އިންޓަ ސްކޫލް އެތުލެޓިކްސް މުބާރާތަކީ އަބަދު ވެސް ޒުވާން އުއްމީދީ ތަރިންތަކެއް ފެންނަ މުބާރާތެކެވެ. އަނެއްކޮޅު މި މުބާރާތަކީ ޖޫނިއާ ލެވެލްގައި އެތުލީޓުން ހޯދަމުން އަންނަ ކުރިއެރުން ފާހަގުރެވޭ މުބާރާތެވެ. މި ވަގުތު ގައުމީ އެތުލެޓިކްސް ސްކޮޑުގައި ހިމެނޭ ގިނަ ކުޅުންތެރިންނަކީ އިންޓަ ސްކޫލް މުބާރާތްތަކުން ވިދާލި އުއްމީދީ ދުވުންތެރިންނެވެ.

މިދިޔަ ހުކުރު ދުވަހު އިންޓަ ސްކޫލް އެތުލެޓިކްސް މުބާރާތުގެ ނަތިޖާތަކަށް ބަލާއިރު ވެސް އެތުުލީޓުންގެ ކުރިއެރުން ފެނުނެވެ. ވަކިން ހާއްސަކޮށް ދިގު މުއްދަތުގެ ތަމްރީންތައް ހަދަމުން އަންނަ ގައުމީ ސްކޮޑުގެ އެތުލީޓުން ފެނުނީ ތަފާތު ފޯމެއްގައ އެވެ. ކޮންމެ އިވެންޓެއްގައި ކަހަލަ ގޮތަކަށް ރެކޯޑުތައް ހެދި އެވެ. މި ދުވުންތެރިންގެ ތެރެއިން އެންމެ ބޮޑަށް ފާހަގަކޮށްލެވުނީ އަންހެން ދެ އެތުލީޓުން ކަމަށްވާ ޖަލާލުއްދީން ސްކޫލްގެ އަހުނާ ނިޒާރު އާއި ދާންދޫ ސްކޫލްގެ އާމިނަތު ލަޔާނާ އިބްރާހިމް އެވެ.

އަހުނާ އާއި ލަޔާނާގެ ކުރިއެރުން ފާހަގަކުރަން ޖެހޭ ސަބަބުތައް ގިނަ އެވެ. އެންމެ މުހިންމު ސަބަބަކީ ދެ އެތުލީޓުންނަކީ މި އަހަރު އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ތައްޔާރުވަމުން އަންނަ ދެ އެތުލީޓުންނަށް ވެފައި، އެ މުބާރާތުގެ ކުރިން އެތުލީޓުންގެ ފެންވަރު ބަލާލަން ލިބުމެވެ.

މިދިޔަ ހަތަރު އަހަރު އެތުލެޓިކްސް އެސޯސިއޭޝަނުން މަސައްކަތް ކުރަމުން އަންނަނީ އަންނަ އޮގަސްޓް މަހު މަޑަގަސްކަރައިިގައި އޮންނަ އައިއޯއައިޖީ އިން މެޑަލްތަކެއް ހޯދުމެވެ. އެންމެ މުހިންމު ކަމަކަށް ފުރަތަމަ ފަހަރަށް ބައިނަލްއަގްވާމީ އަންހެން މެޑަލް ހޯދުމަށެވެ. މިކަން ހާސިލްކުރުމަށް މިދިޔަ ދެ އަހަރު އެސޯސިއޭޝަނުން ވަނީ އަންހެން ސްޕްރިންޓަރުންނަށް ގިނަ މުބާރާތްތަކަކުން ފުރުސަތުތައް ހޯދައިދީީ ތަމްރީންތަކެއްވެސް ފަހިކޮށްދީފަ އެވެ.

އަހުނާ އާއި ލަޔާނާއަކީ ވެސް ގައުމީ ސްޕްރިންޓް ޓީމްގެ ދެ މެންބަރުންނެވެ. މި ވަގުތު 100 މީޓަރު ދުވުމުން ގައުމީ ޖޫނިއާ ރެކޯޑު އޮތް އަހުނާ ވަނީ އިންޓަ ސްކޫލް މުބާރާތުގައި ހަތަރު ރެކޯޑެއް ހަދައިފަ އެވެ. އޭގެ ތެރޭގައި ގައުމީ ރެކޯޑެއް ވެސް ހިމެނެ އެވެ. ގައުމީ ރެކޯޑު އޭނާ ހެދީ އަންހެން ކުދިންގެ ޓްރިޕަލް ޖަމްޕުންނެވެ. ދެން އޭނާ ވަނީ 100 މީޓަރު ދުވުމާއި 200 މީޓަރު ދުވުމުގެ ސްކޫލް ރެކޯޑު ހަދައިފަ އެވެ. އޭގެ އިތުރުން، 100 މީޓަރު ދުވުމުގެ ރެކޯޑު މި މުބާރާތުގައި ދެ ފަހަރަށް އޭނާ ހެދި އެވެ. ފުރަތަމަ ޕްރިލިމިނަރީ ހީޓުގަ އެވެ. އޭގެ ފަހުން ފައިނަލުގަ އެވެ.

