އިންޓަ ސްކޫލް އެތުލެޓިކްސް މުބާރާތުގެ ދެ ކެޓަގަރީއަކުން އެއް ވަނަ ހޯދައި އެންމެ ކާމިޔާބު ސްކޫލުގެ މަގާމު އަހުމަދިއްޔާ އިންޓަނޭޝަނަލް ސްކޫލުން ހޯދައިފި އެވެ.

ޖުމްލަ އެކު، 47 ސްކޫލުން 1500 އަށް ވުރެ ގިނަ އެތުލީޓުން ވާދަކުރި މުބާރާތުގެ 20 އަހަރުން ދަށުގެ ފިރިހެން އަދި އަންހެން ބައިގެ އެއް ވަނަ ހޯދީ އަހުމަދިއްޔާ އިންނެވެ.

ސަތާރަ އަހަރުން ދަށުގެ އުމުރުފުރާގެ ފިރިހެން އެންމެ މޮޅު ސްކޫލުގެ މަގާމް މަޖީދިއްޔާ ސްކޫލުން ހޯދިއިރު، އަންހެން އެެންމެ މޮޅު ސްކޫލަކީ ޝަރަފުއްދީން ސްކޫލެވެ.

އެންމެ ވާދަވެރިކޮށް ފެނުނު އެއް އުމުރުފުރާ ކަމަށްވާ 15 އަހަރުން ދަށުގެ އަންހެން އެންމެ މޮޅު ސްކޫލަކީ ކަލާފާނު ސްކޫލެވެ. ފިރިހެން އެންމެ މޮޅު ސްކޫލަކީ އިސްކަންދަރު ސްކޫލެވެ.

އެ ގޮތުން، 13 އަހަރުން ދަށުގެ އުމުރުފުރާގައި ކޮންމެ ބަޔަކުން ގަދަ ތިން ސްކޫލު ހޮވި އެވެ. ފިރިހެން ބައިގެ އެއް ވަނަ މިލަންދޫ ސްކޫލުން ހޯދިއިރު، ދެ ވަނަ ހޯދީ މުހްޔިއްދީން ސްކޫލެވެ. ތިން ވަނަ ލިބުނީ ކަނޑުހުޅުދޫ ސްކޫލަށެވެ. އަންހެން ބައިގެ އެއް ވަނަ އަފީފުއްދީން ސްކޫލުން ހޯދިއިރު، ދެ ވަނަ ހޯދީ އިސްކަންދަރު ސްކޫލެވެ. ތިން ވަނަ ހޯދީ ޖަލާލުއްދީން ސްކޫލުންނެވެ.

އިންޑިވިޖުއަލް ވަނަތަކަށް ބަލާއިރު، 20 އަހަރުން ދަށުގެ ފިރިހެން އެންމެ މޮޅު އެތުލީޓަކީ ގައުމީ ޔުނިވާސިޓީގެ އިބްރާހިމް އާދަމް އެވެ. އޭނާ ވަނީ މި އުމުރުފުރާގެ ފިރިހެން 500 މީޓަރު، 800 މީޓަރު އަދި 1500 މީޓަރު ދުވުމުން އެއް ވަނަ ހޯދާފަ އެވެ.

ވިހި އަހަރުން ދަށުގެ އެންމެ މޮޅު އަންހެން އެތުލީޓަކީ ދާންދޫ ސްކޫލުގެ އާމިނަތު ލަޔާނާ މުހައްމަދު އެވެ. ލަޔާނާ ވަނީ 100 މީޓަރު، 200 މީޓަރު އަދި 400 މީޓަރު ދުވުމުން އެއް ވަނަ ހޯދައިފަ އެވެ. ސަތޭކަ މީޓަރާއި 400 މީޓަރު ދުވުން ލަޔާނާ ނިންމާލީ މި އިވެންޓުގެ ސްކޫލު ރެކޯޑަކާ އެކުގަ އެވެ.

ސަތާރަ އަހަރުން ދަށުގެ އެންމެ މޮޅު އެތުލީޓުންނަކީ ޖަލާލުއްދީން ސްކޫލްގެ އަހުނާ ނިޒާރު އާއި މަޖީދިއްޔާ ސްކޫލްގެ ޒައިން ޒައިދު އަބްދުﷲ އެވެ. އަހުނާ ވަނީ އޭނާ ރަން މެޑަލް ހޯދި ތިން އިވެންޓުގައި ވެސް ރެކޯޑު ހަދައިފަ އެވެ. އެ ގޮތުން، 100 މީޓަރާއި 200 މީޓަރު ދުވުމުން އަހުނާ ސްކޫލް ރެކޯޑު ހެދިއިރު، ޓްރިޕަލް ޖަމްޕުން އޭނާ ވަނީ ގައުމީ ރެކޯޑު މުގުރާލާފަ އެވެ.

މަޖީދިއްޔާގެ ޒައިން ވަނީ 800 މީޓަރާއި 1500 މީޓަރު ދުވުމުން ރަން މެޑަލް ހޯދައިފަ އެވެ. އެ ގޮތުން، 1500 މީޓަރު ދުވުން ޒައިން ނިންމާލީ ސްކޫލު ރެކޯޑަކާ އެކުގަ އެވެ.

ފަނަރަ އަހަރުން ދަށުގެ އެންމެ މޮޅު ފިރިހެން އެތުލީޓުގެ މަގާމް ހޯދީ ތިން ރަން މެޑައްޔާ އެކު އިސްކަންދަރު ސްކޫލްގެ މުހައްމަދު އިލާން އިމްރާން އެވެ. އޭނާ ވަނީ 100 މީޓަރު، 200 މީޓަރު އަދި ލޯންގް ޖަމްޕުން އެއް ވަނަ ހޯދައިފަ އެވެ.

މި އުމުރުފުރާގެ އަންހެން އެންމެ މޮޅު އެތުލީޓަކީ ހިތަދޫ ސްކޫލްގެ އާމިނަތު ޒީވާ އާމިރު އެވެ. ޒީވާ ވަނީ އަންހެން ކުދިންގެ 200 މީޓަރު އަދި 400 މީޓަރު ދުވުމުން ރަން މެޑަލް ހޯދައިފަ އެވެ.

މިދިޔަ އަހަރެކޭ އެއްގޮތަށް މިއަހަރުގެ އިންޓަ ސްކޫލް އެތުލެޓިކްސް މުބާރާތް ފެނުނީ ވަރަށް ވާދަވެރިކޮށެވެ. އެ ގޮތުން، 20 އަހަރުން ދަށުގެ އުމުރުފުރާ ފިޔަވައި އެހެން ހުރިހާ އުމުރުފުރާއެއްގެ އެކި ކެޓަގަރީތަކުން އެއް ވަނަ އެއް ސްކޫލަކަށް މި އަހަރު ލިބިފަ އެއް ނުވެ އެވެ.