މިހާރު ކުރިއަށްދާ އިންޓަ ސްކޫލް ވޮލީބޯޅަ މުބާރާތުގެ 16 އަހަރުން ދަށުގެ ފިރިހެން ބައިގެ ޗެމްޕިއަންކަން އދ. ކުނބުރުދޫ ސްކޫލުން ހޯދިއިރު، އަންހެން ބައިގެ ޗެމްޕިއަންކަން ފ. އަތޮޅު މަދަރުސާ އިން ހޯދައިފި އެވެ.

އެންމެ ފޯރިގަދަ އަދި ވާދަވެރި އުމުރުފުރުގާ ގޮތުގައި މިފަހަރު ފެނުނު 16 އަހަރުން ދަށުގެ ފިރިހެން ބައިގެ ފައިނަލުގައި ކުނބުރުދޫ ސްކޫލުން ނުކުތީ އދ. މާމިގިލީގެ އދ. އަތޮޅު މަދަރުސާއާ ދެކޮޅަށެވެ. މި މެޗު ކުނބުރުދޫ ސްކޫލުގެ ފިރިހެން ޓީމުން ކާމިޔާބުކުރީ ސީދާ ތިން ސެޓުންނެވެ. މެޗުގެ ސެޓުތައް ކުނބުރުދޫ ސްކޫލުން ގެންދިޔައީ 25-17، 25-20 އަދި 25-5 އިންނެވެ. މެޗުގެ މޮޅު ކުޅުންތެރިޔަކީ ކުނބުރުދޫ ސްކޫލްގެ އަހުމަދު އައިހަމް މުހައްމަދު އެވެ.

މި ބައިގެ އެންމެ މޮޅު ހަތް ކުޅުންތެރިންގެ ތެރޭގައިވެސް އައިހަމް ހިމެނެ އެވެ. ދެން ހިމެނޭ ކުޅުންތެރިންނަކީ ކުނބުރުދޫގެ މުހައްމަދު ރިފްއަތު، މުހައްމަދު އިކްރާމް އިސްމާއިލް ރަޝީދު، މުހައްމަދު އިޔާދު މުހައްމަދު އަޔާޒު، އދ. އަތޮޅު މަދަރުސާގެ ޝައިހާން ޝަހީން، އިބްރާހިމް ރާކިން ހަސަން އަދި ކެޔޮދޫ ސްކޫލްގެ އިބްރާހިމް ޔަނާލް މުހައްމަދު އެވެ. މި އުމުރުފުރާގެ އެންމެ މޮޅު ކޯޗަކީ ކުނބުރުދޫ ސްކޫލްގެ އަހުމަދު ސުނާން އެވެ.

16 އަހަރުން ދަށުގެ ފިރިހެން ޗެމްޕިއަންކަން ހޯދި ނަމަވެސް އަންހެން ފައިނަލުގައި ކުނބުރުދޫ ސްކޫލް ވަނީ ބަލިވެފަ އެވެ. އެޓީމް ބަލިވީ ފ. އަތޮޅު މަދަރުސާ އަތުން ސީދާ ތިން ސެޓުންނެވެ. މެޗުގެ ސެޓުތައް ދިޔައީ 25-9، 25-21 އަދި 25-14 އިންނެވެ. ފައިނަލް މެޗުގެ މޮޅު ކުޅުންތެރިޔަކީ ފ. އަތޮޅު މަދަރުސާގެ އީމާން އަލީ އެވެ.

އިންޓަ ސްކޫލް މުބާރާތުގެ 16 އަހަރުން ދަށުގެ އަންހެން ބައިގެ ޗެމްޕިއަންކަން ހޯދީ ފ. އަތޮޅު މަދަރުސާގެ ޓިމް - ފޮޓޯ: އަބްދުﷲ އިޔާން/އަދަދު

މި އުމުރުފުރާގެ އަންހެން ޑްރީމް ޓީމްގައި ހިމެނެނީ ޗެމްޕިއަން ފ. އަތޮޅު މަދަރުސާގެ އީމާން އަލީ، ލީމް އަހުމަދު ލަތީފް، އައިޝަތު ޝިޔާ އަހުމަދުގެ އިތުރުން ކުނބުރުދޫގެ ފާތިމަތު ފައިހާ މުހައްމަދު، އާމިނަތު އާސިޔާ މުހައްމަދު އަދި ކެޔޮދޫ ސްކޫލްގެ އައިޝަތު ދީނާ ސަލީމް އާއި އާމިނަތު އާނީ މުހައްމަދު ނާޝިދު އެވެ. މިބައިގެ އެންމެ މޮޅު ކޯޗަކީ ފ. އަތޮޅު މަދަރުސާގެ އަލީ ޒާހިރު އެވެ.

ސްކޫލް މުބާރާތުގެ އެންމެ ފޯރިގަދަ އެއް ފައިނަލަކީ ތ. މަޑިފުށި ސްކޫލާއި ފ. އަތޮޅު މަދަރުސާ ވާދަކުރި 14 އަހަރުން ދަށުގެ އަންހެން ފައިނަލެވެ. މި ފައިނަލް މެޗު ވާދަވެރި ކުޅުމަކަށްފަހު 3-1 ސެޓުން ކާމިޔާބުކުރީ ފ. އަތޮޅު މަދަރުސާ އެވެ. މެޗުގެ ސެޓުތައް ދިޔައީ 25-17، 25-15، 23-25 އަދި 25-23 އިންނެވެ. ފައިނަލް މެޗުގެ މޮޅު ކުޅުންތެރިޔަކީ ފ. އަތޮޅު މަދަރުސާގެ ތުގާ ތޮލްހަތު އެވެ.

މި ބައިގެ އެންމެ މޮޅު ހަތް ކުޅުންތެރިންނަކީ ފ. އަތޮޅު މަދަރުސާގެ އައިޝަތު އީވާ އަބްދުﷲ، ތުގާ ތޮލްހަތު، އީޝާ އަލީ، ކެޔޮދޫ ސްކޫލްގެ އައިޝަތު އަޒްކާ މުހައްމަދު ނާޝިދުގެ އިތުރުން މާފުށީ ސްކޫލްގެ މަރިޔަމް ޔާނީ ޚަލީލް އާއި ތާޖުއްދީން ސްކޫލްގެ އައިރިޝް މޮންޓާޖެސް އެވެ. މިބައިގެ އެންމެ މޮޅު ކޯޗަކީ ފ. އަތޮޅު މަދަރުސާގެ އަލީ ޒާހިރު އެވެ.