ކޮރަޕްޝަނުގެ ތުހުމަތުތަކެއް ކުރެވިފައި ވަނިކޮށް ޕޯޗުގަލްގެ ބޮޑުވަޒީރު އެންޓޯނިއޯ ކޮސްޓާ އިސްތިއުފާ ދެއްވަން ނިންމަވައިފި އެވެ.

ލިތިއަމް މައިން ކުރުމާއި ހައިޑްރޮޖެން އުފެއްދުމަށް އެ ގައުމުގައި ކުރިއަށް ގެންގޮސްފައިވާ ޕްރޮޖެކްޓުތަކެއްގައި ކޮރަޕްޝަނުގެ އަމަލުތަކެއް ހިމެނޭ ކަމަށް ބެލެވި ކޮސްޓާގެ ޗީފް އޮފް ސްޓާފް ވެސް ޕްރޮސެކިއުޓަރުން ވަނީ ހައްޔަރުކޮށްފަ އެވެ. ކޮސްޓާ އިސްތިއުފާ ދެއްވާފައި ވަނީ އޭގެ ގަޑިއިރުތަކެއް ފަހުންނެވެ.

ކޮސްޓާގެ މައްޗަށް ވަކި ތަހުގީގެއް ހިންގާނެ ކަމަށް ޕޯޗުގަލްގެ އިދާރާތަކުން ވަނީ ބުނެފަ އެވެ. އެމަނިކުފާނު އިސްތިއުފާ ދެއްވީ އެ ގައުމުގެ ރައީސް މާސެލޯ ސޫޒާއާ ބައްދަލުކުރެއްވުމަށް ފަހު އެވެ.

ޕޯޗުގަލްގެ އިދިކޮޅު ޕާޓީތަކުން ވަނީ ވަގުތުން ވަގުތަށް އެ ގައުމުގެ ސަރުކާރު އިސްތިއުފާ ދިނުމަށް ގޮވާލާފަ އެވެ.

މިހާރު ކުރިއަށްދާ ތަހުގީގު ދަށުން ސަރުކާރުގެ ބައެއް އޮފީސްތަކާއި އެހެނިހެން ބައެއް ތަންތަން ވެސް ވަނީ ބަލައި ފާސްކޮށްފަ އެވެ.