެވެ. އިއްބެ، އެ މެޗުގައި މާޒިޔާ އަށް ކުޅެން އެރީ ބަދަލެއްގެ ގޮތުގަ އެވެ.

މި ސީޒަނުގައި، ލޯން އެއްބަސްވުމެއްގެ ދަށުން، އިއްބެ އެންމެ ފުރަތަމަ ގުޅުނީ ވެލެންސިއާއާ އެވެ. އެ ޓީމާ އެކު، ޕްރީ ސީޒަން ޕްރެކްޓިހަށް ނުކުމެ، ސީޒަން ތެރޭގައި ވެސް މަސައްކަތް ކުރި އެވެ.

އެކަމަކު، ކުޅުންތެރިންނަށް މުސާރަ ނުދޭ މައްސަލައިގައި ވެލެންސިއާ އަށް ފީފާ އިން ދީފައިވާ ސަސްޕެންޝަނުގެ ސަބަބުން އެ ޓީމަށް އިއްބެ އާއި އެ ނޫން ދިވެހި ކުޅުންތެރިއަކު ވެސް ރަޖިސްޓްރީ ނުކުރެވުނެވެ. ދެ ޓްރާންސްފާ ޕީރިއަޑް ދިޔައިރު ވެސް އިއްބެ އަށް ވެލެންސިއާ ޓީމަށް ކުޅެވޭ ގޮތެއްނުވި އެވެ.

ސާފް ޗެމްޕިއަންޝިޕްގައި ރާއްޖޭން ބޫޓާން ބަލިކުރި މެޗުގެ ތެރެއިން އިއްބެ.--- ފޮޓޯ: އަބްދުﷲ އިޔާން/ އަދަދު

އެކަމަކު، އިއްބެ ވަނީ ޖޫން/ޖުލައި މަހު، އިންޑިއާގެ ބެންގަލޫރުގައި ކުރިއަށްދިޔަ ސާފް ޗެމްޕިއަންޝިޕް ފުޓްބޯޅަ މުބާރާތުގައި ގައުމީ ފުޓްބޯޅަ ޓީމަށް ކުޅެފަ އެވެ. ގައުމީ ޓީމުގެ ފުރަތަމަ އެގާރައިގައި ހިމެނިގެން ވެސް އިއްބެ ވަނީ އެ މުބާރާތުގައި ކުޅެފަ އެވެ.

ކްލަބް ލެވަލްގައި އަހަރަކަށް ވުރެ ގިނަ ދުވަހު ރަސްމީ މެޗެއްގައި އިއްބެ އަށް ނުކުޅެވުނު މައިގަނޑު އެއް ސަބަބަކީ ވެލެންސިއާ އިން އޭނާގެ ރަޖިސްޓްރޭޝަން ކަންކަން ފުރިހަމަ ކޮށްދޭނެ ކަމަށް ބުނެ، އެކަން ފުރިހަމަ ކޮށްދެވޭގޮތެއްނުވުމުންނެވެ.

މާޒިޔާ އާއި ޓީސީ ސްޕޯޓްސް ކްލަބަށް ކުޅެފައިވާ އިއްބެ މި ވަނީ، މަސްއޮޑި ސްޕޯޓްސް ކްލަބަށް ބަދަލުވުމަށް ފަހު، މި ސީޒަނުގެ ދެ ވަނަ ޑިވިޝަނުގެ ފުރަތަމަ ގޯލު ޖަހައިފަ އެވެ.

ފުރަތަމަ ޑިވިޝަނުގައި ވެސް ތަފާތު ދައްކާފައިވާ، އިއްބެ، މިއަދުގެ މެޗުގެ ފުރަތަމަ ގޯލު ޖެހީ، ފުރަތަމަ ހާފުގެ ފަހުކޮޅުގަ އެވެ.

