މާޒިޔާ ސްޕޯޓްސް އެންޑް ރެކްރިއޭޝަންގެ ކޮންޓްރެކްޓްގައި ހުރި އިބްރާހިމް ވަހީދު ހަސަން (އިއްބެ)، ލޯން އެއްބަސްވުމެއްގެ ދަށުން މި ފަހަރު ފުރަތަމަ ޑިވިޝަނުގައި އަލަށް ވާދަކުރާ އޮޑި ސްޕޯޓްސް ކްލަބަށް ބަދަލުވެއްޖެ އެވެ.

މިދިޔަ ސީޒަނުގައި ވެސް އިއްބެ ވަނީ ލޯން ޑީލެއްގެ ދަށުން އޮޑި އަށް ކުޅެފަ އެވެ. މަސް އޮޑި ސްޕޯޓްސް ކްލަބްގެ ނަމުގައި މިދިޔަ ސީޒަނުގައި ދެ ވަނަ ޑިވިޝަނުގައި ވާދަކޮށް މުބާރާތުގެ ޗެމްޕިއަންކަން، އެ ޓީމުން ހޯދީ އިއްބެގެ ކެޕްޓަންކަމުގަ އެވެ.

އޮޑި ސްޕޯޓްސް ކްލަބުން މިއަދު އާންމުކުރި ޕޯސްޓެއްގައި ބުނެފައިވަނީ، އިއްބެ އެ ޓީމަށް ގެންނަން މާޒިޔާއާ އެކު އެއްބަސްވުމަކަށް އަތުވެފައިވާ ކަމަށެވެ.

އިއްބެ މިދިޔަ ސީޒަނުގެ ދެ ވަނަ ޑިވިޝަނުގެ ތަށި އުފުލާލަނީ.

ނިއު ރޭޑިއަންޓް ސްޕޯޓްސް ކްލަބްގެ ޒުވާން ޓީމަށާއި ސީނިއާ ޓީމަށް ވެސް ކުޅުނު އިއްބެގެ ކުޅުން ފާހަގަވާން ފެށީ ޓީސީ ސްޕޯޓްސް ކްލަބް ފުރަތަމަ ޑިވިޝަނުގައި ވާދަކުރަން ފެށި ފަހުންނެވެ. އޭނާ ވަނީ ޓީސީއާ އެކު، ބަންގްލަދޭޝްގައި ބޭއްވި ޝެއިހް ކަމާލް ކަޕް 2017 ވަނަ އަހަރު ކާމިޔާބުކޮށްފަ އެވެ. އަދި 2018 ވަނަ އަހަރު، ބަންގްލަދޭޝްގައި ބޭއްވި ސާފް ޗެމްޕިއަންޝިޕްގެ ޗެމްޕިއަންކަން ރާއްޖޭން ހޯދިއިރު، އިއްބެ އަކީ ޓީމުގެ މުހިންމު މެމްބަރެކެވެ.

ޓީސީ އަށް ދިވެހި ޕްރިމިއާ ލީގުގެ ޗެމްޕިއަންކަން ހޯދައިދޭން އެހީތެރިވުމަށް ފަހު، އިއްބެ އެ ޓީމު ދޫކޮށްލީ 2019 ވަނަ އަހަރު އެވެ. އެ ފަހުން، މާޒިޔާ އަށް ކުޅެމުން އައިއިރު، މިދިޔަ ސީޒަނުގައި ލޯން އެއްބަސްވުމެއްގެ ދަށުން ފުރަތަމަ ކްލަބް ވެލެންސިއާއާ ވެސް ގުޅުނެވެ. އެކަމަކު، އެ ޓީމު ޓްރާންސްފާ ބޭން އެއްގައި އޮތުމުން، އިއްބެ އަށް އެއްވެސް މެޗެއް ނުކުޅެވުނެވެ. އެހެންވެ، ފަހުން، އޭނާ ބަދަލުވީ އޮޑި ސްޕޯޓްސް ކްލަބް އަށެވެ.

ކުރިއަށް އޮތް ސީޒަނުގައި ވެސް އިއްބެ ފެންނާނީ އޮޑި ސްޕޯޓްސް ކްލަބުންނެވެ.

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ އެންމެ ފަހުން އޮތް އިންތިހާބީ ކޮމީޓީގެ ދައުރު ހަމަވުމުން، މި ވަގުތު ފުޓްބޯޅަ އޮތީ ވާނުވާއެއްގަ އެވެ. ކުރިއަށްދާނެ ގޮތެއް ފީފާ އިން އަންގަންދެން ފުޓްބޯޅައިގެ ކަންކަން މަޑުޖެހިފައި އޮތްއިރު، ސީޒަން ފަށާނެ ދުވަހެއް ނޭނގެ އެވެ. އެންމެ ފުރަތަމަ ސީޒަން ފަށަން ކަނޑައެޅީ މިދިޔަ މަހުގެ 15 ވަނަ ދުވަހު އެވެ.