ހައްޖަށް ގެންދިއުމަށް މީހުންގެ އަތުން ނަގާ އަގު ކޮންޓްރޯލް ކުރުމަށް، ރާއްޖެއަށް ލިބޭ ހުރިހާ ހައްޖު ކޯޓާއެއް ހައްޖު ކޯޕަރޭޝަނަށް ދޭން ނިންމައިފި އެވެ.

މިއަދު ބޭއްވި ކެބިނެޓް ބައްދަލުވުމުގެ މައުލޫމާތުދޭން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ސަރުކާރުގެ ތަރުޖަމާނު މުހައްމަދު ޝަހީބް ވިދާޅުވީ، ހައްޖު ކޯޕަރޭޝަނަށް ނޫން އެހެން އެއްވެސް ކުންފުންޏަކަށް މީހުން ހައްޖަށް ދިއުމަށް ކޯޓާ ނުދޭން ކެބިނެޓުން މިއަދު ނިންމާފައިވާ ކަމަށެވެ.

ހައްޖަށް މީހުން ގެންދިއުމުގެ އަގު ހެޔޮކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. ކެމްޕޭނުގެ ތެރޭގައި އެމަނިކުފާނު ވައުދުވެވަޑައިގަތީ ހައްޖު ކޯޕަރޭޝަން ހަރުދަނާކޮށް، ހައްޖަށް ދިއުމަށް އާންމުން ހޭދަކުރާ އަގު ކުޑަކޮށްދެއްވުމަށެވެ.

"ހައްޖު ފަންޑުން އިންވެސްޓުކޮށް ނަފާ ހޯދައި މާލީ ގޮތުން ވަރުގަދަ ކުންފުންޏަކަށް ހަދަންޖެހޭ. އޭރުން ހައްޖަށް ދާ އަގުތައް ކުޑަވެގެންދާނެ،" ރައީސް މުއިއްޒު ކެމްޕޭނުގައި މ. މުލަކަށް ވަޑައިގެން ބޭއްވި ޖަލްސާގައި ވިދާޅުވި އެވެ.

ރައީސް އޭރު ވިދާޅުވީ އެމަނިކުފާނު ވެރިކަމުގެ ފުރަތަމަ އަހަރު ވެސް ހައްޖުގެ އަގު ކުޑަވެގެން ދާނެ ކަމަށެވެ. އަދި ފޯރުންތެރިކަން ދަށް މީހުންނަށް، ބަހާލައިގެން ހައްޖުގެ އަގު ދެއްކޭނެ ގޮތް ހަދާނެކަމަށް ވެސް އޭރު ވިދާޅުވި އެވެ. މިހާރުވެސް ހައްޖަށް ދިއުމަށް ބަހާލައިގެން ފައިސާ ދެއްކެ އެވެ.

ވެރިކަމުގެ ދައުރުގެ ތެރޭގައި 1000 ފަގީރުން ހައްޖަށް ފޮނުވުމަކީވެސް ރައީސްގެ ވައުދުފުޅެކެވެ. އަންނަ އަހަރު 50 މީހުން ހިލޭ ހައްޖަށް ފޮނުވުމުގެ އިންތިޒާމް ހަމަޖެއްސުމުގެ މަަސައްކަތް ކުރާކަަމަށް ސަރުކާރުން މީގެ ކުރިން ހާމަކުރި އެވެ.