އިއްޔެ ކުރިއަށްދިޔަ ގައުމީ ޓައިމް ޓްރަޔަލްގައި ދުވެ، ފަސޫހާ އަހުމަދު، 13 އަހަރުވީ އަންހެނުންގެ ގައުމީ 800 މީޓަރު ދުވުމުގެ ރެކޯޑް މުގުރާލައިފި އެވެ.

އިއްޔެ ކުރިއަށްދިޔަ ޓައިމް ޓްރަަޔަލްސްގައި އަންހެނުންގެ 800 މީޓަރުގެ ދުވުމުގައި ވާދަކޮށް ފަސޫހާ ރޭސް ނިންމާފައިވަނީ 2 މިނިޓް 27.92 ސިކުންތުންނެވެ. މިއީ ފާއިތުވި 13 އަހަރު ވަންދެން މުގުރާނުލެވި އޮތް ރެކޯޑެކެވެ. އުންމީދީ ދުވުންތެރިއެއްގެ ގޮތުގައި ކުރިއެރުން ހޯދަމުން އަންނަ ފަސޫހާ އަށް މި ލިބުނީ ކެރިއަރުގައި ކުރިއަށްދާން ބަލާއިރު، ވަރަށް ބޮޑު ކާމިޔާބެކެވެ.

މީގެ ކުރިން، މި ރެކޯޑް އޮތީ 2009 ވަނަ އަހަރު ޖަރުމަނުގެ ބާލިންގައި ކުރިއަށްދިޔަ ވޯލްޑް ޗެމްޕިއަންޝިޕްގައި ވާދަކުރި އައިޝަތު ރީޝާ އަތުގަ އެވެ. އެ ފަހަރު، ރީޝާ، ރެކޯޑް ހެދީ 2 މިނިޓް 28:00 ސިކުންތުން ރޭސް ނިންމައިގެންނެވެ.

އެތުލެޓިކްސް އަށް މިއީ ބައިނަލްއަގުވާމީ ލެވަލްގައި ބަލާއިރު ބޮޑު އަހަރެކެެވެ. އެ ގޮތުން، އަންނަ އޮގަސްޓް މަހު މަޑަގަސްކަރާގައި ފަށާ އިންޑިއަން އޯޝަން އައިލެންޑް ގޭމްސްް (އައިއޯއައިޖީ) އާއި ސެޕްޓެމްބަރު މަހު ޗައިނާގެ ހަންޒޫގައި ކުރިއަށްދާ އޭޝިއަން ގޭމްސް އަކީ ރާއްޖޭގެ ގައުމީ އެތުލީޓުން މި ވަގުތު ރާއްޖޭން ބޭރުގައި އެންމެ ބޮޑަށް ތައްޔާރުވަމުން އަންނަ ދެ ގޭމްސް އެވެ.