ލިޒްބަން (އޮގަސްޓް 8) - އެކާވީސް ވަނަ ގަރުނުގައި ފެނުނު އެންމެ ތަފާތު އެއް ޑިފެންޑަރު ކަމަށްވާ ޕޯޗުގަލްގެ ޕެޕޭ، އުމުރުން 41 އަހަރުގައި ޕްރޮފެޝަނަލް ފުޓްބޯޅައިން ރިޓަޔާކޮށްފި އެވެ.

ފުޓްބޯޅައިގައި ގިނަ ކާމިޔާބީތަކެއް ހޯދި ޕެޕޭ، ރިޓަޔާކުރަން ނިންމިކަން އިއުލާނުކުރީ މިރޭ އޮންލައިންކޮށް ކުރި 33 މިނިޓްގެ ވީޑިއޯ ޕޯސްޓެއް މެދުވެރިކޮށެވެ.

ޕެޕޭ ވަނީ ފުޓްބޯޅައިގައި އޭނާ އަށް އެހީތެރިވި ކޮންމެ މީހަކަށް ވަކިވަކިން ޝުކުރުއަދާުކުރާ ކަމަށާއި ކުޅުން ހުއްޓާލަން ނިންމި ނިންމުމާ އެކީގައި ހަޔާތުގެ ބޮޑުބަޔެއްގެ ނިމުން އައި ކަމުގެ އިހުސާސް ކުރެވިފައިވާ ކަމަށް ބުނެފަ އެވެ. އަދި ފުޓްބޯޅައިގެ ފަހުރުވެރި އަދި އުފާވެރި ހަނދާންތައް އަބަދުވެސް އޭނާގެ ހިތާއި ސިކުނޑީގައި ދިރިދިރި ހުންނާނެ ކަމަށް ވަނީ ބުނެފަ އެވެ.

މި ފަހަރުގެ ޔޫރޯ ފުޓްބޯޅަ މުބާރާތުގައި ޕޯޗުގަލް އަށް ކުޅުނު ޕެޕޭ އަކީ ޔޫރަޕްގެ މައި ފުޓްބޯޅަ މުބާރާތުގެ ތާރީހުގައި ވެސް ކުޅުނު އެންމެ ދުވަސްވީ ކުޅުންތެރިޔާ އެވެ. ޕޯޗުގަލް ކެޓީ ކުއާޓާ ފައިނަލުގައި ޕެނަލްޓީ ޖަހައިގެން ފްރާންސް އަތުން ބަލިވުމުންނެވެ.

ޕޯޗުގަލްއާ އެކު، 2016 ވަނަ އަހަރުގެ ޔޫރޯ ފުޓްބޯޅަ މުބާރާތް ކާމިޔާބުކުރި ޕެޕޭގެ ކްލަބް ކެރިއަރުގައި 10 އަހަރު ރެއާލް މެޑްރިޑްގައި ހޭދަކުރިއިރު، ތިން ފަހަރު ސްޕެނިޝް ލީގާއި ތިން ފަހަރު ޗެމްޕިއަންސް ލީގު ކާމިޔާބުކުރި އެވެ.

ޕެޕޭގެ މުޅި ކެރިއަރަށް ބަލާއިރު، އޭނާ ވަނީ، ޕޯޗުގަލްގެ މަރިޓީމޯ އާއި ޕޯޓޯގެ އިތުރުން ތުރުކީގެ ބެސިކްޓާސް އަށް ވެސް ކުޅެފަ އެވެ. ކްލަބް ކެރިއަރު ނިންމާލީ ޕޯޓޯ އިންނެވެ. މުޅި ޖުމްލަ ކެރިއަރަށް ބަލާނަމަ، ޕެޕޭ ވަނީ 878 މެޗު ކުޅެ، 37 ތަށި ހޯދައިފަ އެވެ.

ރުޅި ގަދަ ޑިފެންޑަރެއްގެ ގޮތުގައި މަޝްހޫރުވެފައިވާ ޕެޕޭ އަށް ކެރިއަރުގައި 17 ރަތް ކާޑާއި 212 ރީނދޫ ކާޑު ވަނީ ދައްކައިފަ އެވެ.