ދައުލަތުގެ ބަޖެޓަށް އިތުރު ކުރުމަށް ހުށަހަޅާފައިވާ 6.5 ބިލިއަން ރުފިޔާއާ އެކީ މި އަހަރުގެ ޖުމްލަ ބަޖެޓު ޑެފިސިޓް 17 ބިލިއަން ރުފިޔާއަށް ވުރެ އިތުރު ވާނެ ކަމަށް އަންދާޒާތަކުން ދައްކައިފި އެވެ.
ފިނޭންސް މިނިސްޓްރީން ވަނީ އިއްޔެ ރައްޔިތުންގެ މަޖިލީހަށް މި އަހަރުގެ ބަޖެޓަށް އިތުރުކުރަން ސަޕްލިމެންޓަރީ ބަޖެޓެއް ހުށަހަޅާފަ އެވެ.
ބަޖެޓު އިތުރުކުރުމާ ގުޅޭ ގޮތުން ފިނޭންސުން ނެރުނު ނޫސް ބަޔާނުގައި ބުނި ގޮތުގައި މި ބަޖެޓުން މައިގަނޑު ގޮތެއްގައި ހަރަދު ކުރުމަށް ކަނޑައެޅިފައި ވަނީ ޕީއެސްއައިޕީ އާއި އާސަންދަ އާއި ސަބްސިޑީޓަކަށް ކުރާ ހަރަދުތަކާއި ސަރުކާރު ހިއްސާވާ ކުންފުނިތަކަށް ދޫކުރާ ކެޕިޓަލް ކޮންޓްރިބިއުޝަނަށެވެ.
ސަޕްލިމެންޓަރީ ބަޖެޓު
ޖުމްލަ ބަޖެޓު - 6.5 ބިލިއަން ރުފިޔާ
ރިކަރަންޓު ހަރަދު - 3.1 ބިލިއަން ރުފިޔާ
ސަބްސިޑީ - 1.8 ބިލިއަން ރުފިޔާ
އާސަންދަ - 1.2 ބިލިއަން ރުފިޔާ
ކެޕިޓަލް ހަރަދު - 3.3 ބިލިއަން ރުފިޔާ
ޕީއެސްއައިޕީ - 1.7 ބިލިއަން ރުފިޔާ
ސަޕްލިމެންޓަރީ ބަޖެޓު ހުށަހަޅަން ޖެހުނު ސަބަބުތައް ފާހަގަކުރަމުން ފިނޭންސުން ބުނީ މި އަހަރުގެ ތެރޭގައި ޕީއެސްއައިޕީ ހިންގުން ހަލުވިވެ، ބަޖެޓުކުރި މިންވަރަށް ވުރެ ބޮޑަށް އެ ނޫން ހަރަދުތައް ވެސް ހިނގައި، ބަޖެޓު ފާސްކުރިއިރު ހަރަދު ކުޑަކުރުމަށް ރާވާފައިވާ ގިނަ ފިޔަވަޅުތައް ރާވާފައިވާ ގޮތަށް ތަންފީޒުވެފައި ނުވާތީ، އެ ކަންކަމުން ލިބޭނެ ކަމަށް އަންދާޒާ ކުރާ ސޭވިންގްސް މިހާރު ދަށްވެފައިވާ ކަމަށެވެ.
މި އަހަރަށް ފާސްކުރީ 42.8 ބިލިއަން ރުފިޔާގެ ބަޖެޓެކެވެ. ނަމަވެސް ސަޕްލިމެންޓަރީ ބަޖެޓާ އެކީ މި އަހަރުގެ ބަޖެޓު 49.3 ބިލިއަން ރުފިޔާއަށް ބޮޑުވާނެ އެވެ.
