ބާސެލޯނާ (ޖޫން 27) - މެންޗެސްޓާ ސިޓީއާ އެކު ހަދާފައިވާ ކޮންޓުރެކްޓް ހަމަވުމާ އެކު، އެ ކްލަބުގެ ކެޕްޓަންގެ ގޮތުގައި ހުރި ޖަރުމަންގެ މިޑްފީލްޑަރު އިލްކޭ ގުންޑޮގާން ސްޕެއިންގެ ބާސެލޯނާ އަށް ސޮއިކޮށްފި އެވެ.

މިދިޔަ ސީޒަންގައި ސިޓީއާ އެކު އިނގިރޭސި ޕްރިމިއާ ލީގާއި އެފްއޭ ކަޕް އަދި ޗެމްޕިއަންސް ލީގު ކާމިޔާބުކުރި ގުންޑޮގާން ،32، ބާސެލޯނާއާ ގުޅުނީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އަދި އިތުރު އެއް އަހަރަށް ކޮންޓުރެކްޓް އާކުރުމުގެ މާއްދާއެއް ހިމަނާފައިވާއިރު، އޭނާގެ ރިލީޒް ކްލޯސް (ކޮންޓްރެކްޓް އުވާލަންދައްކަން ޖެހޭ ފީ) އަކަށް ކަނޑައަޅާފައިވަނީ 436 މިލިއަން ޑޮލަރު އެވެ.

ގުންޑޮގާން، ބާސެލޯނާ އަށް ސޮއިކުރިކަން އިއުލާންކުރުމުގެ ގޮތުން އެ ކްލަބުން އިއްޔެ ނެރުނު ބަޔާނުގައި ބުނެފައިވަނީ ގުންޑޮގާން އަކީ ފާއިތުވި 10 ވަރަކަށް އަހަރަށް ބަލާއިރު ޔޫރަޕްގައި އެންމެ މޮޅު ކުޅުމެއް ދެއްކި އެއް މިޑްފީލްޑަރު ކަމަށެވެ.

ޖަރުމަންގެ ބޮރޫޝިއާ ޑޯޓްމަންޑް އިން 2016 ވަނަ އަހަރު ސިޓީ އަށް ބަދަލުވި ގުންޑޮގާން އަކީ އެ ޓީމުގެ އެންމެ މުހިންމު އެއް ކުޅުންތެރިޔާއެވެ. ގުންޑޮގާން އަކީ ސިޓީގެ ކޯޗުކަމާ ސްޕެއިންގެ ޕެޕް ގާޑިއޯލާ ހަވާލުވެ، އެ ކްލަބަށް ގެނައި ފުރަތަމަ ކުޅުންތެރިޔާ އެވެ. ގުންޑޮގާންގެ ކޮންޓުރެކްޓް އާކުރަން އެ ކްލަބުން މަސައްކަތްކުރި ކަމަށް ގާޑިއޯލާ ވަނީ ކުރިން ބުނެފަ އެވެ.

ގުންޑޮގާން ވަނީ ސިޓީ އަށް ކުޅުނު 304 މެޗުގައި 60 ލަނޑު ޖަހައިފަ އެވެ. އަދި އެ ކްލަބާ އެކު ޖުމްލަ 12 ތަށި އޭނާ ހޯދި އެވެ.

ގުންޑޮގާން ނެތްތަން ފޫބެއްދުމަށް ސިޓީން ވަނީ ޗެލްސީ އަށް ކުޅެމުންދިޔަ ކްރޮއޭޝިއާގެ މިޑްފީލްޑަރު މަޓެއޯ ކޮވަސިޗް ގެންނަން ނިންމައިފަ އެވެ.