ކޮރަޕްޝަނުގެ ތުހުމަތުތަކެއް ކުރެވިފައި ވަނިކޮށް ޕޯޗުގަލްގެ ބޮޑުވަޒީރު އެންޓޯނިއޯ ކޮސްޓާ އިސްތިއުފާ ދެއްވުމާއި ގުޅިގެން އެ ގައުމުގެ މަޖިލިސް އުވާލައި އާންމު އިންތިހާބު މާޗު މަހު ބާއްވާނެ ކަމަށް އެ ގައުމުގެ ރައީސް މާސެލޯ ރެބެލޯ ޑެސޫޒާ އިއުލާން ކުރައްވައިފި އެވެ.

މިއީ ޕޯޗުގަލްގައި އެއް އަހަރުގެ ތެރޭގައި ބާއްވާނެ ދެވަނަ އިންތިހާބު ކަމަށްވާއިރު ވޯޓުލުން އޮންނާނީ މާޗު 2024, ގަ އެވެ. ޕޯޗުގަލްގެ އިދިކޮޅު ޕާޓީތަކުން ވަނީ ވަގުތުން ވަގުތަށް އެ ގައުމުގެ ސަރުކާރު އިސްތިއުފާ ދިނުމަށް ގޮވާލާފަ އެވެ.

މަޖިލިސް އުވާލަން ނިންމެވި ނަމަވެސް އެކަން ކުރައްވާނީ 2024 ގެ ބަޖެޓު އެ މަޖިލީހުން ފާސްކުރުމުން ކަމަށް ރައީސް މާސެލޯ ވިދާޅުވި އެވެ. މިވަގުތު މަޖިލީހުގެ މެޖޯރިޓީ ޕާޓީއެއްގެ ގޮތުގައި އޮތީ ވެރިކަން ކުރާ ސޯޝަލިސްޓު ޕާޓީ އެވެ.

ޕޯޗުގަލްގެ ގާނޫނުއަސާސީގައިވާ ގޮތުން މަޖިލިސް އުވާލާތާ 60 ދުވަހުގެ ތެރޭގައި އިންތިހާބު ބާއްވަން ޖެހެ އެވެ.

ލިތިއަމް މައިން ކުރުމާއި ހައިޑްރޮޖެން އުފެއްދުމަށް އެ ގައުމުގައި ކުރިއަށް ގެންގޮސްފައިވާ ޕްރޮޖެކްޓުތަކެއްގައި ކޮރަޕްޝަނުގެ އަމަލުތަކެއް ހިމެނޭ ކަމަށް ބެލެވި ބޮޑުވަޒީރު ކޮސްޓާގެ ޗީފް އޮފް ސްޓާފް ވެސް ޕްރޮސެކިއުޓަރުން ވަނީ ހައްޔަރުކޮށްފަ އެވެ. ކޮސްޓާ އިސްތިއުފާ ދެއްވާފައި ވަނީ އޭގެ ގަޑިއިރުތަކެއް ފަހުންނެވެ.

މިހާރު ކުރިއަށްދާ ތަހުގީގު ދަށުން ސަރުކާރުގެ ބައެއް އޮފީސްތަކާއި އެހެނިހެން ބައެއް ތަންތަން ވެސް ވަނީ ބަލައި ފާސްކޮށްފަ އެވެ.