މަސްއޮޑިން ކުރި އެޓޭކެއްގައި މަހިބަދޫ ސްޕޯޓްސް ކްލަބްގެ އޭރިއާތެރެއިން ލިބުނު ބޯޅައެއް އިއްބެ ވަނީ މަހިބަދޫގެ ގޯލްކީޕަރު، އަހުމަދު ނައުފަލް އަތުގައި ޖައްސާފައި ގޯލަށް ފޮނުވާލައިފަ އެވެ.

މިއަދުގެ މެޗުގައި އިއްބެ، ވަނީ މަސްއޮޑި ޓީމުގެ އެޓޭކުގައި މުހިންމު ދައުރެއް އަދާކޮށްފަ އެވެ.

މަހިބަދޫ ޓީމުގެ ނުހާދު (ކ) ކައިިރިން މަސްއޮޑި ޓީމުގެ ޒިޔާން ބޯޅަ ހިފައިގެންދަނީ.---- ފޮޓޯ: އަބްދުﷲ އިޔާން/ އަދަދު

ފުރަތަމަ ޑިވިޝަނުގައި ކުޅެފައި ތިބި ގިނަ ކުޅުންތެރިން ހިމެނޭ މަސްއޮޑި ޓީމުގެ ކެޕްޓަން ބޭންޑް ހަވާލުކޮށްފައިވަނީ އިއްބެއާ އެވެ.

މަސްއޮޑި ޓީމުގައި ހިމެނޭ ކުޅުންތެރިންނަށް ބަަލާއިރު، މީގެ ދޮޅު އަހަރު ކުރިން ޕްރޮފެޝަނަލް ފުޓްބޯޅައިން ރިޓަޔާކުރި ފުލްބެކް، މުހައްމަދު ރަޝީދު (ހޮކޭ) ހިމެނެ އެވެ. ހޮކޭ އަކީ ފުރަތަމަ ޑިވިޝަން ގިނަ ކްލަބްތަކެއްގެ ކެޕްޓަންކަން ކުރި ކުޅުންތެރިއެކެވެ.

ތަޖުރިބާކާރު ކޯޗު މުހައްމަދު އާތިފް (އާތީ)ގެ ކޯޗުކަމުގައި ކުޅޭ މަސްއޮޑިން ފަހު ލަނޑުތައް ޖެހީ ދެ ވަނަ ހާފުގަ އެވެ.

އެ ގޮތުން، މެޗުގެ 72 ވަނަ މިނިޓްގައި މަސްއޮޑި ޓީމުގެ ދެ ވަނަ ލަނޑު ޖެހީ، ކުރިން ކްލަބް އީގަލްސް އަށް ކުޅުނު އަބްދުﷲ ޒިޔާން (ޖަންކީ) އެވެ. އޭގެ ދެ މިނިޓް ފަހުން، ޕެނަލްޓީ އަކުން މަސްއޮޑީގެ ތިން ވަނަ ގޯލު ޖެހީ ބިދޭސީ ކުުޅުންތެރިޔާ، އިސްލާމް ފިކްރީ އެވެ.

މެޗުގެ އިތުރު ވަގުތުގައި، މަސްއޮޑި ޓީމުގެ ފަހު ގޯލު ޖެހީ ހުސެއިން ޝަރީފް އެވެ. އޭނާ މި ލަނޑު ޖެހީ ފުރަތަމަ ފޮނުވާލި ބޯޅަ ކީޕަރު ނައުފަލް އަތުގައި ޖެހިފައި ނުކުތް ވަގުތު ރީބައުންސަކުންނެވެ.

ގްރޫޕް އޭގައި މަސްއޮޑި އާއި މަހިބަދޫގެ އިތުރުން ދެން އޮތީ ޖޭޖޭ ސްޕޯޓްސް ކްލަބް، ކުޑަހެންވޭރު ޔުނައިޓެޑް އަދި އެލްޓީ ސްޕޯޓްސް ކްލަބް އެވެ. މުބާރާތުގައި މާދަމާ ހަވީރު 3:50 ގައި ފަށާ މެޗުގައި، ބީޖީ ސްޕޯޓްސް ކްލަބް ކުޅޭނީ ޓެންޓް ސްޕޯޓްސް ކްލަބާ އެވެ.