ރައްޔިތުންގެ މަޖިލީހުގެ ނައިބު ރައީސް ކަމުން ގަލޮޅު އުތުރު ދާއިރާގެ މެންބަރު އީވާ އަބްދުﷲ ވަކިކުރަން މަޖިލީހުގެ 50 މެންބަރުންގެ ސޮޔާއެކު މަޖިލީހަށް ގަރާރެއް ހުށަހަޅައިފި އެވެ.

އީވާ ވަކިކުރުމުގެ ގަރާރުގައި ސޮއިކުރެއްވީ އެމްޑީޕީގެ 49 މެންބަރުންނާއި، އަމިއްލަ މެންބަރެއްގެ ގޮތުގައި އިންނަވާ ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުﷲ އެވެ.

އީވާގެ އިތުބާރު ނެތް މައްސަލަ މަޖިލީހަށް މި ވެއްދީ، މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް މައްސަލައެއް ހުށަހަޅާފައިވަނިކޮށެވެ.

މަޖިލީހުގެ ނައިބުރައީސްކަމުން އީވާ ވަކިކުރަން އެމްޑީޕީން ހުށަހެޅި އިރު މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރަން އެމްޑީޕީން ހުށަހެޅި މައްސަލަ އިއްޔެއާއި މިއަދު ވެސް މަޖިލީހަށް އެެޖެންޑާކުރި އެވެ. އެހެން ނަމަވެސް އެ މައްސަލަ އިއްޔެއާއި މިއަދު ވެސް ކުރިއަށް ގެންދެވޭ ގޮތް ނުވީ އެމްޑީޕީން ތުހުމަތުކުރާ ގޮތުގައި ނައިބު ރައީސް އީވާ ހުރަސް އަޅުއްވާތީ އެވެ.

ނަޝީދުގެ މައްސަލަ ކުރިއަށް ގެންދާ ޖަލްސާގެ ރިޔާސަތު ބަލަހައްޓަވަން އީވާ މިއަދު ވަޑައިގެންނެވުމުން އެމްޑީޕީގެ މެމްބަރުން ގެންދަވަނީ ތަޅުމުގައި ނުރުހުން ފާޅުކުރައްވަމުންނެވެ.

މިހާރު އުފެދިގެން އުޅޭ ހިޔާލު ތަފާތު ވުމަކީ ނަޝީދު ވަކިކުރަން އެމްޑީޕީން ހުށަހެޅި ގަރާރު، މަޖިލީހުގެ ގަވައިދާ ހިލާފު ކަމަށް އިއްޔެގެ ފުރަތަމަ ޖަލްސާގެ ރިޔާސަތު ބެލެހެއްޓެވި، ވިލުފުށި ދާއިރާގެ މެމްބަރު ހަސަން އަފީފު ނިންމެވުމުންނެވެ.

އެ ގަރާރު ގަވައިދާ ހިލާފު ކަމަށް ވިދާޅުވެ، އަފީފު ޖަލްސާ ނިންމަވައިލެއްވުމުން މަޖިލީހުގެ ސެކްރެޓޭރިއަޓުން އިއްޔެ ދެވަނަ ޖަލްސާއެއް ތާވަލުކުރި އިރު އެ ޖަލްސާގެ ރިޔާސަތަށް ވަޑައިގެންނެވީ އީވާ އެވެ. އީވާ ޖަލްސާ ނިންމަވައިލެއްވީ އަފީފުގެ ނިންމެވުން ރަނގަޅު ކަމަށް ވިދާޅުވެފަ އެވެ.

ނަޝީދު ވަކިކުރަން އެމްޑީޕީން ހުށަހެޅި ގަރާރާ މެދު އީވާއާއި އަފީފު އަމަލުކުރެއްވި ގޮތުގެ ކަންބޮޑުވުމާ އެކު މަޖިލީހުގެ އިމްތިޔާޒާއި ސުލޫކު ކޮމިޓީން އިއްޔެ ބައްދަލުވުމެއް ބޭއްވި އެވެ. އެ ކޮމިޓީން ނިންމީ ގަރާރު ބޭރުކޮށްލީ ގަވައިދާ ހިލާފަށް ކަމަށާއި މަޖިލީހުގެ ނައިބުރައީސް އީވާ އަބްދުﷲ އާއި ވިލުފުށި ދާއިރާގެ މެމްބަރު ހަސަން އަފީފު މެމްބަރުންގެ "އިމްތިޔާޒްތަކަށް އަރައިގަތް ކަމަށެވެ.