ސަޕްލިމެންޓާ އެކު 2023ގެ ބަޖެޓު
- ޖުމްލަ ބަޖެޓު - 49.3 ބިލިއަން ރުފިޔާ
- ރިކަރަންޓު ހަރަދު - 3.1 ބިލިއަން ރުފިޔާ
- ސަބްސިޑީ - 4.3 ބިލިއަން ރުފިޔާ
- އާސަންދަ - 2.3 ބިލިއަން ރުފިޔާ
- ކެޕިޓަލް ހަރަދު - 17.4 ބިލިއަން ރުފިޔާ
- ޕީއެސްއައިޕީ - 10.3 ބިލިއަން ރުފިޔާ
ފިނޭންސުން އަންދާޒާ ކުރަނީ މި އަހަރު އާމްދަނީ އާއި ހިލޭ އެހީގެ ގޮތުގައި 32 ބިލިއަން ރުފިޔާ ލިބޭނެ ކަމަށެވެ. އެހެންކަމުން މިހާރު ފާސްކޮށްފައިވާ ބަޖެޓަކީ 11.3 ބިލިއަން ރުފިޔާ ދަރަނި ނުވަތަ ޑެފިސިޓް ބަޖެޓެކެވެ. މިހާރު ސަޕްލިމެންޓް ކުރާ އަދަދާ އެކު ބަޖެޓު ޑެފިސިޓް 17.2 ބިލިއަން ރުފިޔާއަށް އަރާނެ އެވެ.
އާމްދަނީ އާއި ހިލޭ އެހީގެ އަންދާޒާތައް
ޓެކުހުގެ ގޮތުގައި ލިބޭ އާމްދަނީ - 23.3 ބިލިއަން ރުފިޔާ
ޓެކްސް ނޫން ގޮތްގޮތުން ލިބޭ އާމްދަނީ - 6.3 ބިލިއަން ރުފިޔާ
ހަރުމުދާ ވިއްކައިގެން - 18.8 މިލިއަން ރުފިޔާ
ހިލޭ އެހީގެ ގޮތުގައި ލިބޭ އާމްދަނީ - 2.4 ބިލިއަން ރުފިޔާ
ފިނޭންސުން އާންމުކޮށްފައިވާ މިހާތަނަށް ލިބުނު އާމްދަނީގެ އަދަދުތަކަށް ބަލާއިރު، މިދިޔަ ހަފުތާގެ ނިޔަލަށް 35.9 ބިލިއަން ރުފިޔާ ހަރަދުކޮށްފައިވާ އިރު އާމްދަނީ އާއި ހިލޭ އެހީގެ ގޮތުގައި ލިބުނީ 26.3 ބިލިއަން ރުފިޔާ އެވެ.
މިހާތަނަށް ލިބުނު އަދަދުތަކަށް ބަލައި އިރު ޓެކްސް ނޫން އާމްދަނީގެ ގޮތުގައި މުޅި އަހަރަށް އަންދާޒާ ކުރި ވަރަށް ވުރެ އިތުރަށް 400 މިލިއަނަށް ވުރެ ގިނަ ރުފިޔާ މިހާރު ވެސް ލިބިއްޖެ އެވެ.
މިދިޔަ ހަފުތާގެ ނިޔަލަށް ލިބުނު އާމްދަނީ
ޓެކުހުގެ ގޮތުގައި ލިބުނު އާމްދަނީ - 19.1 ބިލިއަން ރުފިޔާ
ޓެކްސް ނޫން ގޮތްގޮތުން ލިބުނު އާމްދަނީ - 6.7 ބިލިއަން ރުފިޔާ
ހަރުމުދާ ވިއްކައިގެން - 4.5 މިލިއަން ރުފިޔާ
ހިލޭ އެހީގެ ގޮތުގައި ލިބުނު އާމްދަނީ - 488.3 މިލިއަން ރުފިޔާ
ޓެކްސް އާމްދަނީ އުޅެނީ ގާތްގަނޑަކަށް އަންދާޒާ ކުރި މިންވަރަށެވެ. އަދި މިހާތަނަށް ލިބިފައިވާ ޓެކްސް އާމްދަނީގެ އެވަރެޖަށް ބަލައި އިރު އަހަރުގެ ނިޔަލަށް ލިބޭނެ ކަމަށް ޓެކްސް އާމްދަނީ ވެސް ލިބޭނެ ކަމަށް ބެލެވެ އެވެ.
ލަފާކުރި ވަރަށް ނުލިބޭނެ ކަމަށް ބެލެވެނީ ހިލޭ އެހީ އެވެ. ވޭތުވި ގިނަ އަހަރުތަކުގެ ބަޖެޓުގައި ވެސް ލަފާކުރި ވަރަށް ހިލޭ އެހީ ލިބިފައި ނުވެ އެވެ. މި އަހަރުގެ މިހާތަނަށް ހިލޭ އެހީގެ ގޮތުގައި ލިބުނީ ލަފާ ކުރި ވަރުގެ އެންމެ 19 އިންސައްތަ އެވެ.
