މިހާރު ކުރިއަށްދާ އިންޓަ ސްކޫލް ވޮލީބޯޅަ މުބާރާތުގައި ވާދަކުރަމުން އަންނަ އަތޮޅުތަކުގެ ސްކޫލްތަކުން ފުރަތަމަ ބުރުގައި ކުޅުނު ގިނަ މެޗުތައް ކާމިޔާބުކޮށްފި އެވެ.

42 ޓީމާއެކު ކުރިއަށްދާ ސްކޫލް ވޮލީބޯޅަ މުބާރާތުގައި މިފަހަރު މާލޭގެ 10 ސްކޫލަކާއި އަތޮޅުތަކުން ނުވަ ސްކޫލެއް އަންނަނީ ވާދަކުރަމުންނެވެ. ތިން އުމުރުފުރާއަކަށް ކުރިއަށްދާ މުބާރާތުގައި މިހާތަނަށް ވަނީ 42 މެޗެއް ކުޅެފަ އެވެ.

މާލޭ ކުޅިވަރު އެކުވެނީގެ އައުޓްޑޯ ވޮލީކޯޓުގައި ކުރިއަށްދާ މުބާރާތުގައި އެންމެ ރަނގަޅަށް ކުޅެމުން އަންނަ ޓީމްތަކުގެ ތެރޭގައި ފާހަގަކޮށްލެވެނީ ފ. އަތޮޅު މަދަރުސާ އެވެ. އެޓީމުން ވަނީ 14 އަހަރުން ދަށުގެ އަންހެން، 14 އަހަރުން ދަށުގެ ފިރިހެން އަދި 16 އަހަރުން ދަށުގެ އަންހެން ބައިގައި މިހާތަނަށް ކުޅުނު ހުރިހާ މެޗެއް ކާމިޔާބުކޮށްފަ އެވެ.

16 އަހަރުން ދަށުގެ ފިރިހެން ބައިގައިވެސް ފ އަތޮޅު މަދަރުސާއިން އަންނަނީ ވާދަކުރަމުންނެވެ. އެ ޓީމުގެ ފުރަތަމަ މެޗުގައި ވާދަވެރި ކުޅުމަކަށްފަހު ވަނީ އދ. ކުނބުރުދޫ ސްކޫލް އަތުން ބަލިވެފަ އެވެ. ކުނބުރުދޫ ސްކޫލުން ވަނީ މި އުމުރުފުރާގައި އެޓީމް ކުޅުނު ފުރަތަމަ މެޗުގައި ކަލާފާނު ސްކޫލް އަތުންވެސް މޮޅުވެފަ އެވެ.

ކުނބުރުދޫ ސްކޫލްގެ އިތުރުން 16 އަހަރުން ދަށުގެ ފިރިހެން ކުދިންގެ ބައިގައި އ.ދ އަތޮޅު މަދަރުސާއިން ވެސް އަންނަނީ ރަނގަޅު ކުޅުމެއް ދައްކަމުންނެވެ. މިގޮތުން މިހާތަނަށް ގްރޫޕް ސްޓޭޖުގައި ކުޅުނު ދެ މެޗުވެސް އެ ޓީމުންވަނީ ކާމިޔާބުކޮށްފަ އެވެ. މި ބައިގައި ވ. އަތޮޅު ތައުލީމީ މަރުކަޒުން ވެސް އަންނަނީ ރަނގަޅު ނަތީޖާތަކެއް ހޯދަމުންނެވެ.

16 އަހަރުން ދަށުގެ އަންހެން ބައިގައިވެސް ކުނބުރުދޫ ސްކޫލް ފެންނަނީ ވަރުގަދަކޮށެވެ. އެޓީމުން ވަނީ ކ. އަތޮޅު ތައުލީމީ މަރުކަޒު އަތުންނާއި އދ. އަތޮޅު ތައުލީމީ މަރުކަޒު އަތުން މޮޅުވެފަ އެވެ.

މުބާރާތުގައި ވާދަކުރަމުން އަންނަ މާލޭގެ ސްކޫލްތަކަށް ބަލާއިރު، ތާޖުއްދީން ސްކޫލް، ހުރަވީ ސްކޫލް އަދި މުހިއްދީން ސްކޫލުންވެސް އަންނަނީ ރަނގަޅު ނަތީޖާތަކެއް ހޯދަމުންނެވެ.