ގއ. ކަނޑުހުޅުދޫ ފަސް އެކުވެރިން ރޭ ނުކުތީ މަސް ހިފުމަށެވެ. ޑިންގީ ގޮސް މަޑުކޮށްލީ އެއްފަޅެއްގައި، 10 މޭލު ދުރުގައި އޮތް މަސްވެރި ގެމަނަފުށީ ބަނދަރުގެ ނެރުމަތީގަ އެވެ. ދަގަނޑު ޖަހައިގެން މަސް ހިފުމަށްޓަކައި ދެ މީހަކު މޫދަށް ބޭލުމަށް ފަހު، އެހެން މީހުން ދިޔައީ ގެމަނަފުއްޓަށް އަރައި ކޮއްތު ގަތުމަށެވެ.

އެ މީހުން އެނބުރި އައުމުގެ ކުރިން، ބަނދަރުތެރެއަށް ވަދެގެން ދިޔަ ލޯންޗެއްގެ ބުރަފަތިން ޖެހި، މަސް ހިފަން ފައިބައި އުޅުނު އެކަކު "ބުރިބުރި" ވި އެވެ. ރޭ 10:30 ހާއިރު ހިނގި އެ ހާދިސާގައި ނިޔާވީ ކަނޑުހުޅުދޫ ބްލޫ ޑައިމަންޑު، އަލީ ލުތުފީ (އަލިބެ)، 45 އެވެ.

އަދަދު ނޫހާ ވާހަކަ ދެއްކި ގެމަނަފުށީ މީހަކު ބުނީ އަލީ ގައިގައި ޖެހުނީ ޖެހުނީ ޕާކް ހަޔަޓުގެ ލޯންޗެއް ކަމަށެވެ.

"އެ ވަގުތު ދިޔައީ ވާރޭ ވެސް ވެހެމުން. ލޯންޗު ވަދެގެން އައިސް އެއްޗެއްގައި ޖެހުނުހެން ހީވެގެން އަނބުރާލާފައި ގޮސް ބެލިއިރު މަސް ހިފަން ފައިބައި އުޅުނު މީހެއްގެ ގައިގައި ބުރަފަތިން ޖެހި އޮތީ ޒަހަމްވެފައި. ސިއްހީ މަރުކަޒަށް ގެންދިޔައިރު ވެސް އޮތީ މަރުވެފައި،" އެ މީހާ ކިޔައިދިނެވެ.

"ބަނޑަށާއި ހަށިގަނޑުގެ އެކި ތަންތަނަށް ބޮޑެތި ޒަހަމްތަކެއް ލިބިފައި ހުރި."

ފަސް ދަރިންނާއި އަންބަކު ހުރި އަލީގެ ކުއްލި މަރާއެކު ކަނޑުހުޅުދޫ އަށް ވަނީ ވަރަށް ބޮޑު ހިތާމައެއް ފެތުރިފަ އެވެ.

ޖަމީލް އުސްމާނާއި އަލީ ލުތުފީ ކަނޑުހުޅުދޫގެ ޒުވާނުންނާއެކު ނަގާފައިވާ ފޮޓޯއެއް

"އެންމެންގެ އެކުވެރި އަލީގެ ކުއްލި ވަކިވުމަކީ މުޅި ރަށަށް ލިބުނު ބޮޑު ހިތާމައެއް! މާތް ﷲ ހެޔޮ ރަހުމަތް ލައްވައި ސުވަރުގޭގެ މަތިވެރި ނިއުމަތް މިންވަރު ކުރައްވާށި. އާމީން،" އަލީއާ ގާތް ގުޅުމެއް އޮންނަ އެ ރަށަށް އުފަން، ރައްޔިތުންގެ މަޖިލީހުގެ ކުރީގެ މެމްބަރު ޖަމީލް އުސްމާން ފޭސްބުކްގައި ލިޔުއްވާފައިވެ އެވެ.

ޔޫތު މިނިސްޓްރީގެ ޑެޕިއުޓީ މިނިސްޓަރު އަހުމަދު އަޒްމޫން ވިދާޅުވީ "ބޮޑު އައްޔަ ނިޔާވުމަކީ ރަށަށް ލިބުނު ހިތާމައެއް، ދެރައެއް" ކަމަށެވެ.

"ބޮޑުއައްޔައަކީ ރަށުގެ އެންމެންނާ ގުޅޭ، ރަށުގެ ހުރިހާ މަސައްކަތެއްގައި ބައިވެރިވާ މީހެއް. މަސައްކަތްތެރި، ހެޔޮ ލަފާ މީހެއް،" އަޒްމޫން ވިދާޅުވި އެވެ.

އަލީގެ ހަށިގަނޑު ރޭ ފަތިހު ވަނީ ކަނޑުހުޅުދޫއަށް ގެންގޮސްފަ އެވެ. ފުލުހުން ދަނީ މައްސަލަ ތަހުގީގު ކުރަމުންނެވެ.