ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށްގެންދިޔުމުގެ ފުރުސަތު ނުދީ ހުއްޓުވާފައިވާއިރު މަޖިލިސް މެމްބަރުން ތަޅުމުގައި ކުރަމުންދާ އިހުތިޖާޖަށް ހައްލެއް ހޯދުމުގެ ބާރު އޮތް މަޖިލީހުގެ އަމީންއާންމު ފާތިމަތު ނިޔުޝާ އެކަމަށް ހައްލެއް ނުދެއްވާތީ މުޅި މަޖިލިސް ހުއްޓިއްޖެ އެވެ.

މިއަދު މަޖިލީހަށް ދެ ޖަލްސާއެއް އެޖެންޑާ ކުރި އެވެ. އެއް ޖަލްސާއަކީ ބަޖެޓު ހުށަހަޅަން އޮތް ޖަލްސާ އެވެ. އެ ޖަލްސާއަށް ފިނޭންސް މިނިސްޓަރު އިބްރާހިމް އަމީރު ސަލާމް ފޮނުއްވިއިރު ކޯރަމް ހަމަނުވެގެން ޖަލްސާ މެދުކަނޑާލީ އެވެ.

ދެވަނަ ޖަލްސާ ކުރިއަށްނުގެންދެވި މަޖިލިސް ހުއްޓުނީ ރިޔާސަތު ބަލަހައްޓާނެ މެމްބަރަކާ މެދު ވެސް ހިޔާލު ތަފާތުވުންތަކެއް ހުއްޓަ އެވެ. ނައިބު ރައީސް އީވާ އަބްދުالله ރިޔާސަތުގައި އިންނެވިރު އޭނާއަށް އެ ތަނުގައި ނީނދެވޭނެ ކަމަށް އެމްޑީޕީގެ މެމްބަރުން ދަނީ ބުނަމުންނެވެ.

އާންމު ކޮމިޓީން ވެސް ވަނީ ނަޝީދުގެ އިތުބާރު ނެތްކަމުގެ މައްސަލަ ކުރިއަށްގެންދާނަމަ ރިޔާސަތުގައި އީވާ އާއި އަފީފަށް ނީނދެވޭނެ ކަމަށް ކޮމިޓީގެ ލަފައެއްގެ ގޮތުގައި ފާސްކޮށްފަ އެވެ. އެ ލަފައަށް އަމީންއާންމު އަމަލުކުރުން މަޖުބޫރެއް ނޫނެވެ.

އެމްޑީޕީގެ މެމްބަރުން ދެކޭ ގޮތުގައި މަސްލަހަތު ފުށުއަރާތީ އީވާއަށް ރިޔާސަތުގައި ނީނދެވޭނެ އެވެ. އެ މެމްބަރުން ދެކެވަޑައިގަންނަވާ ގޮތުގައި ނަޝީދު ވަކިކުރުމުގެ ޖަލްސާގެ ރިޔާސަތުގައި އިންނަވަން ޖެހޭނީ މަރަދޫ ދާއިރާގެ މެމްބަރު އިބްރާހިމް ޝަރީފެވެ. ޖަލްސާ ފެށިއިރު ރިޔާސަތުގެ މޭޒުކޮޅު ކައިރީގައި ޝަރީފް ހުންނެވި އެވެ.

ރިޔާސަތު ބަލަހައްޓަވާނެ މެމްބަރަކާ ގުޅޭގޮތުން ހިލާފުތަކެއް އުފެދިފައިވާއިރު އެކަމާ ގުޅޭގޮތުން އަމީންއާންމު ތަޅުމުގައި އެއްވެސް އެއްޗެއް ވިދާޅުވެފައެއް ނުވެ އެވެ.

އުފެދިފައިވާ މައްސަލައާ ގުޅިގެން ބަހެއް ހޯދުމަށް "އަދަދު" ނޫހުން ތަކުރާރުކޮށް ނިޔުޝާއަށް ގުޅައި މެސެޖުކޮށް ހެދި ނަމަވެސް އެއްވެސް ބަހެއް ލިބިފައި ނުވެ އެވެ.