ދެން އޮތީ ލަޔާނާގެ ވާހަކަ އެވެ. އެ ގޮތުން، 20 އަހަރުން ދަށުގެ ބައިގައި ވާދަކޮށް ލަޔާނާ ވެސް ދެ ރެކޯޑެއް ހެދި އެވެ. އެ އުމުރުފުރާގެ 100 މީޓަރު ދުވުމުން ރަން މެޑަލް ހޯދީ މީޓު ރެކޯޑަކާ އެކުގަ އެވެ. މީގެ އިތުރުން، 400 މީޓަރު ދުވުމުން ވެސް ރަން މެޑަލް ހޯދީ ރެކޯޑަކާއިއެކުގަ އެވެ. އަދި 200 މީޓަރު ދުވުމުންވެސް ރަން މެޑަލް ހޯދީ ލަޔާނާ އެވެ.

މިދިޔަ މާޗު މަހު ކުރިއަށްދިޔަ އެސޯސިއޭޝަން ޗެމްޕިއަންޝިޕުގައިވެސް މި ދުވުންތެރިން ދުވި އެވެ. އެ މުބާރާތުގެ 100 މީޓަރު ދުވުމާއި 200 މީޓަރު ދުވުމުން ރަން މެޑަލް ހޯދީ އަހުނާ އެވެ. އެފަހަރު 100 މީޓަރު ދުވުމުގައި އަހުނާގެ ޓައިމިން އަކީ 12.72 ސިކުންތެވެ. ސްކޫލް މުބާރާތުގައިވެސް އޭނާ ރޭސް ނިންމީ ހަމަ މި ޓައިމިންގަ އެވެ.

އެސޯސިއޭޝަން ޗެމްޕިއަންޝިޕްގައި ލަޔާނާގެ 100 މީޓަރުގެ ދުވުން ނިންމީ 13.20 ސިކުންތުންނެވެ. ސްކޫލް މުބާރާތުގައި އޭނާގެ ޓައިމިން އަކީ 12.99 ސިކުންތެވެ.

އައިއޯއައިޖީ އަށް އެކުލަވާލި ގައުމީ ސްކޮޑުގައި ހިމެނޭ ގިނަ ދުވުންތެރިން މި އަހަރުގެ ކުރީކޮޅުން ފެށިގެން ތަމްރީން ހަދަމުން އަންނަނީ ރާއްޖެއިން ބޭރުގަ އެވެ. ނަމަވެސް ލަޔާނާ އާއި އަހުނާ ތަމްރީން ހަދަމުން އައީ ރާއްޖޭގަ އެވެ. އެހެންކަމުން މި ވަގުތު ދެ އެތުލީޓުން ވެސް ތިބީ ރަނގަޅު ފެންވަރެއްގަ އެވެ. އައިއޯއައިޖީގެ ކުރިން ބޭރުގެ ތަމްރީންތަކެއް ލިބިއްޖެނަމަ ނަތީޖާތައް ރަނގަޅުވާނެކަން ޔަގީންވެ.

މި އަހަރުގެ އެސޯސިއޭޝަން ޗެމްޕިއަންޝިޕާއި އިންޓަ ސްކޫލުގައި މި ދެ ދުވުންތެރިންގެ ނަތީޖާތަކަށް ބަލާއިރު ކުރިއެރުން އެބަ ފެނެ އެވެ. މިއީ ހަމަ ޔަގީނުންވެސް އައިއޯއައިޖީގައި ހޯދަން މަސައްކަތްކުރާ "އަންހެން މެޑަލް" އަށް އިތުބާރު ބޮޑުވާ ކަމެކެވެ.

ލަޔާނާ އާއި އަހުނާ އެ ދިނީ ވަރުގަދަ މެސެޖެކެވެ. އިންޓަ ސްކޫލް މުބާރާތަކީ ގައުމީ ފެންވަރުގެ އެތުލީޓުން ފެންނާނެ ފެންވަރު ރަނގަޅު މުބާރާތެއްކަމުގެ މެސެެޖެވެ. އަތޮޅުތަކުން ހުނަރުވެރި ދުވުންތެރިން ފެންނާނެކަމުގެ ވަރުގަދަ މެސެޖެވެ. އެންމެ މުހިންމު ކަމަކަށް ރާއްޖޭގެ އެތުލެޓިކްސް ތާރީޚުގެ ބައިނަލްއަގްވާމީ ފުރަތަމަ އަންހެން މެޑަލް ހޯދުމަށް ކުރާ މަސައްކަތް ކާމިޔާބުކުރެވިދާނެކަމުގެ އުއްމީދީ މެސެޖެވެ.