މަޖިލީހުގެ ނައިބު ރައީސްކަމުގެ މަގާމުން އީވާ އަބްދުﷲ ވަކި ކުރުމުގެ ގަރާރުގެ މަސައްކަތް ފަށައިފި އެވެ.

އެމްޑީޕީގެ 50 މެމްބަރަކު ސޮއިކުރައްވައި ނައިބުރައީސްކަމުން އީވާ ވަކިކުރަން ހުށަހެޅި ގަރާރު މިއަދުގެ ޖަލްސާގައި މަޖިލީހަށް އިއްވެވީ ދުވާފަރު ދާއިރާގެ މެމްބަރު އިސްމާއިލް އަހުމަދެވެ.

އެ ގަރާރުގައިވާ ގޮތުން، އީވާގެ މައްޗަށް އޮތް އިތުބާރު ގެއްލުނީ އެމްޑީޕީގެ މެމްބަރެއްގެ ގޮތުގައި މަޖިލީހަށް ހޮވިވަޑައިގެން، ނައިބު ރައީސް ކަމަށް އިންތިހާބު ކޮށްފައި ވަނިކޮށް އެޕާޓީން ވަކިވެވަޑައިގެންނެވުމުންނެވެ.

ގަރާރަށް ބަހުސް ކުރުމަށް ދެ ގަޑިއިރު ދިނުމަށް މަޖިލީހުގެ އާންމު ކޮމިޓީން ވަނީ ފާސްކޮށްފަ އެވެ.

އިދިކޮޅު މައި ޕާޓީ އެމްޑީޕީގެ 50 މެންބަރުންގެ ސޮޔާ އެކު އީވާގެ އިތުބާރު ނެތް ކަމުގެ ގަރާރު މަޖިލީހަށް ހުށަހެޅީ މިދިޔަ މަހުގެ 16 ވަނަ ދުވަހު އެވެ. އީވާގެ އިތުބާރު ނެތް މައްސަލަ މަޖިލީހަށް ވެއްދީ، މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް މައްސަލައެއް ހުށަހަޅާފައިވަނިކޮށެވެ.

ނަޝީދުގެ މައްސަލަ ކުރިއަށް ގެންދިޔަ ޖަލްސާގެ ރިޔާސަތު ބަލަހައްޓަވަން އީވާ އެ ދުވަހު ވަޑައިގެންނެވުމުން އެމްޑީޕީގެ މެމްބަރުން ވަނީ ތަޅުމުގައި ނުރުހުން ފާޅުކޮށްފަ އެވެ.

މި މަހު 13 ގައި އެ މައްސަލަ ކުރިއަށް ގެންދަން ޖަލްސާ ފެށުމާއެކު ނަޝީދު ވަނީ އިސްތިއުފާ ދެއްވާފަ އެވެ.