ގުރައިދޫ ދާއިރާ މިއަދު "ރީނދޫ" ވެފައިވާ ކަމަށާއި ކުރިއަށް އޮތް ރިޔާސީ އިންތިހާބު އެއް ބުރުން ނެގުމުގައި މި ދާއިރާގެ ފުރިހަމަ ތާއީދު ލިބޭނެ ކަމަށް ޔަގީން ކުރައްވާ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

ގުރައިދޫ ދާއިރާގެ ކެމްޕެއިނަށް މިހާރު ގުޅިއަށް ކުުރައްވަމުން ގެންދަވާ ދަތުރުފުޅުގައި ވާހަކަ ދައްކަވަމުން ރައީސް ވިދާޅުވީ މީގެ ކުރިން ވެސް ގުޅިއަކީ އެމްޑީޕީ އަގުލައްބިއްޔަތު އޮންނަ ރަށެއް ނަމަވެސް ދާއިރާގެ ތިން ރަށް އެއްކޮލުމުން އެ މަންޒަރު އޮތީ ތަފާތުކޮށް ކަމަށެވެ.

"މި ދާއިރާގެ ރައްޔިތުންގެ މަޖިލީހުގެ ގޮނޑިއަކީ އަބަދުވެސް އެހެން ޕާޓީއެއްގެ ގޮނޑިއެއް، އެހެންނަމަވެސް މިދިޔަ ރޯދަ މަހުގެ ތެރޭގައި ބޭއްވުނު ބައި އިލެކްޝަނުން މި ދާއިރާ މިހާރު މިވަނީ ރީނދޫ ވެފައި،" ރައީސް ވިދާޅުވި އެވެ.

ރައީސް ވިދާޅުވީ އޭގެ ސަބަބުން ސަރުކާރުން މި ދާއިރާގެ ރައްޔިތުންނަށް ކޮށްދޭ ކަންކަމުގެ އުފާ އިހުސާސްވެފައިވާ ކަމަށެވެ.

ގުޅީ ކެމްޕެއިނު ޖަލްސާގެ ތެރެއިން-- ފޮޓޯ: މިރާޝް ނާޝިމް/ އަދަދު

"އިރާދަކުރެއްވިއްޔާ ކުރިއަށް މިއޮތް ރިޔާސީ އިންތިހާބުގައި ބޮޑުތަނުން ކާމިޔާބުކުރާއިރު، މި ދާއިރާއަކީ ހިމެނިގެންދާނެ ދާއިރާއެއް ކަމަށް ޝައްކެއް ނުކުރަން،" ރައީސް ވިދާޅުވި އެވެ.

ދެ ވަނަ ދައުރެއްގެ ކެމްޕެއިނަށް އައީ 90 ޕަސެންޓުގެ ވައުދު ފުއްދާފައިވާ ކަމަށާއި އެހެން ވައުދުތަކުގެ މަސައްކަތްތައް ހިނގަމުން އަންނަ ކަމަށް ވެސް އެމަނިކުފާނު ވިދާޅުވި އެވެ. ގުޅީގެ ފެނާއި ނަރުދަމާގެ މަސައްކަތާއި ބިން ހިއްކުމުގެ މަސައްކަތް ވެސް ވަރަށް އަވަހަށް ފެށިގެން ދާނެ ކަމަށާއި ކުނި މެނޭޖުކުރުމުގެ މަސައްކަތް ވެސް ވަރަށް އަވަހަށް ބަޔަކާ ހަވާލުކުރެވިގެންދާނެ ކަމަށް ވެސް ވިދާޅުވި އެވެ.

"ބިން ހިއްކުން އެ މަސައްކަތް ވަނީ އެމްޓިސީސީއާ ހަވާލުކޮށްފައި، އަމަލީ ގޮތުން ސެޕްޓެމްބަރު މަހުގެ ތެރޭގައި ފެށިގެން ކުރިއަށް ދާނެ،" ރައީސް ވިދާޅުވި އެވެ.

ދެ ވަނަ ދައުރަކަށް ހޮވިއްޖެނަމަވެސް، ރައްޔިތުން މިއަދު އެދުނު ގޮތަށް ރަށުގެ ބަނދަރު ތަރައްގީކޮށްދީ، އޭޓީއެމް ގާއިމްކޮށް، ރަށުގެ ސިއްހީ މަރުކަޒުގައި ލެބޯޓަރީގެ ހިދުމަތް ގާއިމްކޮށްދިނުމަށް ރައީސް ވަނީ ވައުދުވެވަޑައިގެންފަ އެވެ.

ގުރައިދޫ ދާއިރާ އަކީ ޑީއާރުޕީ ޒަމާނުއްސުރެ "އެމްޑީޕީއާ ދެކޮޅު" ދާއިރާ އެކެވެ. މިދިޔަ 14 އަހަރު ވެސް ރައްޔިތުންގެ މަޖލީހުގައި އެ ދާއިރާ ތަމްސީލުކުރެއްވީ އެމްޑީޕީއާ ދެކޮޅު ފިކުރުގެ ބޭފުޅެއްގެ ގޮތުގައި މަރުހޫމް އިބްރާހީމް ރިޒާ އެވެ.

ނަމަވެސް މިި އަހަރު ބޭއްވި ގުރައިދޫ ދާއިރާގެ ބައި-އިލެކްޝަނުގައި ވެރިކަން ކުރާ އެމްޑީޕީގެ ކެންޑިޑޭޓު އިބްރާހިމް ޝާޒް ވަނީ ތާރީހީ ބޮޑު މޮޅެއް ހޯއްދަވައި އެކަން ބަދަލުކުރައްވައިފަ އެވެ.

ގުރައިދޫ ދާއިރާއަށް ކުރައްވަމުން ގެންދަވާ ކެމްޕެއިނު ދަތުރުފުޅުގައި މި ދާއިރާގެ ހުރިހާ ރަށަކަށް ރައީސް މިއަދު ވަޑައިގަންނަވާނެ އެވެ. އެގޮތުން މިއަދު ހަވީރު ގުރައިދޫއަށް ވަޑައިގަތުމަށް ފަހު، މިރޭ ވަޑައިގަންނަވާނީ މާފުއްޓަށެވެ. ދަތުރު ނިންމާލުމަށް ހަމަޖެހިފައިވަނީ މިރޭ މާފުށީގައި ބާއްވާ ބޮޑު ޖަލްސާއިންނެވެ.

ރައީސްގެ ދަތުރުފުޅުގައި ރައީސްގެ އަރިހުގައި އެމްޑީޕީގެ ޗެއާޕާސަން ފައްޔާޒް އިސްމާއިލާއި، ކޯލިޝަން ލީޑަރު އެމްޑީއޭގެ ރައީސް އަހުމަދު ސިޔާމް މުހައްމަދާއި ގުރައިދޫ ދާއިރާގެ މެންބަރު އިބްރާހިމް ޝާޒުގެ އިތުރުން ސަރުކާރުގެ މަތީ ފަންތީގެ ގިނަ ބޭފުޅުން ބައިވެރިވަޑައިގަންނަވަ އެވެ.